19
Di no Yesus tegak genang so pu go
1 Itak genang sikabung Yahudi kua keng go nogo, tap Pilatus yakay kua. Ngga nemot sogo so, demun-a Yesus inya genang so gemang we-nawon. 2 Gening wong-a plesedue lo rlok go, Yesus go wengkabui temoy no nali tete so gemang kut. Ngga ey, kibam suk sogo amka lo, iram nogo kalik, Yesus gemang kebet-nenawon. 3 Nemot mit no plesedue pluep golo gemang pupu, “Mot, sedue Yahudi go Iram, ‘Wali-wali!’ ” Nggano, nebuem tap lo Yesus gemang pang-netenawon. 4 Yam so wayang-nenawon gono, dia no Pilatus gemang klong. Sikabung Yahudi sono gemang pu-tenawon, “Se ikum! Nggeasui go, dia sono wawi go Nemot gabe pupung. Nemot ba sogo kuklue, genam kua ikum-sretu.” 5 Ngga ey, amka kibam suk sogo ey, baling wong nali tete so kut go ey, dia sono Yesus wawi go gemang pung. Nggano sedue Yahudi sono Pilatus lo pu go, “Ikum-a, Nemot gabe!” 6 No esang! Yahudi go trang-trang dega ey, Ki Wali yap yay sogo ey, Yesus ikum gono, gemang bega-nenawon, “Di no tegak-a! Di no tegak-a!” Nebut ngga tup gono, Pilatus lo pu go, “Ngga kalik go, motnang tang so di nogo Yesus se tegak. Esang, Nemot go piam, kamso wet go, klaya nang go Genam kua ikum-sretu.” 7 Nggano, trang-trang Yahudi lo pu go, “Atnang go demutrui nogo, Nemot luk go se kebong. Nemot lo pu go, ‘Genam, Ki Wali Iram go Danon gabe!’ ”
8 Nebut ngga Pilatus tup go, kangok so suali tra-nawon go gemang pu, “Ye! Yesus ngge sogo kalik go sedue?” 9 Nggano, amble go yap kangok go ba no tandali Pilatus degut gono, Yesus no gemang usi, “Mot nago sik so pung?” No, nebut way Yesus logo kua teguo-srenawon. 10 Pilatus lo usi go, “Ye! Nggeasui go, genam eygo Mot nebut ya kua pen? Kunala temoy no se! Kua senong? Genam go don gabe. At lo pu go, ‘Di no tegak sogo, mea glung!’ Genam lo pu go, ‘Ta itak sogo, mea itak!’ ” 11 Way so Yesus lo pu go, “Yang! Mot go don gemang, no, Ki Wali Iram sik sogo don. Ngganemot sogo so, mot go kuklue seguay. Esang, mot go ta sono itak go-a kuklue kangok gemang. Nemotnang tang so duing go-a pluok go nogo.”
12 Yesus go nebut ngga tup gono, Yesus itak so tandali Pilatus duing go gemang pen. No, ngge kalik trang-trang Yahudi lo gemang bega-netenawon, “Sedue ngganemot mot lo itak go, Kaysar Roma go andua so tandali go mot yakua pu. Mo kay? Iram so nando lo wa go, ngga Kaysar go plesi gemang.”
13 Nebut don eygo ngga tup gono, Yesus tandali dia sono Pilatus lo wawi go gemang pung. Nggano, Yesus nogo idekeba iti sogo so, iram demu blo sono gemang got-nawon. Seboy ngga go sui, ‘Dia Teguop go’, demu lo sey go. Iblani nebut so pu go, ‘Gabata’.
14 Paska Ku dali semu genang, woy nesip no se kekenok. Trang-trang Yahudi sono Pilatus lo gemang pu, “Ngge motnang go iram gabe. Wawi go se klong!” 15 No, nemotnang lo bega-netenawon go, “Di no glung-a! Temoy but-a!” Nggano, Pilatus lo pu go, “Esang! Di sono motnang go iram ya glung-kelo?” Way so trang-trang lo tenguo go, “Atnang go iram nemot kua! Genamnang go deguena, Kaysar seguong-a klaya.” 16 Ngga kalik trang-trang Yahudi lo waydang go, nemotnang go ta sono Yesus Pilatus lo gemang itak-nawon, di no glung genang so.
Yesus di no tegak-nenawon go
17 Yakena Yerusalem sik sogo, Nemot tegak genang di Yesus tang so lek go, e... sip meno no gemang koklong. Sip ngga go sui, ‘Wengkabui Don’. Iblani nebut sogo, ‘Golgota’. 18 Sip ngganemot no, di no Yesus gemang tegak-nenawon. Nemot ey, klay gono tegak go sedue, namon ey gemang. Meno takali idi no, meno-a tasemlea idi no. Yesus-a nesip no gemang glung. 19-20 Nggano, Pilatus lo pu goso, sam di pap temoy no gemang klik. Ngge kalik, ‘Yahudi go Iram, Nasaret sik sogo Yesus gabe’ Esang! Sam ngga, Iblani nebut sogo, Yunani nebut sogo, Latin nebut so klik go. Se senong: sip ngganemot yakena dagu sogo nogo, sikabung Yahudi, mata so klong-weng go, sam ngga ikum genang. 21 Ngga ikum go, way so Pilatus no Yahudi go trang-trang lo gemang pu, “Piam so ngga mo klik. Ngge kalik se klik, ‘Sedue ngge tang so pu go, Yahudi go Iram Genam gabe.’ ” 22 No, Pilatus lo tenguo go, “Mo klik go ngga, mo klik gabe.”
