4
Paulus go waglo sedue meno logo yakua paysing
1 Iram Yesus go tamot atnang sogo ngge kalik sikabung lo se ikum: Ki Wali Iram go duduing kok go gigit go, suey so wasey genang, atnang sono gabe mo iti. 2 Kebali ngga so pupluok go tamot, seni eygo sedue so se suing. 3 Genam so motnang lo neyboy go, sikabung temu lo neyboy go, nueya. Genam tang go neyboy genang, seni kua dali. 4 Sogo-sogo piam go genam go dabui iku logo kua senong. No, ngge-a genam mo senong, “Genam go piam mea taling dali.” No, gabe pen-asitugu, “Genam so neyboy go, Woy Dem-a gabe.” 5 Piam-a tetaling go, tandali go kua! Woy Dem go ku-a motnang lo se bubung. Nemot go neblong ba no, ku klik ba sogo naklay, Nemot lo mea neguon. Dia sono sikabung go dabui ba so gigit go mea tegek. Ku ngganemot no, sikabung klay-klay go seguot Ki Wali Iram lo mlatueng go, sui blo no mea iti.
Teguopey dabui ta yakua tegue
6 Dem-debui, blong duoyap! Nebutpen ngge, at go saysuk ey, Apolos eygo so, gabe pen-asitugu. Seni so, motnang, atnang logo tasam sik so, demu ngge ikum go se senong: Wali Sam klaut ba no klik go teguopey go kua tebok! Klui temu kenok go, temu-a blo sono iti genang, mot logo kua taling! Mot tang so dabui ta tegue genaning. 7 Sogo tang so naklay dega goso, mot mo pu? Seni so, senong ngga naklay motnang nogo atnang lo mo itak gemang. Ngga itak go, sogo tang so mot go saysuk no weli ne bubut. Mot tang so senong ngga usey go kalik.
Blong duoyap naklay Iram Yesus lo mea neyboy
8 No, motnang go kunala duing sang meno. Motnang lo duing go, “Genamnang naklay go dega. Atnang go wali, blong ey mo tram. Woy Dem ey iram so atnang mo temuit gabe. No, ngga kalik go Paulusnang logo kua tebok.” Gabe pen-asitugu, “Iram so motnang pu go, iram dali so atnang gabe.”
9 No, atnang-a ngga kalik kua! Genam lo duing go: atnang, tamot-tamot nogo ku seni sogo sip-a Ki Wali Iram lo mo taling. But go kebong so idekeba iti go sedue kalik. Ngga tang so, kukunan go suongku no, Ki Wali tamot ey, sikabung eygo lo ikum go, don kua go nebleng klik genang so atnang ngge mo itak gabe. 10 Seni so, Iram Yesus nogo puplu so atnang-a gabe suing. No, motnang-a Iram Yesus logo kunala blongdon eygo so way so mo pung. Atnang don mo kua, motnang-a don ey mo kok. Motnang sui ey, way so atnang-a sui mo kenip gabe sang. 11 Se senong: nggeasui go ku no pung go, ten suey so atnang kua dedam, bunu tra go kua drop. Amka kua kok goso susuing. Atnang no demun bubut go, tebadali sip kua go kalik gabe uwet sang. 12 Ide kangok go takebali, ten-bu sogo atnang lo gabe usey sang. Kemla atnang so pu go, Ki Wali Iram logo ngengam-a way so gabe uwadong. Atnang no iseng taling go nogo, tom-a tup go Iram Yesus-a gabe kekeng. 13 Atnang no nebut piam go sikabung lo wayang go, way so susuot nebut-a mea pu. Yang! Kukunan sikabung go nasrok so, kui so mo lemoy.
14 Motnang no ngge naklay klik-situgu go, motnang suongsut genang so kua, no motnang senong genang. Motnang nogo, at go duo nogo kalik nebut drom gabe king-situgu. 15 Se senong: Iram Yesus ba no motnang so ngunguok go klui, mata so, aya-a klaya seguong gabe. Deguo teguop motnang sono at lo taling go, Iram Yesus logo so, motnang go aya so genam-a gabe lemoy. 16 Ngganemot sogo so, drom gabe king-situgu, “Genam logo kalik motnang se keng dali!” 17 Ngga nang so, Timotius, at go duo Woy Dem ba nogo, mot-dak go, motnang sono gemang koklong. Iram Yesus no dabui lo tupduk go nemot gabe kekeng. Motnang nogo, Iram Yesus ey genam uwali go, motnang tandali senong genang, nemot lo mea pen. Yakena-yakena sogo blong duoyap no, at lo mo taling go walitap kalik. 18 No, motnang eygo sikabung temu gemang. Nemotnang lo duing go, “Tandali imot mit nogo Paulus yakua weng.” Ngganemot so, blo sono nemot go sui-a gemang i-iti. 19 No, Woy Dem lo iwat go, keda so motnang mit no genam mea weng. Ku ngganemot no mea senong: sui blo no i-iti go, seni ey? Nebutpen seguong-a? Nemotnang don ey? Kua? 20 Se senong: Woy Wali Iram tamlak go blongdon duduing ngga nebutpen seguong-a kua. No, don ey gabe pupung. 21 Motnang logo, sogo kalik so mo duing? Genam lo motnang nogo didemun ey ya weng? Klum so, dabui suot-suot so ya weng? Motnang lo se pen!