18
Yesus mlak go
1 Nemot no keng go sedue sogo dewi pu gono, bu Kidron idi sono andua-andua ey Yesus gemang klong. Ngga sogo usu meno gemang. Nemot go andua-andua ey usu ngganemot no gemang degut-nawon. 2 No, usu ngga, klay sedue Yudas mo senong dali. Da mata so, andua-andua ey Yesus ey mo klong go nogo. 3 Se ikum! Plesedue daley, Ki Wali yap yay sogo ey, sedue Parisi eygo, usu ngganemot no Yesus mlak genang so, Yudas go kemle no gemang nenawon. Ple, suon, sagoy ta no idok go ey, nemotnang gemang nenawon. 4 No, ngga lemoy genang naklay, Yesus mo senong-nawon. Ngga ey, plesedue dagu sono nawon go gemang usi, “Nando so motnang uwet-ketogoy?” 5 Nggano, nemotnang lo pu go, “Yesus, yakena Nasaret sik sogo sedue so genamnang uwet go se!” Nemotnang sono Yesus lo gemang pu, “Genam ngge Nemot lo!” Esang! Nemotnang eygo, klaysedue Yudas gemang dali. 6 Yesus lo pu go tup gono, kuikui lo nemotnang naklay klong go, nan blo sono gemang net-lak. 7 Tandali, nemotnang sono Yesus lo usi-nawon go, “Nando so motnang wet-ketogoy?” Tandali nemotnang lo pu go, “Yakena Nasaret sik sogo Yesus so!” 8 Ngga ey, Yesus lo pu go, “Genam we-tu go: Genam ngge, Nemot lo! Genam so kebanto go, Genam eygo sedue-a, itak go nase klong-lak!” 9 Se senong: ngga kalik Yesus pen go, banim Nemot lo pen-ayom go nebut gemang lemoy, “Ki Wali Aya! Klaya nang go, Genam no itak go sikabung, Genam logo yakua nega.”
10 No, Simon Petrus-a, tengang sok go, wit-siwon go, trang dega go koybutasemu go kama dop ta semlea idi kekayso gemang tut. Sedue ngga go sui: Malkus. 11 Petrus sono Yesus lo gemang pu, “Tandali sip ba sono tengang, se kok!’ Se duing: Genam nogo so idekeba tegun, Ki Wali Aya lo iti go ngge, ya kua drop-srelu?’ ”
Yahudi go woy dega sono Yesus wawi go
12 Woy ngganemot no plesedue daley ey Ki Wali yap yay sogo sedue ey mlak go gemang dok-nenawon. 13 Ngga ey, banim Yahudi go wengkabui Anas mit sono wawi go gemang klong. Anas ngga, Kayapas go nglangin siomasi. Yagui ngganemot nogo, taiti so pupuit go trang dega, Kayapas. 14 Banim temu no sedue-sedue Yahudi nogo mang, Kayapas ngganemot lo mo king-ngam, “Way so sikabung naklay nogo so, Sedue klay duo-a but go kebong go, ngga suey!”
Yesus so Petrus lo wayang go
15 Yesus mlak gono, Simon Petrus, Yesus go andua meno Yohanes tang go ey keng go gemang klong dali. Yahudi go trang dega Yohanes-a senong go nogo, Yesus ey wengkabui go yap sono gemang degut-nawon. 16 No, Petrus-a kua degut-srenawon. Seboy yataput so gemang bung-tenawon. Nggano, tandali dia no Yohanes pung go, Petrus degut dali genang so, yataput yay sogo kabung no gemang pu-nawon. 17 Petrus ikum gono yataput yay sogo kabung lo pu go, “Mot ngge Yesus go andua meno?” Nggano, Petrus lo pu go, “Kua! Genam, Yesus go andua kua.”
18 Ku dalip yam no, kebali sedue ey, yay sogo go plesedue ey, koy puit go, dalip so gemang lelemok. Petrus klong go, nemotnang ey klay gono dalip gemang lemok dali.
Yesus taiti so pupuit go trang dega lo neyboy go
19 Se ikum: Yesus go andua-andua sogo, Nemot lo nguok go tap sogo, trang dega lo mata so tang gemang usi-nawon. 20 Nggano, Yesus lo pu go, “Kuno-woyno, neguon so Genam lo pen go, nguok go, sikabung naklay mo tup. Nggano, Ki Wali yap kangok go, yakena-yakena sogo dewi yap ba no Genam lo mo nguok. Maykok sogo nebut, Genam logo kua pen. 21 Sogo tete so Genam sono mot lo ne usi-togoy? Sikabung no nase usi! Sikabung naklay lo Genam go nebut mo tup. Nemotnang sono, tang se usi!” 22-23 Nebut ngga pu goso, Yesus go nebuemnemu no plapang go, yay sogo sedue meno lo gemang pu, “Mot suali kua! Wengkabui nogo nebut ngga kalik, pen-atogoy go?” Way so Yesus lo pu go, “Wamoy so Genam lo mlue go, nggeasui se taling! No, seni sogo-a Genam pen go. Sogo so Genam plapang-to?” 24 Nggano, Anas lo pu goso, tegan lo Yesus dok gono, Yahudi go trang dega Kayapas sono pu go wawi go gemang klong.
