23
Gubernul Pilatus sono Yesus wawi go
1 Nebut way Yesus lo pu go ngga tup-nenawon go, iram-tegay naklay ip-lak go, Yesus wawi go, Gubernul Pilatus a sono gemang klong. 2 Pilatus damoy so, tanat go, gemang pen-netenawon, “Sedue ngge kuklue mo pluok. Yangga:
- tap suey golo koklong blung, tap mo paysing;
- Kaysar Roma nogo blasteng kua iti genang-a mo taling;
- Nemot tang so pu go: tegadi so Ki Wali Iram lo dok go Iram, Genam gabe.
Ngganemot sogo so, Nemot atnang lo mo mlak.” 3 Ngga ey, Pilatus lo gemang usi-nawon, “Sikabung Yahudi go Iram Mot ngge?” Yesus lo wa go, “Mot tang so ngga pu-santo go!” 4 Yesus lo wa go tup gono, taiti so pupuit go trang-trang dega ey, sikabung ibe eygo sono Pilatus lo pu-nawon go, “Sedue ngge nogo idekeba taling genang kuklue, Genam kua ikum-sretu!” 5 Ngga tup gono, don ey iram-tegay lo tenguo go, “Kua! Sikabung naklay nogo, tap piam go-a Nemot lo mo nguok. Galilea sik so iti go, Yudea nogo, ngge nogo mo pung dali.”
Herodes sono Yesus wawi go
6 Nebut ngga tup gono, Pilatus lo gemang usi-nawon, “Mot ngge, seni so, nan Galilea sedue?” 7 Yesus Galilea sik sogo, Pilatus senong go, gemang we-tenawon, “Deguena Herodes sono Sedue ngge wawi go se klong! Nan Galilea ngga, Herodes lo tamlak go.” Ku ngganemot nogo deguena Herodes yakena Yerusalem so.
8 Yesus ikum go, Herodes yakay kangok. Yesus sogo deguo da mata so deguena Herodes mo tup. Ku walong so, Yesus ey tegu so nemot mo bung. Nemot lo duing go, “Tasam kangok go Yesus lo taling go, mea ikum-lu.” 9 Ngga tang so, Yesus sono walong bata so gemang usi-tenawon. No, nebut way, da klayanang go Yesus kua tenguo-srenawon. 10 Ngga sogo taiti so pupuit go trang-trang dega ey demutrui so nguok go klui-klui eygo lo don ey ta gemang nat-nenawon. 11 Ngga ey, deguena Herodes ey plesedue eygo lo Yesus gemang wayang. Rlam nang so, iram go amka-a Yesus no kut-nenawon go, Pilatus sono wawi go gemang nenawon. 12 Se senong: ku ngganemot no, gubernul Pilatus ey deguena Herodes eygo, andua so tandali go gemang tegu. Nemot-a, banim go kuno-woyno plesi-a pupluok go.
Yesus nogo idekeba pu go
13 Ku ngganemot no, taiti so puit go trang-trang dega ey Yahudi go iram-tegay ey sikabung ibe eygo no Pilatus lo gemang pu, “Tandali ngge sono se yaluim!” 14 Ngga ey, ngge kalik Pilatus lo gemang we-nawon, “Genam sono Sedue ngge wawi go weng gono, motnang lo pu go, ‘Blung nogo paysing genang tap-a, Sedue ngge lo mo nguok.’ No, motnang damoy so genam lo neyboy-tu go, klayanang go kuklue kua ikum-sretu. 15 Ngga kalik dali so deguena Herodes logo mo duing. Nemot lo pu goso, tandali Yesus ngge sono gabe weng. But go kebong genang kuklue klayanang go Sedue ngge logo kua semu. 16 Ngganemot sogo so, demun-a suey go, itak go se klong!”
