1 KORINTUS
1
Paulus logo suey sam so tenuing go
1 Genam ngge Paulus! Ki Wali Iram go duduing lo, Woy Dem Yesus go tamot so mo lemoy. Genam ey, Sostenes-dem eygo lo sam ngge gabe kiklik. 2 Sam ngge motnang, Ki Wali Iram go blung yakena Korintus sogo, teguop so mo lemoy go nogo gabe iti. Blong duoyap yakena-yakena naklay nogo, Genam namon go suey gabe pupu dali. Yangga, imot go Woy Dem, Iram Yesus go sui no, ta iway kokong go sikabung. 3 Ki Wali Iram, imot go Wali Aya ey Woy Dem Iram Yesus eygo sik sogo ngengam yakay, taitiklum, senang so motnang blo so mea gigit.
Ki Wali Iram sono taitisuey pupu go
4-6 Seni so, Iram Yesus ba no motnang nemu pli go, blong eygo walitap naklay motnang mo mlak. Ngga ey, meno duo nogo deguo teguop, taiti walipega kalong eygo lo motnang gemang pepen. Ngga sik so gabe senong: motnang nesip no Iram Yesus go deguo teguop atnang lo pepen golo wali don mo kok. Ngga tang sogo so, kuno-woyno, Ki Wali Iram nogo taitisuey, genam gabe pupu. Yangga, Iram Yesus ba no taitiklum Ki Wali Iram lo mo iti gemang. 7 Ngga ey, Woy Dem, Iram Yesus so bubung go, Wali Waglo sik sogo taiti walipega naklay, motnang nogo so gemang. 8 Ngga tang so, Woy Dem Iram Yesus pung go suongku nogo, suongsut eygo mea kua ip. Yang! Kuno-woyno, dabui ba no Ki Wali Waglo lo ngga gabe iyang. Seni! 9 Ki Wali Iram naklay seni! Nemot lo pu go mea lemoy. Motnang Nemot lo usi go, Nemot go Danon, imot go Woy Dem, Iram Yesus ba no klaya ngengam so suing genang.
Tong-tong blong duoyap no lemoy go
10 Dem-debui, blong duoyap! Imot go Woy Dem, Iram Yesus go sui no, mang gabe king-situgu: klay gono se suing. Suep-suep se itak. Dabui klaya, duduing klaya so, motnang se lemoy! 11 Motnang ba no tong-tong lemoy go genam mo tup. Genam nogo, Kloey debui go yap tenglam ba no iyaluim go meno duo lo mo pen. 12 Ngge kalik motnang sik sogo lo pu go, “Paulus no keng go atnang ngge gabe!” Temu lo pu go, “Apolos no keng go atnang ngge gabe.” Temu lo pu dali go, “Atnang ngge Kepas go tete.” Temu dali lo pu go, “Genamnang ngge Iram Yesus go blung.” 13 Sogo kalik so? Banom-banom so Iram Yesus-a mo sran? Paulus-a, di sono motnang nogo so mo tegak go kebong? Paulus go sui ba no, motnang bu mo degut? 14 Klaya duo nang go motnang sik sogo, genam lo bu tui go, kua. Ngga tang so, Ki Wali Iram nogo taitisuey-a gabe keklak. Esang! Klispus-dem ey Gayus-dem eygo seguong-a, genam lo bu mo tui. 15 Ngga tang sogo so klaya duo nang go motnang sik sogo lo yakua pu, “Paulus no genam bu mo degut.” 16 Genam duing go, Stepanus-dem go yap tenglam-a, genam lo butui go. No, sikabung temu, genam lo butui go gemang dali? Suey so kua duing. 17 Se senong! Genam, Iram Yesus lo mot-dak go sikabung butui genang so kua. Deguo teguop pepen genang so genam ngge mot-dak go gabe. Ngga, kukunan sik sogo waglo, senongduduing lo genam kua pepen. Ngga kalik pen go, di no Iram Yesus glung go, nglong go don tetaling go mea nega.
Yunani go waglo senongduduing Ki Wali Iram sik sogo ey kua kerlam
18 Yang! Sesuoy so sikabung wali genang so, Iram Yesus di no mo tegak. No, walitap kua keng go sikabung nogo, deguo teguop ngga seni kua, puplu so. No, imot, sesuoy so mo wali go nogo, deguo ngga Ki Wali Iram go don gabe. 19 Wali Sam klaut ba no mo klik,
“Sikabung sik sogo waglo,
senongduduing Genam lo mea pedueng.
Nggano, kunala sedue-sedue go senong-blongdon,
Genam lo suep go mea nega-sing.” (Yesaya 29:14)
20 Ngga tang so, genam lo usi go, “Kunala sedue go senong nago yam so? Demu so ngunguok go trang-trang go senong, nago yam so? Kukunan blo sogo senong so, way-way so tutui go, nago yam so? Kua! Kukunan go senongduduing naklay, puplu goso way so Ki Wali Iram lo mo iwot-dak. 21 Ki Wali Iram kukunan go duduing logo yakua mlak. No, ngge-a Ki Wali Iram lo mo taling: ‘puplu sogo’ deguo teguop atnang lo pepen golo, sesuoy so wali sono dabui iti go sikabung-a, wawi go mea pung. 22 Se senong: tasam kangok go-a sikabung Yahudi lo gabe uwet. Senong–duduing-a sikabung Yunani lo gemang uwet. 23 No, Iram di no tegak golo ngengam go deguo-a atnang gabe pepen. Deguo ngge, sikabung Yahudi go dabui ba nogo, keng genang sogo ide ey. a Nggano, Yunani sikabung go dabui ba nogo, deguo ngge nebutiwot so mea pu, yakua keng dali. 24 No, Ki Wali Iram lo mo usi go, Yahudi sik sogo, Yunani sik sogo nogo, Iram Yesus ngga, Ki Wali Iram go senong-waglo don gabe. 25 Yang, Ki Wali Iram go ‘puplu’ sogo-a kangok dega, kukunan sikabung go senong ey kua kerlam. Nggano, Ki Wali Iram sik sogo ‘don kua’ go-a, don dega ey gabe. Sikabung go don ey kua kerlam. 26 Dem debui se duing! Demening motnang usi go keng go nogo, woy-woy, kunala eygo, sui eygo, motnang sik sogo mata so kua. 27 No, kukunan sikabung wagloblong eygo, suongsut genang so, puplu so pu go-a, Ki Wali Iram lo mo kuoy. Kukunan sikabung don kangok go, suongsut genang so, don kua so pu go-a, Ki Wali Iram lo mo kuoy gabe. 28 Yang! Kukunan go suongku no sui kua go-a, Ki Wali Iram lo kuoy go, sui eygo, wayang genang so. 29 Ngga tang sogo so, Ki Wali Iram go suongku nogo, sikabung klaya duo logo, dabui ta kua tegue eygo yakua ip. 30 Motnang-a Iram Yesus ey klaya gabe! Ki Wali Iram lo iwat go, motnang go senongblong so Iram Yesus-a mo lemoy gemang. Se senong: Iram Yesus tang golo, seni eygo nemudi so teguop goso imot mo yang gabe. Nemot logo so, imot gabe sesuoy. 31 Ngga naklay lemoy go, Wali Sam klaut no klik go kalik se,
‘Dabui ta nando lo tegue sogo,
Woy Wali Iram sono iway-a se pu.’ ”(Yeremia 9:24)