Tandali go tete Yesus so Petrus lo wayang go
25 Simon Petrus koyku so dalip so lelemok gono, sikabung temu lo pu go, “Yesus go andua meno mot ngge ba?” No, Petrus lo pu go, “Kua! Nemot go andua genam kua.” 26 Nggano, sedue Yahudi go trang dega go, nemot go tamot meno gemang. Seni so, nemot, Petrus lo kamadop tut go sedue go kukunu lo pu go, “Esang! Sedue ngga ey, usu damoy so susuing go, genam mo ikum-bayu!” 27 Tandali Petrus lo wayang-nawon go, “Kua! Genam kua senong.” Woy ngganemot nogo, ayang nebut se tutuot.
Pilatus sono wawi go Yesus klong go
28 Ku boblong go, Yahudi go trang dega Kayapas go yap sik so, gubernul Pilatus go yap sono Yesus wawi go gemang klong. Seni so, kon lemoy eygo suali so walop Paska ten maning kua pla go nogo, amble go yap ba sono, sedue Yahudi tang go kua degut. 29 Sedue Yahudi demu seguoy eygo suali so, dia sono gubernul Pilatus-a pung gono, sedue Yahudi sono gemang usi, “Motnang lo duing go, sedue ngge sogo kuklue mo pluok?” 30 Way so, nemotnang lo pu go, “Piam kua go, tebadali go yakua wawi go weng!” 31 Pilatus lo pu go, “Esang! Nemot kuklue go, mot go demutrui no motnang tang so se wet. Ngga ey, idekeba motnang lo se taling!” Way so iram-tegay Yahudi lo pu go, “Sedue meno kebong genang, atnang sedue Yahudi don kua. Roma go wengkabui-a taling go, ngga se pluok.” 32 Se duing: Nemot kebong genang tap, banim Yesus lo pen go kalik, nggeasui gabe lelemoy.
33 Yahudi go iram-tegay lo pen go nebut ngga, tup gono, tandali amble go yap ba sono Pilatus gemang degut-nawon. Nggano, Yesus wawi go, weng go, Pilatus lo gemang usi, “Seni so, sedue Yahudi go Iram, Mot gabe?” 34 Yesus lo pu go, “Mot lo usi-to go ngga, mot tang so duing go usi-to? Sikabung meno lo pen go usi-to?” 35 Way so, Pilatus lo pu go, “Genam ngge, sedue Yahudi? No, ngge no Mot go sikabung ey iram-tegay eygo lo wawi go Mot weng go. Sogo kuklue-a Mot logo mo pluok?” 36 Nggano, Yesus lo pu go, “Kukunan sik sogo deguena Genam ngge kua. Kukunan sik sogo deguena sogo, Yahudi go ta sono go, Genam ya kua itak. Nemotnang eygo Genam go blung lo ple mea tui. No, se senong: Genam tamlak go blongdon duduing kukunan sik so kua.” 37 Nggano, Pilatus lo usi go, “Ngga kalik go seni so Mot ngge Iram?” Yesus lo wa go, “Ngga mot tang so pu-santo go! Se senong: seni eygo walitap taling genang so, kukunan blo no tui go Genam mo li gabe! seni eygo tap ngganemot nando lo uwet go, Genam go nebut nemot lo tupduk go mea keng!” 38 No, way so Pilatus lo pu go, “Esang! Seni eygo walitap ngganemot nemot go seni, sogo piam? Genam lo duing go: tap ngga kua.”
Yesus kua itak Barnabas-a itak go
39 Yesus go nebut tup gono, dia no tandali pung go, iram tegay Yahudi sono Pilatus lo gemang pen, “Yesus but genang piam Genam logo kua ikum-sretu go! No, genam mo mlay: yaguino-yaguino, walop Paska nang sogo, boy ba sik sogo sedue kuklue eygo klaya, ta mea itak. Nggeasui go genam lo gabe usi, ‘Yahudi go iram Yesus-a ya itak?’ ” 40 No, ngge kalik sedue Yahudi naklay lo bega-nenawon go, “Kua, Nemot ya kua itak! Barnabas-a ta se itak!” Se senong: Barnabas ngga ambledante gabe.