17 [Seni so, walop Paska nogo, Pilatus logo, sedue klaya, boy ba sik so, sikabung nogo so, mea itak go klong.] 18-19 Se senong: sedue meno gemang, nemot go sui: Barabas. Yakena sagui pung go, sedue but go sogo so, nemot ngge amble lo boy ba no betep go. Ngga ey, ngga sogo sikabung lo gemang bega-netenawon, “Yesus-a but go kebong-a! Barabas-a, itak go se klong!” 20 No, Yesus-a itak genang so Pilatus mo duing. Ngga tang so, tandali sikabung sono nebut gemang pen-asiwon. 21 No, way so tandali-tandali sikabung lo bega go, “Di no Nemot-a se tegak! Di no Nemot-a se tegak!” 22 Nggano, da nangglik tete sogo, ngge kalik Pilatus lo gemang usi-nawon, “Esang! Nemot go kuklue sogo kalik ne? Nemot kebong genang kuklue kua ikum-sretu go se! No, demun-a suey gono, itak go se klong.” 23 No, Yahudi go woy-woy ey sikabung ibe eygo lo don ey gemang bega-netenawon, “Di no Yesus-a tegak go se kebong!” Yang! Don dega ey nemotnang lo bebega go-a gemang lemoy. 24 Sikabung go duduing no, idekeba Pilatus lo gemang pu-nawon, “Ngga kalik go Yesus nase kebong.” 25 Nemotnang lo pu go kalik, Barabas-a, itak go gemang klong. Nemot-a sagui pung goso sedue ey but go. Nggano, ibe go duduing no, Yesus gemang itak.
Di no tegak genang so Yesus wawi go
26 Ngganemot no Yesus nemotnang lo wawi go, gemang klong. Tap koklong gono, Simon yakena Kirene sik sogo, Yerusalem no se pupung, plesedue lo mlak go, ta lo Simon plong go, Yesus go di lek go, Yesus sono gemang keng. 27 Yesus no sikabung mata sogo nsrung-nsrung ey keng go gemang koklong. Kangok so kabung temu lo u ey kluo-situgun, Yesus dabuiklum duing goso. 28 No, taton sono Yesus lekek gono, gemang pu-tenawon, “Yerusalem sogo debui sop! Genam sogo u-a kua kluo! No, mot tang go ey, motnang logo duo u-a se kukluo! 29 Se senong: ku pung-ayun go mea pu-netogon, ‘Duo kua tui go kabung, duo min kua kok go-a suey!’ 30 Ku ngganemot nogo, suali sogo so ngge kalik mea pu-netogon, ‘Kumeduim, genam blo sono tenuing go mot pui kundo-a, genam puem genang!’ b 31 Yang! Di kiki go, ngge kalik semu-ketogoy go, di newi go nogo, sogo-a ya lemoy? Esang!”
Yesus di no tegak go
32 Ngga ey, sip klaya gono Yesus ey tegak genang so ambledante namon ey wawi go gemang nenawon dali. 33 Sip ngga no pung go, Yesus ey ambledante namon ey di sono nemotnang lo gemang tegak. Meno tasemlea idi no, meno-a takali idi no. Sip ngga go sui: ‘Wengkabui don uluong.’ c 34 Ngga ey, dewi ngge kalik Yesus lo gemang pu-biwon, “O, Ki Wali Aya! Nemotnang go kuklue se suep sang! Seni so, nemotnang lo pluok go seni nemotnang kua senong gemang!” d
Amka wasey genang so undi-a plesedue lo, gemang betep-nenawon. 35 Yesus idekeba taling go, sikabung mata so gemang ikum-netenawon. Nggano, Yahudi go woy-woy lo gemang wayang-netenawon, “Yang, Nemot sikabung meno-a itak go. Nemot seni so tegadi so Ki Wali Iram lo dok go Iram sogo, Nemot tang so saysuk pu go, suey so se sesuoy!” 36 Roma go plesedue logo Yesus gemang wayang-nenawon dali. Anggul bete eygo-a, nemotnang lo Yesus no gemang leguit. 37 Ngga ey, gemang we-netenawon, “Seni so, sedue Yahudi go Iram sogo, Mot se li-kundo!” 38 Se ikum: dipap temoy no Yesus go wengkabui blo no, ngge kalik go sam gemang klik,
“Sedue Yahudi go Iram, ngge gabe!”