23 Di no Yesus tegak-nenawon gono, Nemot go amka plesedue lo iti go, namon-namon yam so gemang wasey. Sedue klaya lo, klaya dali so gemang iti. No, amka walong go-a, kua wasey. Seni so, amka ngga sebut go tang kua. Blo sik so, e... ku no pung go, klaya seguong. 24 Nemotnang goso pu-nenawon go, “Amka ngge kua ibot.” Nemot-a i-eyon go, nando no taling go, nemot no se iti. Yang! Wali Sam klaut ba no lemoy sogo so, ngge kalik mo klik,
“At go amka Nemotnang lo mea wasey.
At go amka walong go iti genang sogo, mea i-neyon.” (Mazmur 22:19)
Ngga kalik plesedue lo semu-nenawon gono, nebut ngga gemang lemoy.
Unen Maria Yohanes sono Yesus lo itak go
25 Yesus tegak go di dagu nogo, kabung-kabung gemang ip-lak. Yangga: Yesus go unen Maria, Maria go ndengon, Klopas go senun Maria, nggano, Maria nan Makdala sik sogo. 26 Nemot lo klum go andua, Yohanes, unen ey ip go ikum-kunuon go, gemang pu-tebawon, “Mia! Ngga mot go duo gemang.” 27 Nggano, Yohanes sono ngge kalik gemang pu-kunuon, “Ngga, mot go mia gemang!” Ku ngganemot sik so Yohanes go yap ba sono Maria wawi go gemang klong.
Yesus kebong go
28 Ku ngganemot nogo, Yesus mo senong, “Genam no mot-dak go kebali, yam so mo pluok-tu gabe.” Nggano, Wali sam klaut ba no klik go naklay lemoy genang so, gemang we-bawon, “Genam bu nu tra go!” a 29 Nggano, anggul betey eygo, spon no suik go in no kok go, Yesus sono plesedue lo gemang leguit. 30 Anggul ngga suop gono, ngge kalik Yesus lo gemang pu, “Yam so naklay mo lemoy gabe!” Ku sono wengkabui utue go, se sok-dapbawon.
Yesus suon lo uluk go
31 Ki Wali Iram go ku Sabat dedagu go tang so, sedue temoy di temoy so gigit go, woy-woy Yahudi kua iwat. Ngga ey, Pilatus sono nemotnang lo usi go, “Sedue nangglik di temoy sogo, masi don-a se seguoy-sing, keda so kebong genang. Nggano di sik sogo tebuo genang.”
32 Ngga ey, Yesus ey glung go sedue namon go masi, plesedue lo gemang seguoy-nenawon. 33 No, Yesus mit no pung go, ikum-nenawon go, “Yesus mo kebong ba!” Ngganemot sogo so Yesus go masi nemotnang logo kua pedueng-srenawon. 34 No, teglo sono suon lo Yesus plesedue meno lo gemang uluk-biwon. Nggano, suon put ba lo, kin ey bu eygo-a gemang pung. Yesus seni so mo kebong.
35 Yohanes tang so ikum go-a pen go nebut gabe. Nebut ngga seni eygo, keng genang. Ngga Yohanes tang go mo senong. Nemot lo duduing go, dabui lo ngga wawi go sikabung temu se keng-lak dali. 36 Se senong: Wali Sam klaut ba no klik go, ngga naklay ngge kalik mo lemoy gabe,
“Klayanang go Nemot go don kua pedueng-nesrenawon!” (Keluaran 12:46)
37 Nggano, Sam Klaut ba nogo ngge kalik go mo klik dali,
“Nemot sono uluk sedue lo, nemu mea luik.” (Zakharia 12:10)
Yusup Arimatea go simu ba no Yesus tui go
38 Se senong, sedue meno gemang, nemot go sui: Yusup, yakena Arimatea sik sogo. Seni so, Yesus no dabui iti go nemot mo keng dali. No, dia sono go kua pepen.
Pilatus mit no nawon go, Yesus temoy iti sogo so usi-nawon. Pilatus yang-nawon go, klong go, Yesus temoy di blo sik sogo, Yusup lo gemang tebuo-nawon.
39 Se senong: nemot no tebok go sedue meno gemang. Nemot go sui: Nikodemus. Banim go, wadi Yesus ey tegu so weng go, Nikodemus ngganemot gemang. Yesus go temoy no mlay ut genang so, Nikodemus lo idok go nawon go: mur; mlay kinemon ey go 50 kilo yam so. 40 Yesus go temoy sedue namon ngga lo iti gono, sedue Yahudi go demu kalik, mlay lo bluim go, amka lenan lo gemang pok-klenawon.