18
Tong kua tong goso dewi-a duduing go
1 Dewi-a tong kua-tong goso don ey duduing genang, Nemot no keng go sedue sono yatrang meno ngge kalik Yesus lo gemang pen-nawon, 2 “Se tup! Yakena meno go deguena gemang. Nemot don kangok. Ki Wali Iram nogo, suali kua tetra, sikabung dali go nebut nogo yakua keng dali. 3 Yakena ngga sogo kenin kebong go kabung nalo gemang dali. Kuno-kuno deguena mit sono kabung nalo ngga weng go, ngge kalik gemang we-tenatun, ‘Genam sono sagui, sedue meno lo semu go. Nggeasui go, genam no tebok go, suey so nebut mot lo se pen-nalo!’ 4-5 Kuno-kuno kabung nalo go nebut deguena lo tup go, kua tup go kalik ne, tebok genang moyso! No, senang so poplong go tang so, i go sogo, deguena gemang duing-nawon, ‘Nemot-a Ki Wali Iram nogo genam kua suali go, sikabung meno go kunala kua kekeng, senang so kabung nalo ngge weng go u-usi golo tomtup eygo, nemot nogo nebut suey so tebok go mea pen-lu.’ ” 6 Nebut yatrang ngga pen gono, andua-andua no Woy Dem Yesus lo gemang pen, “Suey so motnang se tup! Nemot-a demu no deguena ngga kua kekeng, no, suey so kabung nalo nemot lo mo tebok. 7 Se duing: Ki Wali Iram, Nemot tang so kuoy go blungyap, kuno-woyno senang so Nemot sono dewi-a u-usi go, suey seni sogo Nemot logo yakua tebok dali? Namboy Ki Wali Iram logo ya bubung? 8 Gabe pen-asitugu: seni so, Ki Wali Iram logo mea tup, nggano, keda so mea tebok dali. No, kukunan blo nogo tandali Blong Dem weng go nogo, Genam sono dabui iti go keng go sikabung eygo ya tegu, kua tegu?”
Seni eygo dewi-a klak genang
9 Ngge kalik Yesus mit no pluep go sikabung temu lo duing go, atnang ngge naklay dega go sedue gabe! Meno duo eygo kua kerlam. Ki Wali Iram suongku nogo seni eygo nemudi sogo sedue genam gabe. Kunala piam go ngga taling genang so, nebut yatrang meno, ngge kalik so Yesus lo gemang pen, 10 “Se ikum: Ki Wali yap ba sono, dewi pu so sedue namon gemang degut. Meno sedue Parisi, meno duo blasteng so iyaluim go. 11 Sedue Parisi ip-nawon gono, dabui ba lo ngge kalik gemang pu-nawon, ‘Yang, Ki Wali Iram! Taitisuey. Sikabung meno logo wom, wamoymlue, kamea kunala eygo, genam ey kua kerlam. Blasteng so iyaluim go sedue ngga eygo, genam kua kerlam dali. 12 Minggu klaya da namon, Mot nogo so tenday genuing gabe susuing. Kebali sik sogo duoy, taut tanamon yam so wasey go, klaya Mot nogo so gabe iti-tugu. Genam go dewi ngge no yam. Taitisuey.’ 13 No, blasteng so iyaluim go piam eygo sedue-a, ngga sogo sikabung nogo teguot glung so, ket no ip go, dabui tasayap ey gemang pu-biwon, ‘Yang, Ki Wali Iram! Genam kon kangok go sedue nogo, klum tra-balo ya! Genam go dewi ngge no yam.’ 14 Nggano, Yesus lo pu go, ‘Senong go motnang se keng! Seni so, tandali yap sono blasteng so yaluim go sedue klong go nogo, Ki Wali Iram go suongku lo seni eygo, nemudi so gemang nawon. No, sedue Parisi-a ngga kalik go kua. Kua kay: blo sono sui-a nando lo iti go, ku sono Ki Wali Iram lo mea kenok. No, ku sono sui nando lo pu go, blo sono nemot-a Ki Wali Iram lo mea iti.’ ”
Denok logo kalik dabui lo keng genang
15 Ku meno so, Yesus lo tatui go gualaklum wadong genang so, denok seguay go sikabung lo wawi go gemang weng-lak. No, Yesus go andua-andua lo gemang bebat. 16 Ngga ey, Yesus lo pu go, “Kua bebat! Denok nogo tap puem genaning. Itak go, Genam sono nemotnang se weng. Nemotnang kalik golo, Woy Wali Iram go blongdon duduing gabe iti. 17 Senong ngge-a se keng: Woy Wali Iram go blongdon duduing, denok seguay go kekeng go kalik go sedue nogo, gemang.”
