15
Anggul nuik seni Genam gabe
1 Yesus lo pu go, “Anggul nuik seni Genam ngge, gabe! Usu wengkabui, Ki Wali Aya-a gemang. 2 Anggul go kali At temoy no wo go, seni kua go, Ki Wali Aya lo mea ibot. Nggano seni ey tetagot go kali-a, suey so bat mea kebuo. Ngga ey, miam ey seni but genang. 3 Suey so Genam go demutrui no keng go tang so, motnang-a teguop so mo kebuo gabe. 4 Genam temoy no motnang sebut go, Genam sik so wali motnang no mea degut. Seni so, kali tang go, banom sogo seni yakua tagot. Klaya goso Genam ey ngga kalik motnang susuing go-a, seni mea tagot. Kua susuing go yakua. 5 Yang! Anggul nuik seni Genam ngge gabe. Anggul go kali-kali motnang gemang. Klay goso Genam ey nando susuing go, nemot ey klay goso Genam mea suing. Seni miam ey mea tetagot. Seni so, Genam ey kua go, sogo-sogo motnang logo ya kua semu. 6 Se senong: Genam ey klay goso kua susuing go, di kali kalik, banom betep go, mea newi. Ngga kalik go kali-kali, kebali sedue lo yaluim go, koy ba sono tega go, puit go mea kuim. 7 Klaya gono Genam ey motnang susuing go, Genam logo demutrui dabui ba so gigit go, sogo so motnang lo duduing go, Ki Wali Iram sono wadong go, motnang nogo ngga naklay mea lemoy. 8 Seni miam ey, motnang tagot go, nggano Genam no dabui iti go tupduk keng go andua-andua so pu go, Ki Wali Aya go blongdon mea leguit.”
Tupduk kekeng sik so klum pung go
9 Yang! Genam nogo Ki Wali Aya lo klum go kalik, motnang nogo Genam lo mo klum-sanyu gabe. Klum ngganemot ba seguong no, motnang se uwali. 10 Genam go demutrui no tupduk keng go, Genam go klum ba so motnang mea susuing. Se duing: Ki Wali Aya lo iwat go-a tupduk so Genam lo gabe ya pluok dali. Ngga ey, Nemot go klum ba lo Genam gabe.
11 Nebut ngge naklay Genam lo pen go, motnang ba nogo Genam go nenem yakay gigit genang. Yang! Yakay lo motnang mea tram. 12 “Ngge, Genam logo demutrui gabe, ‘Motnang no Genam lo taling go kalik, way-way so klum se pupluok.’ 13 Andua-andua wali genang so wali itak go, kebong go, ngga, klum kangok dega. 14 Genam lo mot-dak go-a, tupduk kekeng go, Genam go andua motnang-a gabe. 15 Koybutasemu so motnang Genam lo kua usi gabe. Se senong: wengkabui lo duing go, koybutasemu logo yakua senong. No, Ki Wali Aya go duduing, Genam lo tup go, motnang sono naklay mo ngap gabe. Ngga ey, andua so motnang Genam lo gabe pupu. 16 Kua kay! Genam-a motnang lo kua kuoy. No, motnang-a, Genam lo kuoy go, Genam lo mot-dak go koklong go, miam dega ey tasam-tasam tagot genang. Yang! Tasam ngga go seni, senang so se gigit. Genam go sui ba no, Ki Wali Iram sono uwadong go, motnang nogo Nemot lo mea iti.
17 Ngge, motnang nogo Genam logo demutrui gabe: way-way klum-a motnang se tetaling!”
Blong duo ya nogo kukunan sikabung dabui ikle ey
18 Andua-andua no Yesus lo pen go, “Motnang no kukunan sikabung lo dabui ikle go, ngge-a se duing, ‘Banim Genam sono go dabui ikle, nemotnang lo mo taling gemang.’ 19 Kukunan sikabung ey motnang klay goso go, dabui lo motnang nogo klum gemang. Nemotnang lo duing go, ‘Motnang ngge, atnang go tete gabe.’ No, kukunan sikabung, motnang kua. Kukunan sik sogo motnang Genam lo wawi go mo pung. Ngga tang sogo so, motnang nogo kukunan sikabung dabui gemang ikle! 20 Pen-ayu go nebut ngge kua kay, ‘Wengkabui-a koybutasemu logo yakua kenok.’ Genam nemotnang lo inya go, motnang nemotnang logo mea inya dali. No, Genam go nebut nando lo tupduk keng go, mot go nebut nogo nemot-a tupduk go mea keng dali. 21 I-inya go ngga, Genam tang sogo so lemoy go gemang. Genam so mot-dak go Ki Wali Iram, nemotnang kua senong sang. 22 Yang, Genam walinebut pen sogo kua weng go, nemotnang go piam konkebamling nogo idekeba ya kua taling. Nggeasui go, Genam weng go deguo teguop pen go, nemotnang lo mo wayang. Ngga tang so, piam konkebamling nogo idekeba gemang. Nebut way nemotnang lo yakua tenguo. 23 Genam so dabui ikle go, Ki Wali Iram nogo dabui nemot lo gemang ikle dali. 24 Se senong: saula meno nogo ey kua kerlam go tasam kangok go, nemotnang nesip no At lo mo taling. Tasam ngga taling go kua ikum go, nemotnang piam kua. No, nemotnang mo ikum. Ngga ey, Ki Wali Aya, Genam eygo nogo dabui-a ne ikle. Ngga tang so nemotnang nogo idekeba gemang. 25 Ngga kalik lemoy go, nemotnang go demutrui no mo klik, ‘Genam sono dabui nemotnang lo ikle go, demu kua.’
26 Se senong: Motnang no tebok genang Wali Waglo Ki Wali Aya sik sogo, Genam lo mot-dak go mea weng. Seni eygo min Nemot-a gabe! Genam sogo nebut nemudi so Nemot lo mea tetaling. 27 Andua-andua, Genam sogo nebut motnang logo se pepen klong dali! Se duing: keduong sik sogo, Genam ey motnang mo suing.”