2
Iram Yesus di no glung go nglong go deguo
1 Dem debui, blong duoyap! Motnang no Ki Wali Iram lo kok go senongduduing pen so weng go, nebutpen naklay go blong eygo dega logo kalik, genam kua. 2 Genam lo iwat go: senong genam lo pepen go ngge, di no tegak go Iram Yesus seguong-a gabe. 3 Motnang sono genam weng go nogo, don kua, suali kangok, bobong ey, sang mo weng. 4 Motnang go dabui tetong genang so, sedue naklay dega golo pen go kalik, genam logo deguo teguop kua pen. No, Ki Wali Waglo go don no, dabui klaya iti go tang so, motnang yang go sang mo keng. 5 Ngga ey, Ki Wali Iram go waglodon seguong no motnang go dabui se glung! Sikabung go senongduduing nogo kua glung.
Senongduduing seni eygo Ki Wali Iram lo iti go
6 Nemot-a ngga kalik go, Iram Yesus no dabui iti go tupduk kekeng mo segu go nogo-a, senongduduing genam lo gabe ngunguok. No, kukunan ey wengkabui-wengkabui eygo senongduduing ey ngga kua kerlam. Naklay ngga nega genang. 7 Ki Wali Iram sik sogo senongduduing genam lo pepen go ibe logo kua ikum, ngga ba so gigit go! Yang! Kukunan maning kua lemoy go nogo, Ki Wali Iram lo pu-ngam go, senongduduing ngga lo, Nemot go blong ba no klay gono, imot mea suing. 8 Senongduduing ngga kukunan go woy-woy logo kua mlak. Senong go sogo, Ki Wali Iram go blong gigit go Woy Dem, di nogo nemotnang lo kua tegak go kebong. 9 Senongduduing go seni, suey so ngge kalik Wali Sam klaut lo mo taling,
“Senongduduing, wagloblong,
nemu lo kua i-ikum go,
kama logo maning kua tup go,
dabui ba no maning kua duing go,
Nemot no klum go sikabung no,
dali-dali Ki Wali Iram lo mo ta-ngam.” (Yesaya 64:4)
10 Se senong: imot nogo-a, senongduduing ngge Ki Waglo logo so mo taling. Yang! Ki Wali Iram ba so kok go gigit go, Waglo lo wet go, naklay-naklay ikum go gabe senong. 11 Sikabung go ba sogo, nando-a mo senong? Nemot ba sogo waglo seguong logo-a, uwet go mea senong. Ngga kalik dali, Ki Wali Iram ba sogo, Waglo lo uwet go mea senong. 12 Imot go wagloblong, kukunan sik so kua, Ki Wali Iram sik sogo gabe. Ngga ey, imot no Ki Wali Iram logo gualaklum taling go, senong genang. 13 Ngga tang so, Wali Waglo lo nguok go-a imot lo pen go gabe tetaling. Tap ngga, sikabung go wime lo ngunguok go ey, kua kerlam. No, imot nogo, Ki Wali Waglo lo gabe ngunguok. Yangga: waliwime, newet klaut ba sogo wali-a way-way so gabe pepen klong. 14 Wali Waglo nando go dabui ba so kua gigit go, Wali Waglo sik so iti go, nemot logo kua mlak gemang. Moyso, puplu sogo. Esang! Walitap ngga ikum go, yakua mlak. Wali Waglo seguong logo so uwet go mea senong. 15 Yang! Wali Waglo eygo sikabung logo, sogo-sogo ikum go, seni suey so mea senong. No, nemot tang go-a, sedue logo yakua uwet go senong. 16 Wali Sam klaut ba no, seni so ngge kalik mo klik,
“Ki Wali Iram go kunala-duduing naklay, nando-a mo senong?
Nemot nogo sedue logo mang yakua king.” (Yesaya 40:13)
No, Iram Yesus mo senong! Se senong: imot go duduing, Iram Yesus sik sogo-a gabe pupung.