20
Sedue meno go usu no duoy kebali so semu go benuey
1 Woy Wali Iram blung tamlak go nebut benuey ngge kalik gabe: Usu wengkabui meno, anggul usu kebali so, wadikua pung go, sedue so gemang wet-siton.
2 Kebali sedue wawi-sing go, ku klaya go ba nogo iti genang duoy, klaya dali so gemang yang-nenawon. Ngga ey anggul usu kebali so kuongking go gemang klong. 3-4 No, wadikua go woy suongdon no ngap go yam no, dia so yem-a got-neton go sedue tegu go, ngge kalik gemang pu-nawon, “Motnang weng-a! Genam go anggul usu kebali-a ba semu! Motnang go seguot drang suey so at lo mea wasey-sing.” Ngga ey, nemotnang gemang nenawon-lak dali. 5 Nggano, wabedong go woy nesip no, wengkabui tandali ngga pung go naton go, yem-a got-neton go sedue temu ikum go gemang pu go nebewon dali. Ngga ey, use go tete pung go koklong go, ngga kalik go andua-andua temu ikum go, pu-nawon go gemang nebewon dali. 6 Ngga ey, use seni go woy taidi nogo, wengkabui ngga pung-nawon go, yem-a susuing go sedue temu ikum go gemang pu-nawon, “Sogo kalik go-a ku klaya yam so kebali kua goso got-ketogoy?” 7 Ngga ey, wengkabui sono gemang pen-netenawon, “Genamnang no kebali wabuiking genang sedue kua go.” Nggano, wengkabui ngga lo gemang pu-tenawon, “Genam go anggul usu no kebali sogo motnang se klong dali.” 8 Ngga ey, e... ku yam so se kiklik, yay sogo tamot no kebali duoy ikak go, wengkabui ngganemot lo gemang pu-tenawon, “Mot nalo go, kebali sedue nogo seguot duoy nase wasey-sing! No, use seni pung go sik so ta banim mlak go se wasey, e... wadikua kebali ta mlak go sedue no se pung.” 9 Ngga ey, nawon go, use seni woy taidi no degut go sik so gemang wasey-nawon. Ku klaya go duoy, klaya dali so gemang iti. 10 Ngga naklay lemoy go, banim wadikuatap degut go gemang ip-lak. Nemotnang lo duing go, “Atnang nogo-a seguot drang babu so mea iti.” No, nemotnang nogo ku klaya go seguot duoy klaya dali gemang iti.
11 Duoy ngga iti gono, wengkabui mit no nenawon go, sagui gemang semu. 12 Ngge kalik nemotnang lo gemang pu-netenawon, “Woy klaya dato kebali degut go sikabung nogo duoy, atnang ku klaya yam no, woy lo piam go ey, ne kerlam.” 13 No, usu wengkabui lo way so pu go, “Dem, motnang nogo piam genam logo kua taling! Motnang mo kay? Imotnang lo kerlam so pu go mo yang-ewon go, ‘Ku klaya go, duoy klaya dali mea iti.’ 14-15 Motnang go tete-a iti go nase klong! No, mesip so degut go, motnang ey kerlam so, genam lo wasey go, ngga genam go ba so. Nemotnang no dabui lo at lo iti go, ngga genam go duoy. Ngga dabui ide kua goso, genam lo iti go, dabui ey motnang lo kua lek ne!”
16 Ayanang, mianang benuey ngga go seni se senong, “Woy Wali Iram blung tamlak go ngge kalik gabe lelemoy: Mesip sogo sikabung-a banim no mea besi, no banim temu sogo, mesip sono mea tenguo.”
Da nangglik tete so Yesus iseng lek genang pen go
17 Yesus, Yerusalem no klong sogo no, Nemot go andua 12 yam sogo usi go, nemotnang banom so, tap nesip no ngge kalik gemang pen-tenawon, 18 “Nggeasui go, Yerusalem no imot koklong go, Blong Dem, iram-tegay go ta sono mea iti. Ngga ey, Nemot kebong genang idekeba mea pu. 19 Se senong! Roma saula Ki Wali Iram kua senong go ta no Nemot mea iti. Nemot sogo nebut wayang pu genang so, tegan demun lo suey go, di no mea tegak. No, ku nangglik tete no, Nemot tandali mea nglong.”
Klay gono Yesus ey tamlak genang
20 Ngga ey, Sebedius go senun, nemot go danon namon, Yohanes ey Yakobus eygo nogo taitiklum wadong so kuntun go, Yesus go masi ba no segabuem gemang unuik. 21 Ngga ey, Yesus lo usi go, “Sogo so mot wadong-togoy?” Kabung ngga lo pu go, “Se iwat-silo! Ku kua walong go nogo, Iram so Mot got-silo go nogo a duo namon ngge, meno-a ta semlea idi no, meno-a ta kali idi no se suing!” 22 No, way so nemotnang ngga sono Yesus lo pu go, “Mia lo wadong-tun go ngga, seni mot maning kua senong. Genam no iti genang ide, motnamon logo ya lek dali?” Nggano, nemotnamon lo pu go, “Mea lek dali!” 23 Way so Yesus lo pu go, “At lo lek genang ide dali, motnang logo mea lek. No, ta kali idi ey ta semlea idi eygo no suing genang, Genam logo ya kua pu. Ngga, Genam go Ki Wali Aya lo dali mo taling gemang.” 24 Nebut ngganemot Yesus go andua temu tup-nenawon go, nemotnamon nogo sagui gemang kong-nenawon. 25 No, andua naklay Yesus lo usi gono, ngge kalik gemang pen-anawon, “Motnang mo senong, ku sono blung-a kukunan ta so mlak go deguena logo gemang kekenok. Ngga ey, ta logo ey woy-woy go don lo mea poplong. 26 Motnang-a ngga kalik kua! Nando wengkabui so duduing go, koybutasemu so nemot-a se lemoy! Nggano, andua nogo kebali-a tebok go, nemot se pupluok! 27 Nggano, banim besi go sedue so, nando lemoy genang, nemot-a koybutasemu so se lemoy. 28 Blong Dem kalik se semu: sikabung lo tebok genang so, Nemot kua weng. No, sikabung-a Nemot lo tebok genang so pung go gabe. Yang! Sikabung mata sogo ta itak genang, way so b Nemot go wali-a, mo iti gabe.”
Nemu pung go sedue namon Yesus lo pali go
29 Ku meno no, yakena Yeriko sik so pung go, Yesus andua-andua ey tandali koklong gono, sikabung mata sogo nsrung-nsrung ey Yesus sono gemang keng-lak. 30 Ngga ba lo, sedue nemu pung go namon tap ketang so susuing go, Yesus ngga lo koklong go gemang senong-klenawon. Ngga ey gemang usi-klesiton, “Woy Dem, iram Daut go Danon! Atnamon nogo dabuiklum tra-a!” 31 No, sikabung mata sogo lo gemang bebat-nenawon, “Yakot so ya!” No, tandali-tandali kangok so gemang usi-kletenawon, “Woy Dem, iram Daut go Danon, genamnamon no dabuiklum tra-a!” 32 Ngga ey, Yesus tebung-nawon go, nemotnamon gemang usi, “Sogo so motnamon lo duing-kletogoy, Genam tebok genang?” 33 Way so pu-klenawon go, “Woy Dem, genamnamon nemu pli sogo se!” 34 Ngga ey, Yesus dabui ba nogo klum tra-nawon go, ta lo nemotnamon go nemu no gemang tui. Kayseguong so nemotnamon go nemu gemang pli. Ngga ey, Yesus sono gemang keng-klenawon.