39 Di temoy sogo ambledante meno lo ngge kalik gabe wayang dali, “Tegadi so dok go Iram Mot seni sogo? Mot go saysuk ey, atnamon eygo sesuoy ya!” 40 No, ambledante meno lo pu go, “Mot, Ki Wali Iram nogo suali kua? Mot go idekeba Nemot ey mo kerlam! 41 Imotnamon go tabat tang so, idekeba ngge seni so gabe iti. No, tabat piam go Sedue ngge logo kua pluok. Tebadali idekeba iti go, sang!” 42 Ngga ey, ngge kalik gemang pu-sawon, “Yesus! Blongdon ba no Iram so Mot tamlak go nogo, genam kua kay, sang!” 43 Ngga ey, way so Yesus lo pu go, “Nggeasui go, Genam ey, blong dia yakena e mot gabe!”
Yesus kebong go
44 Ngga temu ey, wabedong go, kekayso woy kenip go, nan seding no seding no ku gemang klik-anatun. E... woy nangglik use tandali gemang blong. 45 Woy ngganemot nogo, Ki Wali yap ba nogo tasam ngge gemang lemoy: Teguop sip no glung go amka kangok go, nesip lo gemang tegek-anatun. f 46 Ngga ey, ngge kalik kangok so Yesus lo, gemang bega-nawon, “O, Ki Wali Aya! Mot go ta ba sono, At go Waglo gabe iti-bitugu!” Nebut ngga pu gono, nebuemnebit itak go gemang kebong. g
47 Tasam-tasam ngga, plesedue wengkabui ikum go, Ki Wali Iram nogo, takong gono, gemang pu-tenawon, “Yang! Ngge, seni eygo Sedue so Ki Wali Iram lo yang go gabe.” 48 Yesus ikum so weng-lak go sikabung, dabui ba u ey tandali yap sono gemang klong. 49 Yesus senong go sikabung naklay ey, Yesus no keng go uwet go nan Galilea sik sogo kabung-kabung ey, ket so ip go ngga naklay gemang ikum-nenawon.
Simu ba no Yesus tui go
50-51 Ngga sogo sedue meno gemang. Nemot go sui: Yusup, nan Yudea, yakena Arimatea sik sogo. Nemot Yahudi go woy meno dali. Seni so, Yahudi go iram-tegay naklay Yesus tanat genang so pluep go nogo, nemot mo pung dali. No, Yesus but genang kunala, kua yang-srenawon. Yang! Ki Wali Iram lo iwat go sedue nemudi sogo, nemot gabe. Woy Wali Iram tamlak go blongdon duduing nemot lo gabe bubung dali. 52-53 Pilatus sono nemot klong go, Yesus temoy gemang wadong-nawon. Ngga ey, di blo sik sogo Yesus temoy tebo go, amka lenan lo pok go, demuluk demening pung go ba no gemang tui-nawon. Sikabung temoy ngga nogo maning kua tui.
54-55 Se senong: Ku ngganemot nogo, Ki Wali Iram go ku Sabat nang sogo taut, dali-dali sikabung Yahudi lo gemang teta. Use go, ku Sabat sono maning kua pung gono, Yusup Arimatea no, Yesus ey nan Galilea sik so weng go kabung-kabung gemang keng. Demu luk ba no Yesus tui go ikum sogo so. 56 Ngga naklay ikum gono, tandali klong go, Yesus go temoy ut genang mlay, didop kinemon eygo ikak go, dali gemang semu-natunlak. Ku Sabat pung go nogo, demutrui no pu go kalik, kebali yakua semu.