ROMA
1
Paulus lo suey pu go
1 Roma sogo dem debui, blong duoyap: suey gemang! Sam so klik go ngge, Paulus! Iram Yesus go walikebali sedue. Se senong: Nemot go tamot so, genam Ki Wali Iram lo mo temuit. Yang! Ki Wali Iram logo deguo teguop dia sono penklong genang so, banom seni so genam kuoy go gabe. 2 Walu dega so, deguo teguop sogo tegadi, Ki Wali Iram lo mo dok-ngam. Yangga: Walisam klaut ba no nabi-nabi lo klik-nengam go. 3 Deguo ngga, Ki Wali Danon sogo deguo teguop. Seni suey so se senong! Se duing: sikabung go tang sik so ikum go, iram Daut go mlena walasrang sik so pung go duo, Nemot gabe. 4 No, Ki Wali Danon so, Nglangin lo mo temuit. Yangga: kebong sik so Nemot nglong go, blongdon ey Ki Wali Waglo kok golo, mo ip gabe. Ngga ey, ibe sono go gabe tetaling: tegadi so dok go Iram, Woy Dem Yesus gabe!
5 Se senong! Iram Yesus logo so, Ki Wali Iram go taitiklum no, tamot so genam temuit go, mot-dak go gabe penklong. Ngga tang so, saula-saula naklay sik sogo sikabung, dabui Iram Yesus no iti go, tupduk go mea keng. 6 Yang! Ngga, motnang yakena Roma sogo so, pu dali go. Iram Yesus go blung so, motnang mo usi. 7 Motnang, yakena Roma sogo blong duoyap naklay nogo so, sam ngge gabe kiklik. Se senong! Motnang Ki Wali Iram lo klum go, usi go, Nemot go blung teguop so mo kuoy gabe!
Gabe pen-asitugu, “Ki Wali Iram, imot go Wali Aya ey Woy Dem Iram Yesus eygo sik sogo taitiklum, ngengam yakay, motnang blo so mea gigit.”
Dewi Paulus lo keklak go
8 Yang! Kukunan sedingno-sedingno, iway tup go mo senong, “Roma sogo blong duoyap dabui lo Iram Yesus nogo gabe kekeng.” Ngganemot sogo so, Iram Yesus ba lo dabui klaya dewi pupu go nogo, motnang tang sogo so, banim no, Ki Wali Iram sono taiti suey-a genam gabe keklak. 9 Ki Wali Iram nogo so dabui lo kebali gabe pluok-tugu. Yangga, Nemot go Danon sogo deguo teguop genam lo penklong go. Ki Wali Iram mo senong! Genam dewi so pupu go nogo, kuno-woyno motnang sogo ey gabe duduing dali. 10 Dewi ba nogo Ki Wali Iram sono ngge-a don ey gabe uwadong, “Aya! Mot tang golo iwat go, Roma sogo blong duoyap ikum genang, ku tebot ngge ba no genam mea klong!”
11 Yang! Motnang ey tegu genang, dabui kangok so genam gabe duduen. Tegu gono, Ki Wali Waglo lo iti go walipega motnang don kok genang, genam lo mea wasey. Ngga lemoy go, suey. 12 No, ngge-a suey dato: way-way so imot don kok genang. Yangga: motnang dabui iti go kekeng golo genam don kok go, way so genam dabui iti go keng golo, motnang don mea kok dali.
13 Dem-debui, ngge se senong! Da mata so, genam lo mo duing: genam klong go motnang ey tegu genang. Ngga ey, saula-saula temu no pluok go kalik, motnang nogo so genam lo walikebali pluok go, seni ey se tagot dali! No, motnang ey tegu genang ku ngga, maning kua pung gabe.
14 Se senong! Sikabung no deguo teguop penklong genang idekeba, genam sono Ki Wali Iram lo gabe mo itak. Seni so, amble nogo, tapui nogo, senong go sikabung nogo, maning kua senong go, naklay nogo! 15 Ngga tang so, motnang yakena Roma sogo no deguo teguop pepen sogo, kangok so gabe duen-tugu.
