27
Gubernul Pilatus go ta sono Yesus itak go
1 Ku yam so se boblong, taiti so puit go trang-trang, Yahudi go iram-tegay naklay yaluim go, Yesus kebong genang so gemang pu-nenawon. 2 Yesus dok go, Gubernul Pilatus a mit sono nemotnang lo wawi go gemang klong.
3 Ku ngganemot dali no, Yesus kebong genang idekeba tup go, dabui ba lo klum klaysedue Yudas lo gemang tra-nawon. Ngga ey, nemot no iti go duoy 30 perak ngga, taiti so pupuit go trang-trang ey iram-tegay eygo sono gemang iti-nawon. 4 Ngge kalik gemang pu-tenawon, “Piam, genam lo mo pluok. Kuklue kua go sedue but go kebong genang so tebadali genam lo mo itak.” No, way so nemotnang lo pu go, “Atnang, ngga kua senong-wa. Ngga, mot go ba so!” 5 Ngga ey, duoy ngga Ki Wali yap ba sono tandali tega gono, Yudas kap go, tegan no glung go, blindon pang go, gemang kebong-dapnawon. 6 Taiti so pupuit go trang-trang lo duoy ngga yaluim gono ngge kalik gemang pu-netenawon, “Ki Wali Iram nogo taiti so tui go sip no duoy ngge kua tui. Ngge kin duoy gabe.” 7 Nemotnang nebut pu-nenawon gono, nan meno duoy ngganemot lo iti-nenawon go, saula meno sikabung kebong go, nan ngganemot no tuet genang. Seni so, nan ngga saulakabui so semu go sedue tete sogo sip. 8 Yang! Yesus go kin eygo duoy lo iti goso, nan ngganemot so pupu go, ‘Kin eygo nan.’ Nggeasui go sui ngga maning gemang pupu. 9-10 Ngga naklay wengkabui-wengkabui lo pluok go, ngge kalik nabi Yeremia lo pen go ey gabe kerlam,
“Nemotnang duoy 30 perak yaluim gono,
duoy ngganemot lo saulakabui so semu go
sedue go nan gemang iti. b
Seni so, sikabung Israel temu lo duing go:
ngga kalik duoy lo Sedue iti go ngga nemot!” ( Zakharia 11:12-13)
Gubernul Pilatus go nemuku no Yesus ip go
11 Gubernul go nemuku no Yesus wawi go gemang ip. Nggano, Yesus no Gubernul lo gemang usi-tenawon, “Mot sikabung Yahudi go Iram?” Way so Yesus lo pu go, “Mot tang so pu-nato go.”
12 No, taiti so pupuit go trang ey Yahudi go iram-tegay eygo lo Yesus neyboy genang kuklue nebutpen go way, Yesus kua tenguo-srenawon. 13 Ngga ey, ngge kalik Yesus sono Pilatus lo gemang pu-nawon, “Mot go kuklue so, sedue ngge lo pepen go, kua tup-setogoy?”
14 No, nebut way klayanang go kuklue sogo nebut nogo, Yesus kua tenguo-srenawon. Ngga ikum go, Gubernul Pilatus ta wasrang ey gemang glok-nawon.
15-18 Nemot-a, Gubernul mo senong, “Sedue ngge kuklue kua, no Yahudi go iram-tegay dabui ikle tang so Yesus mo iti ba.” Ngga tang so, nemot mo mlay go kalik, walop sogo no sedue klaya ta itak genang, Yesus-a taitak genang so, sikabung ibe sono nemot lo gemang usi. Ibe lo kuoy go-a mea itak. Ku ngganemot nogo sedue klaya meno gemang, tabat kangok dega go nemot lo mo pluok. Nemot go sui: Yesus-Barabas. Gubernul go seboy no yaluim go sikabung ibe sono Pilatus lo gemang usi-siwon, “Motnang lo duing go, nando-a ya itak? Woy Dem so pu go Yesus-a? Yesus-Barabas-a?”
19 Woy ngganemot nogo, Yesus neyboy genang so, Gubernul Pilatus sipsuing blo no suing gono, ngge kalik senun logo nebut gemang pung-anatun, “Aya! Sedue ngga neyboy genang, mot ey kua tebok. Wadi go sedi ba no, Sedue ngga tang so, genam nogo iseng kangok so gabe taling.”
20 Piliatus senun go nebut maning duduing go nogo, taiti so pupuit go trang-trang Yahudi go iram-tegay eygo lo sikabung ibe nebut lekok go, Pilatus nogo ngge-a se plong, “Barabas-a itak gono, Yesus-a kebong genang so se iti!” 21 Way so Gubernul lo usi-tenawon, “Motnang lo duing go, nando-a ta ya itak?” Way so ibe lo wa go, “Barabas-a ta se itak!” 22 Nggano, nemotnang no Pilatus lo pu go, “Ngga kalik go, tegadi so Ki Wali Iram lo dok go Iram so pu go Yesus, sogo-a ya pluok-kelo?” Way so, sikabung ibe naklay lo wa go, “Nemot-a di no se glung!”
