16
Woy Dem no dabui iti go sik so teguey genaning
1 Yesus lo pu go, “Nebut ngga naklay Genam lo pen go, Genam no dabui kekeng go motnang teguey genaning. 2 Se senong: Yahudi go dewi yap ba sik sogo, motnang woy-woy lo mea yat. Ku mea pung-ayun, motnang but go kebong go, nemotnang lo mea duing, ‘Ngge, Ki Wali Iram nogo so, pupluok go tasam gabe!’ 3 No, esang! Ki Wali Aya Genam eygo, nemotnang kua senong go tang so, ngga gemang pupluok. 4 Ngge naklay, motnang no banim Genam lo pepen go, ngga lemoy go nogo, motnang lo tandali duing genang, ‘Yang, banim no atnang nogo, ngga Woy Dem lo mo pen.’ Banim go, maning motnang ey Genam susuing go nogo, motnang nogo nebut ngge kua pen-sreyu.”
Ki Wali Waglo go kebali
5 Nggeasui go, Genam so mot-dak go weng go Ki Wali Aya mit sono gabe ya klong. No, esang! Motnang logo kua usi, “Nago no Mot klong so?” 6 Nebut ngge pen-tugu go sogo, motnang go dabui ba u lo mo tram. 7 No, gabe pu-situgu, “Motnang nogo, Genam klong go-a, suey. Seni so, Genam kua klong go, tebok genang sogo Wali Waglo mea kua weng. No, Genam klong go, Nemot-a Genam lo mot-dak go mea li. 8 Nemot li gono, kuklik go sikabung nogo, kuklue senong genang; seni eygo nemudi sogo senong genang; kisebui senong genang, Wali Waglo lo mea nguok. 9-11 Yangga:
- kuklue go nuik: Genam no dabui iti go kua kekeng go;
- seni eygo nemudi sogo nuik: Ki Wali Iram lo Genam wawi go mo yang. Tandali motnang logo mea kua ikum.
- Kisebui go nuik: kukunan ta so mlak go Kupiamgo, kisebui mo taling.”
12 Se senong: motnang no pen genang nebutmang temu, miam ey gabe. No, nggeasui go, nebut ngga mlak go maning motnang yakua lek. 13 Seni eygo tap, Wali Waglo-a gemang senong. Nemot li gono, motnang nogo seni-a mea taling. Nemot lo tetaling go tap, Nemot tang go duduing lo, yakua. No, Ki Wali Aya lo mot-dak go-a, mea pen. Nggano, yansi go ku no lemoy genang naklay, Nemot lo mea ngap. 14 Genam sik so tup go-a motnang no pepen golo, blo sono go Genam iway Wali Waglo lo mea iti. 15 Yang! Ki Wali Iram go blongdon naklay ngga, Genam go gabe. Ngganemot sogo so pen-atu go, “Genam sik so tup go-a, Wali Waglo lo gemang pepen.”
U kluo go blo idi lo yakay mea pung
16 Nemot go andua-andua sono ngge kalik Yesus lo gemang pen-tenawon, “Ku tebot ngge ba no, Genam motnang logo mea kua ikum. No, walong kua luik gono, tandali Genam mea ikum-kelo.”
17 Nebut ngge tup gono, way-way so andua-andua temu lo gemang usi-netenawon, “Nebut ngge nemot go seni sogo piam? ‘Ku tebot ngge ba no, Genam motnang logo mea kua ikum. No, walong kua luik gono, tandali Genam mea ikum-kelo. Ki Wali Iram mit no Genam gabe koklong!’ 18 Nggano, ‘Ku tebot ngge ba no’ ngga, nemot go seni sogo piam? Imot kua senong go. Sogo so pen-awon?” 19 Kunala ngga kalik Nemot go andua-andua lo duduing go, Yesus mo senong. Way so Yesus lo pen-nawon go, “Motnang nogo Genam mo pen, ‘Ku tebot ngge ba no Genam motnang logo yakua ikum. Nggano, walong kua luik gono, tandali Genam mea ikum-kelo’ Ngganemot senong genang so sok-ketogoy?”
