24
Yesus tandali nglong go
1 Ku minggu wadikua seni go, mlay, didop kinemon eygo ngganemot idok go, simu Yesus so tui go sip no kabung ngga gemang natunlak. 2 Simu no pung go, se ikum! Demuput so ketok go demu bata dega, ketang sono mo rlo. 3 Ngga ey demuput ba sono degut-lak go, Yesus temoy kua ikum. 4 Yam so kuikui-lak go, amka idop-idop eygo sedue namon-a nemotnang mit no kekayso gemang ip-klenawon. 5 Nemotnamon ikum gono, saduibong ey pling go, ta lo kabung-kabung ngga go nebuemnemu gemang kebet. Ngga ey, sedue namon lo pu-klenawon go, “Kebong go sip no kiki sogo sedue-a, sogo so wet-ketogoy? 6 Ngge sogo Nemot kua gabe. Nemot Ki Wali Iram lo mo nglong! Maning nan Galilea sogo no Nemot lo pen go-a, se duing! 7 Ngge kalik so Nemot lo mo pen, ‘Sikabung kon eygo ta sono Blong Dem iti go, di no glung-neyon go, ku nangglik tete no, Nemot tandali se nglong!’ ” 8 Ngga ey, Yesus lo pen-nayom go nebut ngga, kabung-kabung ngga gemang duing-natunlak.
9 Simu sik sogo yap sono tandali gemang natunlak. Ngga ey, Yesus lo kuoy go andua 11 ey, andua temu eygo no, simu no lemoy go pen genang. 10 Nebut ngga so pen go kabung: Maria Magdalena, Yohana, Maria Yakobus go unen, nggano, kabung temu, nan Galilea sik so nemotnang ey weng go. Naklay lemoy go ngga, Yesus lo kuoy go tamot nogo, suey so nemotnang lo gemang pen. 11 No, tamot-tamot lo duing go: ngga kabung go nebut wa! Ngga tang so, ta kua mlak-nenawon. 12 No, Petrus-a ip go, simu blo sono gemang kap-siwon. Ngga ey, ku sono kenuon go, demu put ba sono gemang tebap-sawon. Nggano, ikum go, amka lenan-a gigit. Dabui ba tang usi ey, tandali Petrus gemang bewon.
Yakena Emaus no koklong go andua namon
13 Ku ngganemot dali no, Yerusalem sik sogo, yakena Emaus sono, andua-andua sik sogo namon duo gemang koklong. Emaus nogo tap walong 12 kilometer yam no. 14 Way-way so tasam lemoy go nebut-a walong bata so tap lo gemang pen-klesiton. 15 Seni so, way-way so kunala pen-klesiton go, Yesus-a weng go nemotnamon ey gemang nenaton. 16 No, nemu sagum go nogo, Yesus kua senong-klenawon. 17 Ngga ey, ngge kalik gemang usi-nawon, “Sogo kalik go nebut so pen-kletogoy?” Usi go ngga tup go, dabui ide ey, namboy ip go nemu-a gemang bung-kletenawon. 18 Way so meno duo Kleopas lo, gemang usi-nawon, “Nggeasui lemoy go tasam, yam so naklay mo tup. Saula meno tasam ngge lemoy go kua tup go, mot seguong-a got-togoy?” 19 Yesus lo usi go, “Sogo kalik go tasam?” Nggano, nemotnamon lo gemang pen-klenawon, “Nasaret sik sogo Yesus no lemoy go tasam se! Nemot ngga nabi dega. Nemot go nebutpen, takebali, Ki Wali Iram ey blung Israel eygo naklay mo senong. 20 No, di no glung go kebong go idekeba iti genang so, Roma go ta sono imot go taiti so puit go trang-trang dega ey, iram-tegay eygo lo Nemot mo itak sang. 21 Atnang-a pu ngga, blung Israel ta, banom sogo, Nemot lo gabe ya itak-yon. No, mo kebong sang! Nggeasui golo ku nangglik tete sogo gabe. 22 No, se tup: genamnang eygo kabung-kabung, wadikua seni simu blo sono klong golo, atnang ey nega go nebut mo pen. 23 Yesus go temoy, nemotnang kua ikum-natunlak. Tandali weng go gemang pepen, ‘Ki Wali tamot-a tegu-enatu go, nemotnang lo pu go, ‘Tandali Yesus mo nglong wa!’ 24 Ngga ey, atnang sik sogo andua-andua temu klong go ikum go mo pen, ‘Seni so, mianang lo pen go kalik mo lemoy!’ No, Yesus tang go kua ikum-nesrenawon.”
25 Nemotnamon lo pu go nebut naklay tup gono, way so Yesus lo gemang pu-tenawon, “Esang, motnang, puplu sogo sedue! Wali Sam klaut ba sogo nebut, nabi-nabi lo klik-nengam go, keda sogo yakua mlak go senong ba! 26 Se duing! Tegadi so Ki Wali Iram lo dok go Iram, blongdon ba no tamlak genang, banim iseng kangok go-a se lek.” 27 Ngga suey so senong genang so, Wali Sam klaut ba no Nemot so klik go nebut, neguon so nemotnamon no naklay Yesus lo gemang pen-nawon. Musa ey nabi temu eygo lo klik go sik so gemang nguok.