23 Tandali Pilatus lo usi go, “Esang! Sogo kalik go kuklue Nemot logo pluok-yom goso di nogo ya glung-kelo ne?” No, way so kangok dega so gemang bega-netenawon, “Nemot-a, di no se glung!” 24 Kamso Yesus itak genang tap, Pilatus lo wet go, no seni kua ikum. Sikabung ibe go nemuku no, ta bu-a Pilatus lo gemang ulu-nawon go, ngge kalik gemang pu, “Sedue ngge go kin nogo piam, genam yakua keng gabe. Ngga, motnang go idekeba gemang.” 25 Nggano, ngge kalik sikabung ibe lo gemang pu-nenawon, “Nueya, Nemot go kin atnang ey, atnang go duo eygo blo no mea glung lo!” 26 Sikabung ibe nogo so Barabas-a gemang itak-nawon. No, demun-a Yesus inya genang so Pilatus lo gemang pu. Nggano, di no glung genang, iram-tegay go ta sono gemang itak.
Nebut wayang Yesus so pen go
27 Nggano, Gubernul go plesedue lo Yesus wawi go, Roma go nebut so neyboy go saliyap kangok gono, gemang degut. Ngga ey, Yesus wok plesedue naklay weng go lo, gemang teguot-nenawon. 28 Yesus go amka kangok go nemotnang lo sok go, Iram no ta so kong genang kalik, amka kibam suk sogo lo way so kebet-nenawon. 29 Ngga ey, baling wong logo betokut nemotnang lo semu go, Yesus go wengkabui no gemang kut-nenawon sang. Iram ta so mlak go kalik bluim tebot-a gemang iti-nenawon.
Ngga ey, Yesus go masi ba no nemotnang segabuem unuik go, Iram no ta kokong go kalik, wayang-netenawon. Ngge kalik gemang pu, “Sikabung Yahudi go Iram dega! Suey lo!” 30 Nggano nglabui lo gemang suop-netenawon. Ngga kalik semu-neton, Yesus go ta ba sik sogo bluim iti go, Nemot go wengkabui temoy no but-netenawon ne. 31 Nemotnang wayang tasam ngga yam so semu gono, amka kibam suk sogo ngga, Yesus go saysuk sik so sok go, Way so Nemot go amka-a kok gono, wawi go, dia sono pung go Nemot di no glung genang so gemang klong.
Yesus di no glung go
32 Kota sik sogo nemotnang pung go, dia sono koklong gono sedue meno nan Aprika yakena Kirene sik sogo, nemot go sui, Simon gemang tegu. Sedue ngga, Yesus logo di lek genang so nemotnang lo gemang plong-nenawon.
33 Ngga kalik nemotnang koklong, e... sip meno, nemot go sui, Golgota no gemang pung. Golgota go seni: ‘Wengkabui don uluong.’ 34 Ngga ey, anggul bu bete eygo yung go iseng yakua tra genang so, Yesus sono nemotnang lo gemang leguit. No, tra-nawon go, Nemot moyso, kua drop-srenawon. 35 Di no Yesus glung-nenawon gono, Nemot logo amka ngga wasey genang so demu-a nemotnang lo tega go, gemang i-nenawon. 36 Yesus yay sogo, plesedue ngga lo gemang got-netenawon. 37 Ngga ey, Nemot go wengkabui blo di pap temoy nogo sam, Yesus but go nuik-a gemang tegak-nenawon, “Ngge, Yesus! Sedue Yahudi go Iram gabe.” 38 Ambledante namon Nemot ey kerlam so di no gemang tegak dali. Meno ta semlea idi no, meno ta kali idi no.
39 Ngga koklong go sikabung, nemot sono susu ngonglok-a ey gemang uwayang, 40 “Ye! Ki Wali yap togut go, ku nangglik ba no tandali buong genang. Mot seni so Ki Wali Iram go Danon mo, mot tang sogo pu go, Mot go saysuk sesuoy ya! Di ngga blo sik so li-kundo!” 41 Nebut wayang ngga kalik dali, taiti so pupuit go trang-trang ey, Musa logo demutrui so nguok go klui ey, Yahudi go iram-tegay eygo naklay logo, gemang wayang-netenawon, 42 “Sikabung meno-a sesuoy go. No, Nemot go saysuk tang go sesuoy genang ya kua ne. Nemot Israel go Iram seni sogo, di ngga blo sik sogo se li-kunyon! Ngga lemoy go tang so imot naklay Nemot no mea keng. 43 Yang! Nemot tang golo pu-yom go, ‘Genam ngge Ki Wali Danon gabe.’ Ki Wali Iram no dabui lo Nemot mo keng go, yatrang ya ikum-eyon: nggeasui Ki Wali Iram lo iwat go, idekeba sik sogo, Nemot ta ya itak-yon, ya kua?” 44 Esang! Nemot ey kerlam so di no glung go ambledante lo, ngga kalik gemang wayang dali.
