2
Wali Waglo li go
1 Yahudi go walop Pentakosta ku nogo, Yesus no dabui iti go keng go sikabung naklay, sip klaya gono gemang yaluim-lak. 2 Ngga ey, nebit kluim kangok go kalik, klay seguong-a ut sik so gemang li. Nemotnang susuing go yap ba, klum ngganemot lo gemang kenok. 3 Koy nebleng kalik go, sikabung ngga naklay blo no gualing-sing go, gemang ikum.
4 Yang! Nemotnang naklay Ki Wali Waglo lo damoy go, nebut meno-meno so Nemot go don lo gemang pen-netenawon.
5 Se senong: ku ngganemot nogo, kota Yerusalem no, nan-nan sik sogo sikabung Yahudi gemang. Ki Wali Iram go tap suey so nemotnang gemang uwet. 6 Nebit kluim tup gono sikabung naklay ngga, klay gono gemang yaluim-nenawon. Seni so, nebut iwot go tamot-tamot lo pen go tup-nenawon gono, nemotnang yam so kuikui. Se senong: tamot-tamot lo pen go nebut iwot go ngga, nemotnang go nebut bluem so sikabung klay-klay lo gemang tup-nenawon dali. 7-8 Nggano tawasrang ey glok-netenawon, gemang nega-neton, “Kay! Sogo kalik lemoy-etugun! Nebut so pepen go sedue ngge naklay, nan Galilea sik sogo lo. Sogo kalik go-a, imot go nebut bluem so tup-eton. Ngga tasam kangok go! 9-10 Se duing! Imot ngge naklay, nan-nan meno sik sogo. Yangga: Partia, Media, Elam, Mesopotamia, Yudea, Pontus, Asia sik sogo, Pligia sik sogo, Pampilia, Mesir, Libia. kota Kerene dagu sik sogo, nggano, imot ey go temu kota Roma sik so weng-lak go susuing go gemang dali. 11 Nggano, imot tang Yahudi seni, nggano, saula-saula sik sogo, Ki Wali Iram no ta kokong go. Nggano, imot temu, nan Kleta sik sogo, temu nan Arabia sik sogo. No, esang! Tasam-tasam kangok go Ki Wali Iram lo taling go, nemotnang nebut iwot go, imot go nebut so pepen go, tup-eton go se!”
12 Yang! Sikabung ngga sogo, nebut ngga, tup gono, naklay kuikui go, way-way so ngge kalik gemang usi-neton, “Kaynemot sogo kalik?” 13 No, Yesus go tamot so ngge kalik sikabung temu lo gemang wayang-nenawon, “Esang! Anggul tom eygo drop golo puplu go nemotnang gemang pepen!”
Petrus lo pen-nawon go
14 Woy ngganemot no, Yesus go tamot 11 yam sogo Petrus ey wisi so ip go, kangok so ngge kalik Petrus lo gemang pen-atenawon, “Motnang, saula-saula sik sogo sedue Yahudi ey, Yerusalem sogo ey, suey gabe! Tasam ngge nemot go seni pen-asilu go, suey so dabui lo motnang se wawi! 15 Motnang lo duing go kalik kua! Sedue-sedue ngge kua puplu. Seni so, wadikua go ten, maning kua dam, bu maning kua drop-etu! 16 No, se senong: nebutkluim ngge, Wali Sam klaut no nabi Yoel lo mo pen-ngam, nggeasui mo lemoy-asitun gabe! 17-21 Yang!
Ki Wali Iram lo pen go,
‘Ku yam sogo no ngge kalik Genam lo mea semu!
Sikabung blo no Genam go Waglo mea pi-kundu.
Ngga ey wali genang sogo senong go,
Genam go kunala duoyap lo ikum go,
ibe sono danon, denun lo mea ngap.
Sedi so srek gono Genam lo taling go, sedue seni lo mea senong.
Yang! Genam go tamot-tamot blo nogo,
Wali Waglo Genam lo mea pi.
Ngga ey, Genam lo taling go,
ibe nogo nemotnang lo pepen klong genang.