Ki Wali Iram no keng go taut se itak
18 Se ikum! Ngge kalik Yesus sono sedue Yahudi go woy meno lo gemang usi-nawon, “Aya klui suey go! Kiki wali blong ba no degut genang, sogo-a genam ya semu-lu?” 19 Nggano Yesus lo pu go, “Sogo temoy no, sedue suey goso Genam pu-to? Kukunan blo sogo, teguop go sikabung kua. Ki Wali Iram seguong-a teguop go klaya Nemot gemang. 20 Ki Wali Iram go demutrui mot mo senong: kamea kua pluok, sedue but go kua kebong, wom kua keng, piam so kua yang, moy-ay nogo ta kokong ey se keng. Ngga kalik go-a mot logo se pluok!” a 21 Way so, sedue ngga lo pu go, “Maning seguay go sik so, demu ngga nogo, suey so genam mo keng.” 22 Ngga tup gono, Yesus lo pu go, “Tasam klaya dali mot se semu! Klong go, taut naklay duoy so nay go, taut kua go sikabung no duoy ngga mot lo se wasey-sing! Ngga kalik semu go, way so kikiwali blong sogo taut suey go-a mot no mea ikak. Nggano, weng go Genam sono mot se keng!” 23 Nebut ngga kalik go tup go, dabui ide ey sedue ngga gemang tra-nawon. Nemot go taut miam eygo nogo. Ngga ey, ibe sono nemu yalap go, ngge kalik Yesus lo gemang pu-tenawon, “Kukunan sikabung nogo, tap ngge yakua. No, Ki Wali Iram nogo kua lemoy go, yakua!” 24 Sedue ngga, dabui ide eygo ikum go, ibe no Yesus lo gemang pu-nawon, “Esang! Woy Wali Iram go blongdon duduing degut genang, taut mata sogo sikabung nogo deding ba lo! 25 Yatrang ngge kalik gabe: put seguay go kekedik ba logo keda so menay kangok go kua dedegut. No, Woy Wali Iram go blongdon duduing degut genang, taut mata sogo sikabung nogo deding ba dega lo, menay kangok go ey kua kerlam!” 26 Nebut ngga tup gono, ngge kalik ngga sogo sikabung lo gemang usi, “Ngga kalik deding ba logo, kikiwali blong sono sesuoy genang, nando-a ya degut?” 27 No, Yesus lo pu go, “Sikabung nogo yakua go, Ki Wali Iram nogo mea lemoy.” 28 Petrus lo gemang pu-tenawon, “Ikum-a! Mot no keng sogo so, duokabung yap naklay mo itak.” 29-30 Way so Yesus lo pu go, “Yang, gabe pen-asitugu, ‘Ki Wali Iram go tap keng sogo no, duokabung, moy-ay, kukunuyap nando lo itak go, nggeasui go ku no tandali da mata dega so mea iti. Ngga ey, yansi go nemot nogo kikiwali inim mea iti dali.’ ”
Iseng lek genang da nangglik tete so pen-nawon go
31 Yerusalem no klong sogo no, Yesus go andua-andua 12 yam so usi go, banom so tap nesip no ngge kalik gemang pen-tenawon, “Nggeasui go, Yerusalem sono imot gabe koklong. Wali Sam klaut ba no Blong Dem no lemoy genang, nabi-nabi lo klik go naklay, mea lemoy-anayun. 32 Yang! Ki Wali Iram kua senong go saula go ta sono Blong Dem mea iti. Ngga ey, nemotnang lo wayang go, iseng taling go, mlabui mea suop. 33 Tegan demun lo suey go, but go mea kebong. No, ku nangglik tete no, tandali Nemot mea nglong.” 34 Nemot-a tup go, nemot go seni andua-andua ngga lo senong go, kua mlak-nesrenawon.
Sedue nemu pung go pali go
35 Yesusnang koklong go, yakena Yeriko no se dedagu, sedue nemu pung go meno tap ketang so duoy so wadong-tenawon go, gemang. 36 Sikabung mata sogo masi kluim tup go, gemang usi-tenawon, “Ngge sogo kalik go kluim?” 37 Ngga ey, sikabung lo pu go, “Yakena Nasaret sik sogo Yesus uweng go kluim.” 38 Nggano, ngge kalik kangok so gemang bega-tenawon, “Yesus! Iram Daut sik sogo Danon. Genam klum tra ya!” 39 Banim temu no koklong go sikabung lo gemang bebat, “Yakot so suing-a!” No, tandali don ey kangok so nemot lo gemang usi-tenawon, “Iram Daut sik sogo Danon, genam klum tra ya!” 40 Nebut ngga tup gono, Yesus lo gemang pu, “Sedue nemu pung go ngga, ngge sono wawi go weng!” Nemot wawi go, Yesus go suongku no nemot gemang ip. Ngga ey Yesus lo usi go, 41 “Mot no Genam tebok genang, sogo-a duing-togoy?” Sedue nemu pung golo wa go, “Woy Dem, genam nemu pli sogo se!” 42 Ngga ey, Yesus lo gemang pu, “Kangok so Genam no duduing go tang so, nggeasui go mot go nemu se pli!” 43 Woy ngganemot dali no, kekayso nemot go nemu gemang pli. Ngga ey, Ki Wali Iram nogo ta kokong ey, Yesus no keng go gemang koklong. Seni so: tasam ngga ikum gono, Ki Wali Iram nogo ta sikabung naklay lo gemang kong dali.