20 Se tup! Gabe pen-asitugu, “Genam kebong go sogo sikebong u kluo-kelo go, no, ku klik ba sogo sikabung-a yakay mea tra. Nemot-a dabui sadui ey motnang tra gono, mesip so dabui ba yakay-a way so mea pung. 21 Yatrang ngge-a se duing: kabung duo tui sogo, kuom iseng ey, u kangok so mea kluo. No, duo tui gono, iseng nogo tandali go kua duing. Seni so, kukunan blo no denok dato li go nogo, way so yakay-a mo pung-natun. 22 Ngga kalik motnang mea tra dali: nggeasui go, u mea kluo-kelo, no, motnang ey tandali Genam tegu gono, tandali dabui ba nogo yakay mea pung. Yang! Yakay ngganemot, sikabung meno logo yakua suep. 23 Ku ngganemot nogo, Genam sik so, sogo-sogo ya kua usi. Gabe pen-asitugu, ‘Ki Wali Iram sono, Genam go sui no sogo-sogo-a motnang usi go, Nemot lo mea iti.’ 24 Nggeasui go ku nogo sogo-sogo, Genam go sui no maning motnang kua usi gabe. No, nggeasui go se usi! Ngga ey, motnang nogo Ki Wali Iram lo mea iti. Motnang go dabui ba nogo yakay, kangok so mea pung.”
Andua-andua nogo benuey sogo tandali kua pen
25 Andua-andua no Yesus lo gemang pen, “Nebut ngga naklay, benuey so Genam lo mo pen. No, ku santugun go nogo, benuey sogo tandali mea kua pen-srelu. No, Ki Wali Aya go nebut seni-a nemudi so motnang nogo Genam lo mea pen. 26 Ku ngganemot nogo, Genam go sui no, sogo-sogo Ki Wali Iram sono motnang lo wadong go, motnang sogo dewi tandali go Genam lo yakua pu. 27 Genam nogo klum tra go, nggano, Ki Wali Iram sik so Genam weng go, motnang lo keng go tang so, motnang nogo gualaklum Ki Wali Iram logo gabe pupung. Ngganemot sogo so motnang lo uwadong go dewi Nemot tang so mea tup. 28 Se senong: Ki Wali Iram sik sogo, kukunan kuklik go ba sono Genam mo li gabe. Nggeasui go, kukunan ngge mea itak-lu. Tandali Ki Wali Iram sono, Genam mea klong.”
29 Nebut ngga naklay tup gono, ngge kalik Yesus go andua-andua lo gemang pu-nenawon, “Suey dato! Nggeasui go seni-a, Mot mo pen-ato! Tandali benuey-a kua pen-sreto. 30 Nggeasui atnang ikum go, kunala naklay Mot lo mo senong. Maning genamnang lo kua usi gono, Mot lo naklay mo duing. Ki Wali Iram sik so Mot li go, dabui lo atnang gabe kekeng!”
31 Way so Yesus lo gemang pen-nawon, “Yang! Nggeasui go, Genam no dabui lo motnang gabe kekeng. 32 Kua kay! Ku tebot ngge ba no ngge mea lemoy: banom-banom sikabung suali so, motnang suep go, Genam-a banom mea itak. Nggeasui go gabe ya lemoy. Yang! Banom go Genam ya kua itak. Genam ey klay gono Ki Wali Aya gabe. 33 Banim nebut ngge naklay Genam lo pen go, ngengam yakay Genam sik sogo motnang lo wawi genang. Kua kay! Kukunan nogo sikabung logo koywong, motnang mea lelek. No don ey motnang-a se suing. Ngga ey, Genam sono go-a se duing: kukunan kuklik go don, Genam lo mo pedueng gabe.”