Se ikum: ut blo no, kukunan blo no tasam-tasam kangok go
ngge kalik so Genam lo mea taling:
koy nebleng ey, koy ndop ey golo, kin suk so mea su.
Woy neblong kukuim so mea lemoy;
banu neblong kin suk so mea iwot dali.
Tasam-tasam ngga, yam so lemoy gono,
Woy Dem go blong eygo ku mea pung-ayun.
Se senong: ku ngganemot nogo,
Woy Dem go sui sono nando lo usi go, nemot-a mea Sesuoy.’ ” (Yoel 3:1-5)
Nabi Yoel lo klik go nebut ngge naklay, nggeasui go gabe lelemoy.
Ku semu sogo no yakena Nasaret sik sogo Blong Dem mea pung-ayon
22 Nggano, tandali Petrus lo, ngge kalik, gemang pen-atenawon, “Sikabung Israel, motnang se tup! Seni so, motnang nesip no tasam kangok-kangok go Ki Wali Iram go don iti golo, Yesus yakena Nasaret sik sogo lo mo taling-ayom. Tasam ngganemot naklay motnang ikum go sik so mea senong: seni so, atnang nogo so, Nemot Ki Wali Iram lo kuoy go, mo mot go klong. 23 Seni so, motnang nogo so pupluok go Yesus ngge, Ki Wali Iram no kua keng go amble sedue go ta no ne iti go, di no Nemot glung go mo kebong. Yang! Tasam ngge naklay, Ki Wali Iram lo duing-ngam go, nggeasui go gabe lelemoy-asitugun. 24 No, Yesus kebong go idekeba iti go betep gono, Nemot-a tandali Ki Wali Iram lo mo nglong. Seni so, kebong go don lo Yesus ya kua mlak.
25-28 Se duing: Yesus, kebong go sip sik so tandali nglong genang sogo, Wali Sam Klaut ba no, ngge kalik so babu Daut lo mo klik-ngam,
‘Ku no-ku no, Woy Dem no genam go nemu gabe iyalap.
Genam ey klay gono Nemot koklong go,
genam tebok go, mea kua pui.
Ngganemot sogo so, at go dabui yakay kangok.
Nggano, lom ba sik sogo, Nemot nogo, iway gabe i-iti.
Genam go saysuk don ey mea uwali.
Seni so, kebong go sip ba nogo genam go iku ya kua itak.
Mot go demsop go saysuk waluk mea kua ikum.
Yang! Genam sono, kikiwali inim sogo tap, Mot lo mo taling.
Genam ey klay gono Mot lo koklong go,
Genam go dabui yakay kangok dega seni mea lemoy.’ (Mazmur 16:8-11)
Yesus nogo nebut ngge naklay, Daut lo klik-angam go.”
29 Ngga sik so, Petrus lo tandali gemang pen, “Ayanang, mianang! Nggeasui go genam lo ya pen go, motnang lo mea yang. Babuasi Daut mo kebong. Nemot go saysuk mu no mo tuet. Nemot go mu, nggeasui go maning gemang gigit. 30-31 No, Daut ngga, senong eygo sedue. Seni so, tegadi so Ki Wali Iram lo dok go, nemot go mlena walasrang sik sogo duo klaya Iram so lemoy genang, Daut mo senong. Ngga ey tegadi so Ki Wali Iram lo dok go Sesuoy Iram, tandali nglong genang, nemot lo mo ikum-anangam. Yang! Kebong go sip ba nogo Sesuoy Iram go iku ya kua itak. Ngga ey Nemot go saysuk ya kua waluk.” a
32 Nggano, Petrus lo tandali pen go, “Seni so, atnang naklay mo senong, Yesus, kebong go sik sogo, tandali mo nglong. Tasam ngga, genamnang naklay mo ikum gabe. 33 Yesus nglong go, ut blo sono mo klak. Nggano, Ki Wali Iram go ta semlea idi so, got-tebawon. Ngga ey, Ki Wali Waglo Yesus lo mo iti. Yang! Ngge, imot nogo tegadi so Ki Wali Iram lo dok-ngam go Wali Waglo gabe.