28 Nebeton go, e... yakena Emaus dagu no gemang pung. Ngga ey, kekayso klong sogo kalik Yesus lo gemang pu-nawon. 29 No, nisonoso nemotnamon lo pu go, “Ku kiklik go se! Atnang go yap sono namboy degut-a!” Ngga ey, yap sono Yesus gemang degut. 30 Se ikum: yap no suing go ten so dedam gono, loti Yesus lo iti go, Ki Wali Iram no taitisuey pu go, betok go, gemang wasey-sing. 31 Woy ngganemot no, nemu pli go gemang senong-klenawon, “Ye! Nemot-a Yesus ba!” No, nemotnang go, nemu sik sogo, Yesus-a gemang nega-dap nawon. 32 Ngga ey, way-way so nemotnamon lo gemang pen, “Mot duing-togoy dali? Wali Sam klaut sik sogo nebut Nemot lo taling go nogo, imot go dabui ba nogo, yakay lo dasing go se!” 33 Tandali kekayso Yerusalem sono ip go kenawon. Pung gono, Yesus lo kuoy go andua 11 yam sogo, andua temu ey gemang tegu. 34 Ngga ey, nemotnamon sono andua temu lo gemang pen-nenawon, “Seni so lo, Yesus mo nglong. Simon sono Nemot go saysuk taling go mo ikum.” 35 Ngga tup gono, Emaus tap no lemoy go, ngga ey, yap ba no loti betok go, Nemot go ta lo wasey gono, senong-nenawon go nebut, andua namon ngga lo gemang pen-klenawon dali.
Andua-andua ey Yesus tegu go
36 Yang, andua-andua ngga, nebut so maning pepen gono, nemotnang nesip no Yesus tang go-a pung so pung go gemang ip-anawon. Nggano ngge kalik so gemang pu, “Ngengam yakay ey motnang gabe!” 37 Nemotnang pling go, kangok so suali gemang tra-nenawon, nemotnang-a pu, ngge dabuilap! 38 No, Yesus lo gemang pu, “Sogo so pling go, kuikui go, suali ey tra-ketogoy? Genam nogo dabui-a klaya kua iti go? 39 Genam tang golo wa! Se ikum: Genam go ta ngge! Genam go masi be! Ta tra gono se senong! Dabuilap go saysuk kua. Genam go tamasi gabe.” 40 Ngga kalik pen-tenawon go, nemotnang no Nemot go tamasi leguit go gemang ikum-nenawon. 41 Yakay ey nega-netenawon goso, maning suey so kua keng-nesrenawon go, Yesus lo gemang pu-tenawon, “Ngge sogo motnang logo ten gemang?” 42 Ngga ey, Yesus no dasi dagon temu-a gemang iti-nenawon. 43 Dasi temu iti gono, nemotnang damoy so gemang dam-nawon. 44 Ngga ey, Yesus lo gemang pen-tenawon, “Ngge naklay, motnang ey maning Genam susuing gono, mo pen-ayu. Seni so, Genam so Musa lo, nabi-nabi lo, sam Masmur ba no klik go, ngga naklay se lemoy!” 45 Ngga ey, Wali Sam klaut go seni senong genang kunala, Yesus lo gemang plet-dak. 46 Nemotnang no gemang pen-atenawon, “Wali Sam klaut ba no klik go: tegadi so Ki Wali Iram lo dok go Iram, iseng tra go se kebong. Nggano, ku nangglik tete no, kebong sik sogo, tandali mea nglong! 47-48 Mo klik dali: Nemot go sui ba no, se pepen klong. Saula-saula naklay, wali buin itak go, wali inim-a se iti. Ngga ey, piam konkebamling mea suep. Kua kay! Yakena Yerusalem sik so iti go, deguo teguop ngge, ibe sono neguon so se pepen klong! 49 Se tup! Motnang nogo, tegadi so Ki Wali Iram lo dok go Wali Waglo-a, Genam lo mot-dak go mea li. Ngganemot sogo so, sip ngge seguong so se susuing, e... blo sik sogo don, motnang nogo mea kok. Ngga ey, sip meno sono pepen genang, se klong-lak!”
Yesus klak-biwon go
50 Nggano, Yerusalem sik so nemotnang Yesus lo wawi go yakena Betania dagu no gemang klong. Pung gono, blo sono ta iti-biwon go, nemotnang nogo taitiklum gemang tui-nawon. 51 Maning, ta so tutui gono, Yesus keklak go, e... Ki Wali yakena ba sono, wawi go se degut-biwon. 52 Ngga naklay ikum gono, Yesus sono ta andua-andua kong-nenawon go, tandali yakay kangok go ey Yerusalem sono gemang-nenawon. 53 Kuno-woyno, Ki Wali yap ba so nemotnang gemang got-netenawon. Ngga ey Ki Wali Iram nogo ta gemang kokong.