17
Yesus blo sik sogo, andua-andua mo senong
1 Yesus, andua-andua nogo nebutmang yam so king gono, ut sono nemu yalap-biwon gono, ngge kalik gemang pu-tenawon,
“O, Ki Wali Aya! Mot mit sono Genam klong genang ku, nggeasui go mo pung-atun. Blo sono Danon go blongdon iway-a se iti! Way so, Mot go sui iway-a Danon lo iti genang.”
2 Ki Wali Aya! Mot go duduing sikabung naklay nogo taling genang don, Danon nogo Mot lo mo iti gabe. Genam no Mot lo itak go sikabung nogo, wali inim-a don ngganemot lo gabe pupluok. 3 Yang! Senang wali inim go seni: Mot, Genam no keng go sikabung lo mlak genang.
Ki Wali Aya! Mot, seguong-a klayking got-togoy! Nggano, Aya lo mot-dak go weng go Iram Yesus ngge, nemotnang lo mlak dali genang. 4 Kukunan blo nogo kebali Mot lo mot-dak go, Genam lo teguop so naklay mo pluok gabe. Yang! Mot go blongdon Genam lo mo leguit.
5 O, Ki Wali Aya! Mot go blongdon ba sono wawi go Genam se klak. Yang! Maning kukunan kua semu go nogo blongdon kalik dali tandali se iti-kundo!
6 Genam go ta sono itak go sikabung nogo, Mot go sui-a Genam lo mo leguit gabe. Nemot-a Mot go sikabung, Genam go ta sono Mot lo mo itak. 7 Nggeasui go nemotnang lo senong go mo mlak: kunala, duduing, senong, blongdon naklay Mot sik sogo, Genam sono mo itak gabe. 8 Yang! Walinebut Genam sono Mot lo taling go, nemotnang nogo Genam lo mo nguok. Walinebut ngganemot tup gono, suey so dabui lo nemotnang mo keng gabe. Nggeasui go, ngge nemotnang lo senong go mo mlak: Genam seni so Mot sik so mo pung! Ngga ey, Genam Mot lo pu go weng go, dabui lo nemotnang gabe kekeng.
Andua-andua 12 kuoy go nogo dewi Yesus lo pu go
9 Ki Wali Aya! Andua-andua sogo-a dewi Genam gabe pupu. Kukunan ngge sogo dewi Genam kua pupu gabe. No, nemotnang ngge, Genam sono Mot lo itak go sogo-a dewi gabe pu-bitugu. Mot go blung, nemotnang ngge-a, gabe! 10 Mot go blung ba sono go Genam go blongdon mo ngap. Yang, Mot tete sogo ngge, Genam go. Genam tete sogo, Mot go tete dali gabe! 11 Seni so, Mot mit sono Genam gabe tetaut. Kukunan blo no Genam suing genang, mo kua. No, nemotnang-a kukunan blo no gabe ya itak.
O, Ki Wali Aya, teguop go Aya! Mot go sui ba nogo don lo, suey so nemotnang yay se suing. Sui ngga ba no Genam gabe wali dali. Ngga ey, klaya goso Imot kalik, nemotnang gabe. 12 Nemotnang ey maning go nogo, Genam no Mot go sui iti go ba no, suey so yay mo got-sanyu gabe. Klayanang go kua nega. No, Wali Sam klaut no klik go lemoy genang-a, klaya mo waluk.
13 Ki Wali Aya! Nggeasui go, tandali Mot mit sono Genam gabe koklong. No, maning kukunan blo sogo no, nebut ngge naklay pen-bitugu. Ngga ey, Genam logo yakay nemotnang go dabui ba no tram genang. 14 Mot lo pu go walinebut, yam so nemotnang no Genam lo mo pen-asanyu. Nemotnang ngge, Genam kalik kukunan tete sogo sikabung kua. Ngga tang so, nemotnang, kukunan sikabung lo gabe i-ikle. 15 Kukunan sik sogo nemotnang Mot lo wawi genang so kua wadong-bitugu. No, ngge-a gabe uwadong-bitugu, ‘Kupiamgo ta sik sogo, nemotnang yay, Mot lo se suing!’ 16 Genam kalik dali, kukunan tete sogo nemotnang kua gabe.
17 Ki Wali Aya! Walinebut seni eygo Mot lo pepen golo, nemotnang se teguop! 18 Kukunan blo sono weng genang so, Genam Mot lo mot-dak go kalik, nemotnang gabe mot-dak go koklong dali. 19 Nemotnang nogo-a, teguop so Mot sono At go wali-a gabe itak-bitugu. Seni eygo walinebut logo so, nemotnang go wali mea teguop dali.
Blong duoyap naklay nogo so dewi pu go
20 Ki Wali Aya! Genam lo mo kuoy go andua ngge seguong sogo-a dewi kua pupu. No, nemotnang lo pepen go tang so keng go nogo blong duoyap sogo gabe wadong-bitugu dali. 21 Nemotnang ngganemot, klaya so se lemoy-lak! Mot At ey, Genam Mot ey, klaya lemoy go kalik, nemotnang Imot ey klaya so lemoy dali genang. Ngga tang so, kukunan senong genang: seni so! Genam Aya lo mot-dak go mo weng. 22-23 Blongdon Genam sono Mot lo iti go, nemotnang nogo mo wasey dali gabe. Imot kalik dali, nemotnang klaya ngge kalik lemoy genang: nemotnang ba so Genam gemang, Genam ba so Mot gabe. Ngga tang so, nemotnang teguop so klaya seguong mea lemoy. Ngga ey, kukunan sikabung lo mea senong, ‘Seni so, Woy Dem Ki Wali Aya lo pu go mo weng!’ Nggano, mea senong dali, ‘Ki Wali Aya go gualaklum nemotnang nogo, Genam so klum tra go dali kalik.’
24 O, Aya! Klay gono Genam ey suing genang so, Genam go ta sono nemotnang Mot lo mo itak. Nago so, Genam gemang go, ngga dali no nemotnang se suing! Ngga ey, Genam tamlak go blongdon, blong duoyap se ikum. Mot lo klum tang so, maning kukunan kua semu gono, Genam no iti go blongdon ngganemot gemang.
25 Ki Wali Aya! Seni eygo nemudi sogo, Mot-a gabe! Seni so, kukunan sikabung logo Mot senong kua mlak. No, Genam lo dui ey, Mot gabe senong. Nggano, Genam go andua-andua logo-a ngge senong go gabe mlak, “Seni so, Wali Aya lo mot-dak go Blong Dem mo weng!” 26 Andua-andua nogo Mot go sui, Genam lo mo leguit. Ngga, kuno-woyno Genam lo mea pupluok. Ngga ey, Ki Wali Aya go gualaklum, Genam nogo so tetaling go, nemotnang go dabui ba so gigit genang. Nggano, nemotnang ey klaya so Genam lemoy dali genang. Seni!