5
Blong duoyap ba sogo konkebamling
1 Yang! Ibe mo senong: motnang nesip no, sikamea suk kua go gemang lemoy. Sedue gemang, nglangin go senun ey kamea-kamea so uwet go. Esang! Ki Wali Iram kua senong go kukunan sikabung logo, tasam ngga yakua pluok. 2 Nemot-a ngga kalik uwet go, motnang-a, dabui nogo ta ey gemang tegue dega. Motnang lo duing go, “Imot go walitap suey dato go.” Kua! Motnang, suongsut tra go, u ey se kluo! Ngga ey, motnang nesip sik sogo, sedue ngga pu go se klong. 3 Yang! Genam, saysuk ey kua pung go, waglo ba lo motnang ey gemang. Nggano, motnang eygo kalik, tasam ngga tang so, imot go Woy Dem Yesus go sui ba no, idekeba sedue ngga nogo mo taling gemang. 4-5 Wali Waglo ba no imot yaluim go nogo, Woy Dem Yesus go blongdon ba no, ‘Londa’ go ta sono sedue ngga imot lo mea itak. Wali ngge-a sesop go, Woy Dem go ku nogo, nemot go seni-a sesuoy genang.
6 Yang! Dabui ta motnang lo tegue go, ngga piam. Motnang kua senong? Konkebamling seguay dato golo, wali suey go naklay mea waluk. Kua kay: degit seguay go logo, muk naklay mea seguo! 7 Degit buin ngga sono se betep! Muk inim so motnang, lemoy genang. Seni so, sikabung go wali buin itak genang Paska nogo Domba Nok, Iram Yesus tang go-a mo tong gabe. 8 Ngganemot sogo so, weng-a yakay ey se suing! Seni eygo teguop go Iram Yesus ey got-eyon go, walop-a ya dam. Wali buin piam eygo, taybat ey klay gono, kua suing go dam!
9 Ku nayum gono, motnang nogo sam ba no genam mo klik-yu, “Sikamea duo ey sikamea kabung eygo motnang ta kua keduik!” 10 Ngga kalik pu-tugu go, kukunan sikabung, kamea eygo, bontui duo, wamoy eygo, didemu no ta so kokong go, naklay motnang ey ta kua keduik genang so, kua. Ngga kalik go, kukunan ngge sik sogo motnang pung go se klong dali. 11 No, seni so, genam go duduing ngge kalik gabe: Nando lo duing go, “Blong duoyap genam ngge gabe”, no, maning sikamea so, bontui so, didemu no ta so kokong go, nebut iwot so, bu-a dedrop go, nggano, wamoymlue-a sesemu go, nemotnang eygo-a ta keduik go, ten usi go, klay gono kua dam seni! 12 Sogo temoy no, dia idi sogo sikabung nogo, imot ya klong go neyboy? Blong duoyap seguong logo-a, imot wet go se ikum! 13 Dia idi sogo sikabung ngga, Ki Wali Iram lo mea neyboy. Blong duoyap-a demu ngge se keng: taybat so pupluok go, blong duoyap sik sogo yat go nase pung!