Yesus kebong go
45 Ku ngganemot wabedong go, sip ngga naklay woy 12 sik so ku klik kekayso go, e... use go woy nangglik no. 46 Woy nangglik no pung gono, Iblani nebut so ngge kalik Yesus lo gemang bega-nawon, “Eli, Eli, lama sabaktani?” Nemot go seni: “O, Ki Wali Aya! O, Ki Wali Aya! Sogo so Genam-a banom itak-to?” c 47 Sikabung ngga so suing go nebut ngga tup-nenawon gono, ngge kalik gemang pen-netenawon, “Tup-a! Nemot tebok genang so, Nabi Elia d so usi-biton go.” 48 Kayseguong, nemotnang sik sogo klaya duo weng go, spon iti go bluim no glok go, anggul bete eygo no suik go, Yesus lo suop genang so gemang leguit-biwon. 49 No, sedue temu lo pu go, “Nueya! Imotnang nemu ya luik go! Nabi Elia weng go, di sik sogo Nemot ya tebuo-yon?” 50 Nggano, tandali kangok so Yesus lo bega-biwon go, nebuemnebit itak-biwon go, gemang kebong.
51 Se senong! Woy ngga dali no lemoy-anatun go:
- Ki Wali yap sogo teguop sip ba no glung go amka kangok go, blo sik so nesip lo tegek go;
- kuysu kangok go kekayso lek go;
- meduim-meduim ey gemang tegek-anatun.
52 Ngga ey, banim mo kebong go blong duoyap gemang nglong-sing. 53 Yesus nglong gono, Yerusalem teguop go sono nemotnang gemang degut-lak. Sikabung miam ey golo nemotnang mo tegu.
54 Yesus yay so got-netenawon go sedue ey plesedue wengkabui ey, kuysu kangok so lek go, tasam-tasam ngga lemoy go ikum go tang so, suali kangok so gemang tra-nenawon. Nggano, ngge kalik nemotnang lo gemang we-netenawon, “Yang! Ngge, Ki Wali Danon seni gabe!”
55 Se senong: kabung-kabung nan Galilea sik sogo Yesus no tebok genang so keng go uwet go, ket sik so nemu-a ngga so gemang bubung. 56 Nemotnang eygo, Maria Makdalena, Maria Yakobus ey Yusup eygo unen, Yakobus ey Yohanes eygo unen, Sebedeus senun.
Yesus mu ba no tui go
57 Ku se kiklik, yakena Arimatea sik sogo taut mata sogo sedue, Yusup dem, gemang pung dali. Yesus no dabui lo keng go sedue so Yusup mo lemoy dali. 58 Nawon go, Pilatus ey tegu go, Yesus temoy tebuo genang so gemang wadong-nawon. Nggano, Yusup sono Yesus temoy tebuo genang, Pilatus gemang yang-nawon. 59-60 Ngga ey, Yesus go temoy Yusup lo iti go, amka lenan klaut demening golo gemang pok. Nggano, Yusup tang go tui genang so mu inim pung go ba no, Yesus temoy gemang tui-nenawon. Demuput ngga demu kangok golo wik go, sip ngga itak go, tandali yap no nebewon.
61 No, Maria Magdalena ey, Maria meno eygo-a Yesus tui go simu mit so gemang got-natun.
Yesus tui go simu yay suing go
62 Ku Jumat nogo, Ki Wali Iram go ku Sabat nang sogo taut naklay, dali-dali sikabung Yahudi lo gemang sesemu. Use go taiti so pupuit go trang-trang dega ey sedue Parisi eygo Pilatus sono gemang weng. 63 Nggano, gemang we-netenawon, “Aya! Atnang kekayso mo duing: wamoymlue eygo Sedue ngga maning kua kebong gono, ngge kalik Nemot lo pu go, ‘Ku nangglik tete no tandali Genam mea nglong.’ 64 Ngganemot sogo so, ngge suey, simu yay suing genang plesedue ya taling! Nemotnang lo yay suing go, e… ku nangglik tete no se pung. Yay kua suing go, Nemot go andua lo weng-lak go, wom so temoy mea iti. Ngga ey nemotnang lo mea pepen, ‘Ku nangglik tete no tandali Yesus mo nglong.’ Wamoymlue sogo nebut ngga go don, banim no Nemot lo pu-yom go, ‘Tegadi so Ki Wali Iram lo dok go Iram, Genam gabe’ ngga ey mea kua kerlam. Nemot go andua-andua lo mlue genang, don dega ey mea.” 65 Nggano, ngge kalik so nemotnang no Pilatus lo gemang pu-nawon, “Yay suing genang plesedue motnang go ta ba no gabe i-itak! Klong go motnang go duduing no se pluok-kenalo.” 66 Nggano, nemotnang klong go, Yesus so tui go demu put sebendi ey ketok go, won ey gemang glung. Ibe senong genang, ngga sono go ya kua degut! Nggano yay suing genang plesedue lo tebok-nenawon dali.