Deguo teguop don dega ey
16 Deguo teguop penklong go, genam suongsut kua tra. Yang! Deguo ngga, Ki Wali Iram sik sogo don, sikabung so sesuoy go. Yangga sedue Yahudi-a takuduen sogo, se! Ngga blo no, saula-saula nogo mea penklong dali. 17 Dia nogo sikabung naklay walitap ngge deguo teguop ngganemot lo gabe pupung. Dabui iti go Iram Yesus no keng go seguong lo, Ki Wali Iram go suongku no yang go, seni eygo nemudi so, nemotnang mea ip. Se duing: Wali Sam klaut ba no ngge naklay mo klik, “Seni eygo, nemudi so yang go sedue-a, dabui lo Ki Wali Iram no keng go tang so, mea wali.” a
Ki Wali Iram senong genang don sikabung no iti go
18-19 Yang! Ki Wali Iram, blongdon senongduduing go nuik gabe. Ngga tang so, Ki Wali Iram nemotnang gabe senong. Seni so, sikabung nogo senong ngga Ki Wali Iram tang golo mo taling. No, kuklue ey taybat ey konkebamling eygo tang so, Ki Wali Iram senong genang tap seni mo luep sang. Yang! Sikabung go piam nogo, Ki Wali Iram go dabuisagui mo ngap gabe.
20 Se senong! Ki Wali Kumam go Waglo kua ikum go, Nemot go takebali pluok go, kukunan ngge lemoy-ngam go sik so, ikum go gabe mlak, “Kiki Iram, Nemot gabe; Senang Wali don Nemot logo.” Ngga tang so, sikabung logo yakua pu, “Genam kua senong.”
21 Nemot-a Ki Wali Iram senong go, Nemot nogo sogo ta kua kokong. Nemot sono go taitisuey kua pupu ne. Esang! Nemotnang lo duduing go tap, seni kua. Piam go-a duduing golo, nemotnang go dabui iku mo kenip gemang. 22 Nemot-a, nemot tang so duing go: naklay go dega genam gabe! No, seni so, nemot-a mo puplu. 23 Blong kua kenip go ba sogo Kiki Iram nogo, nemotnang ta kua kokong. No, didemu ta lo semu go, menay blong kenip go nogo-a, way so ta gabe kokong. Yangga: waluk genang sikabung suk sogo; wi suk sogo; dasi suk sogo, dabui lo kekatik go menay suk sogo nogo-a takokong ne.
24 Ngga tang sogo so, nemotnang go duduing tang golo taybat saysuk tang go duduing nogo-a pluok genang so, Ki Wali Iram lo gemang itak. 25 Ki Wali Iram go tap seni sogo-a, nemotnang lo itak go, way so wamoy sogo seni kua go tap-a mo keng. Esang! Ki Wali Kumam lo klik nogo-a nemotnang ta kokong ne. No, nemot so semu-ngam go nogo, ta kua kokong sang. Kua kay: senang so, Ki Wali Kumam nogo-a ta se kokong. Seni!
26 Nemotnang go duduing kon eygo tang so, taybat-a pupluok genang so, nemotnang Ki Wali Iram lo mo itak. Yangga: kabung-kabung, nemotgokalik, sedue nogo dabui kua iti. No, way so kabung dali eygo-a, dabui ne iti. 27 Ngga no, sedue ngga kalik dali, kabung ey nin-senun so suing genang tap-a itak go, way so sedue dali ey tawaluk pupluok sogo-a, kangok so gemang u-usey. Ngga paysing go tang so, nemotnang nogo kisebui way, takebali tang so mea taling.
28 Yang! Sikabung lo duing go, “Nueya! Ki Wali Iram nogo ta kua kong.” Ngga tang so, seni kua go kunala sono, Ki Wali Iram lo itak go, piam go-a nemotnang gemang pupluok. 29 Yangga: taybat-a, seni kua go pogop go-a pupluok. Nggano, gugluik, waluk go, dabuipiam lo mo saguip. Nggano, sedue but sogo, sagui kunala-a gabe duduing. Nggano, wamoymlue, piam-a senang so duduen. Sikabung meno sogo nebut-a iwotklong. 30 Nggano, sikabung meno go sui waluk genang-a pepen, Ki Wali Iram lo kua iwat go-a pupluok. Piam kua seni go, dabuitategue-a, nebut-a babu so, nemotnang lo gabe pupluok. Ngga ey, taybat pluok genang tap-tap keda so nemotnang logo mea duing. No, unen-nglangin nogo ta kokong kua. 31 Esang! Kunala kua go, tegadi plesing go, klum kua tetaling, dabuiklum kua go-a, nemotnang ne pupluok.
32 Ki Wali Iram go kisebui nemotnang mo senong: taybay so pupluok go sikabung, sikebong sip sono se itak! Nemot-a kisebui ngga mo senong go, taybat-a gemang yambeto. Yang! Taybat piam go sikabung meno lo pupluok go, nemotnang ey yakay dali.