3
Nebut tuon-tuon blong duoyap ba no lemoy go
1 Esang, dem-debui, blong duoyap! Ngga ku no, nebut genam lo pen go nogo, wime-newet eygo sikabung nogo kalik motnang kua. No, kukunan sikabung nogo kalik mo pen-nangu. Seni so, Iram Yesus ba no maning denok kalik. 2 Ngganemot sogo so, motnang nogo, nebutpen minip kalik go-a gabe i-iti. Ten dawin eygo kalik go nebutpen, yakua iti. Yang! Ten dawin eygo motnang logo yakua gut. No esang! Nggeasui go, nebutpen dawin eygo, maning motnang yakua mlak. 3 Maning kukunan ey motnang go wali tegan lo pok go kalik gemang. Motnang ba nogo, nebut tuon-tuon, nemukum, maning gemang go. Tasam ngga sik so senong go: maning kukunan go tegan lo keduik go, kukunan sikabung temu ey motnang mo kerlam. 4 Motnang sik sogo, sedue meno lo pu go, “Genam ngge, Paulus tete sogo”, temu lo pu go, “Genam ngge, Apolos tete sogo”, tangeng ngga kalik go sik so, gabe senong: kukunan sikabung ey motnang mo kerlam. 5 Se duing: Apolos dem ngga, sogo kalik go sedue? Esang, Paulus dem ngga, sogo kalik go sedue? Nemotnang ngge, Woy Dem go koybutasemu seguong. Wali nebutpen klong so mot-dak go sedue, Woy Dem no motnang dabui lo keng genang. No, nemotgo-nemotgo Woy Dem lo wasey go kebali kalik. 6 Nemot-a genam lo kuali go, bu-a Apolos lo mo sot. No tip-a, Ki Wali Iram lo gemang pupung. 7 Ngge se senong! Nemot so kuali go, bu so sot go, nueya. No, tip so pupung Ki Wali Iram-a, dui ey gabe. 8 Nemot so kuali go, bu so sosot go duduing klaya. No, nemotgo-nemotgo seguot tang so, way mea iti. 9 Yang! Atnang ngge, Ki Wali Iram go kebali sedue seguong. Nggano, Ki Wali Iram go usu ey yap eygo motnang gabe.
Yap kutrui ngga, Woy Dem seguong-a klaya
10 Ki Wali Iram go blong duoyap motnang gabe. Genam ngge, yap klik naklay mo senong go sedue. Seni so, genam no Ki Wali Iram go taitiklum iti go sik sogo, banim no blong duoyap kutrui genam lo mo sey gabe. Kutrui dali go blo no, kebali sedue temu weng go gemang klik. No, nemotnang tang so, suey so se duing, “Kutrui ngga blo nogo, sogo kalik ya klik-lu?” 11 Yang! Kutrui ngga, Iram Yesus seguong-a klaya! Seni so, ngga kalik go kutrui, sedue meno logo yakua sey. 12 Ngga blo no klik go: emas logo, perak logo, demu logo, di logo, neguen logo, udong logo, nueya! 13 No, nemotnang go kebali seni mea senong. Woy Dem go ku no, koy ey iti go Nemot mea pung. Ngga ey, koy ngganemot lo sedue klay-klay go kebali yatrang mea tui. 14 Nando go kebali-a, don ey gigit go, nemot go seguot sogo way mea iti. 15 Nando go kebali, koy lo kuim go, ide ey mea tra. No, nemot tang go-a, ta ulue so iseng ey mea sesuoy-sayon.
16 Motnang, kua senong? Ki Wali Waglo motnang ba so gemang susuing. Motnang ngge, Ki Wali yap gabe. 17 Se senong: Ki Wali Iram go suongku nogo yap ngga mo teguop! Yap ngga motnang blong duoyap gabe. Motnang nando lo waluk go, Ki Wali Iram lo mea waluk dali. 18 Mot tang sogo, wamoy kua mlue! Kukunan ngge sik sogo kunala eygo sedue dega so nando lo duing go, banim nemot tang go-a puplu so se lemoy! Ngganemot no, Ki Wali Iram sik sogo waglosenong eygo so, mea lemoy. 19 Kukunan sik sogo senong ngge, Ki Wali Iram nogo puplu so. Wali Sam klaut ba no klik go kalik, “Senongkalong eygo sedue, kukunan go waglo eygo, Nemot lo ta gabe mlak.” a 20 Nggano, Wali Sam klaut ba no, ngge kalik pu dali, “Seni so, wagloblong eygo sikabung lo duduing go, atuia, naklay-naklay Woy Wali Iram lo mo senong! Esang: wagloblong ngga, seni kua!” b
21 Ayanang, mianang! Tebadali go klui-klui go sui-a, motnang logo yakua iti! Se duing: Ki Wali Iram sik sogo senongduduing naklay, motnang go ta ba so gemang. 22 Nemot-a, seni so: Paulus, Apolos, Kefas, kukunan ngge, kebong-wali, nggeasui go ku, ku santugun go, ngga naklay motnang lo ta mea mlak. Naklay ngga, Iram Yesus go sui nogo, motnang go seguong gemang. 23 No, kua kay! Motnang ngge, Iram Yesus tete sogo. Nggano, Iram Yesus ngga, Ki Wali Iram go.