Ayanang, mianang, mot lo tup go, ikum go, nebit kluim, koy nebleng, nggano nebut iwot go, ngge Ki Wali Waglo, atnang blo sono li go gemang.
34 Se tup! Ut blo nogo babuasi kua klak. No, Wali Sam klaut ba no ngge kalik nemot lo gabe pen-ngam,
‘Genam go Woy Dem no Ki Wali Iram lo mo pen,
Genam go tasemla idi no Mot se suing!
35 E... Mot go plesi, Genam lo tamlak go,
Mot go masi ba no mea unuik.’ (Mazmur 110:1)
36 Nggano Petrus lo tandali pen go: Ayanang, mianang, kukunuyap, sikabung naklay, nan Israel sogo! Sesuoy Iram so Daut lo pu go nebut ngga sik so, suey so se senong: seni so, ngga Yesus so pu go! Yesus ngga-a di no motnang lo glung go. Seni so, nemot Sesuoy Iram so Ki Wali Iram lo mo temuit gabe.”
Sikabung mata so, dabui iwot go mo keng
37 Petrus go nebut tup gono, sikabung naklay, dabui ba suali tra-nenawon go gemang usi-netenawon, “Ayanang! Motnang lo duduing go, genamnang sogo kalik so, ya lemoy-elu?” 38 Nggano Petrus lo, pu go, “Wali inim nogo-a motnang lo se teguey. Tasam piam go se itak! Motnang go tasam piam go suep genang, Yesus go sui ba no motnang bu se degut. Ngga ey, motnang nogo taiti Ki Wali Iram lo mea iti. Yangga: Ki Wali Waglo. 39 Se senong: taiti ngganemot, banim no tegadi so Ki Wali Iram lo mo dok-ngam. Ngga mot nogo, mot go duoyap nogo, seni so: sikabung naklay, sip-sip meno ket sogo nogo mo dok-ngam. Yang! Ki Wali Iram lo usi go sikabung naklay nogo-a, tegadi ngga ba no mea dok.”
40 Nebut ngganemot walong bata so gemang pen-awon. Nggano, sikabung nogo, nebut atuia ngge kalik don ey gabe pen-nawon dali, “Tap piam go motnang se itak, tap suey go-a Sesuoy genang. Ngga tang so, mot go idekeba Ki Wali Iram lo mea tebuo!”
41 Petrus go nebut no tup go, sikabung mata so keng go, bu gemang degut-nenangam dali. Ku ngganemot nogo, blong duoyap no Yesus dabui ba no wawi go sikabung, 3 ribu yam so gemang tetebok dali.
Takuduen sogo blong duoyap go wali
42 Sikabung tamot-tamot lo nguok-netenawon go, deguo teguop tupduk go nemotnang gemang keng. Nggano, klay gono yaluim go, ten betok go, uwasey, dam-netenawon. Nggano dewi gemang pu-netenawon.
43 Ku ngganemot no, Yesus go tamot-tamot lo tasam-tasam mata so taling-nenawon go. Tasam ngganemot ikum gono, suali ey sikabung gemang tra-nenangam. Nemotnang mo senong: tasam-tasam ngge, Ki Wali Iram lo taling go.
44-45 Iram Yesus no keng go blong duoyap, klay gono susuing go, naklay gemang uwasey. Seni so, taut ey duoy ey yaluim go, duoy lo nay go, sikabung temu no gemang iti. Nando kua go nogo, gemang go logo, nemot nogo gabe iti. 46 Ku no-ku no Ki Wali yap kangok go ba no, klay gono yaluim go, Ki Wali Iram seguong nogo-a dabui klaya gemang iti. Ngga ey yap-yap lo, loti bebetok go, klay gono yakay ey, dabui ku no li go, nemotnang lo gemang dedam. 47 Ki Wali Iram go sui blo sono nemotnang lo iway gemang iti. Ngga ey, nemotnang go tasam ikum gono, kunala ngge Yerusalem sogo sikabung naklay lo gemang duing-netenawon, “Seni so, Iram Yesus no keng go sikabung ngge suey go!”
Ku no-ku no, blong duoyap no, Sesuoy genang sikabung imening go, Woy Dem go don lo gemang tetebok.