2 KORINTUS
1
Sam so tenuing go suey
1 Genam ngge Paulus. Ki Wali Iram go duduing no, tamot so Woy Dem Iram Yesus lo temuit go gabe lemoy. Ki Wali Iram go blung yakena Korintus nogo, nan Akaya naklay sogo blong duoyap nogo so sam ngge, imot go dem Timotius ey golo gabe kiklik. 2 Ki Wali Iram, imot go Wali Aya ey, Iram Yesus, imot go Woy Dem eygo sik sogo taitiklum, ngengam yakay, senang so motnang ey mea susuing.
Nenem yakay don iti genang nuik
3 Ki Wali Iram, imot go Woy Dem, Iram Yesus go Nglangin, Ki Wali Aya gabe. Nemot go ndengtabang ba no imot yay gabe got-ton. Nemot Klum Iram! 4 Koywong iseng ba sogo nogo, atnang go dabui Nemot lo don gabe kok. Ngga ey, Ki Wali Iram sik sogo, gualaklum tang sogo so, koywong iseng ba sogo blong duoyap don kok genang mang, atnang lo gabe kiking. 5 Yang! Blong Dem lo tra go koywong iseng temu, damoy ey tey genang, klay gono Nemot ey gabe lek-eton. Ngga kalik dali, Ki Wali Iram sik sogo gualaklum, Iram Yesus logo so, damoy ey imot nogo gabe tetey.
6 Koywong iseng atnang tamot-tamot lelek go, way so motnang-a, sesuoy so wali genang don so, gabe lelemoy. Se senong: atnang no gualaklum uweng go ngga, motnang nogo gualaklum dali gabe. Koywong iseng, motnang lek dali go, gualaklum ngga kalik golo motnang don eygo mea suing. 7 Motnang nogo so atnang duduing bubung go, seni ey gabe. Suey so ngge atnang gabe senong: atnang kalik koywong iseng motnang lek go, atnang no iti go gualaklum motnang mea wawi dali.
8 Dem-debui, blong duoyap! Se senong: nan Asia no atnang lo lek go idekeba ide dega ey. Yang! Kebong sogo kalik tra go nogo, atnang go don ey se kua. 9 Atnang lo duing go: kebong genang idekeba mo pu gabe! No, ngga sik so gabe senong, “Atnang go don logo ta kua itak. No, Ki Wali Iram go don lo gabe lemoy. Nemot don dega. Nemot lo iwat goso, kebong sik sogo sedue mea nglong.” 10 Seni so, Sikebong go ta sik sogo, suey so atnang mo sesuoy gabe. Tandali-tandali Ki Wali Iram lo mea pluok. Nemot seguong sono duduing bubung ngge gabe: yansi go sesuoy so atnang wawi go mea pung dali. 11 Yang! Ki Wali Iram no atnang sogo dewi motnang lo keklak golo mo tebok dali gabe. Atnang no gualaklum iti go tang so, blo sono Ki Wali Iram go sui, sikabung mata sogo lo gabe i-iti.
Korintus go blong duoyap ey Paulus ngengam so duing go
12 Ayanang, mianang se senong! Ki Wali Iram go taitiklum tang so, walikebali atnang lo gemang mo semu. Kukunan sik sogo senongduduing go don no kua. Dabui tategue ey gabe pen-asitugu: Ki Wali Iram lo iwat go, seni eygo nemudi sogo tap-a, atnang logo mo keng. Kukunan naklay nogo, motnang nogo tap ngga mo blong gabe. Ngga atnang go dabui iku tang golo gabe yang. 13-14 Sam-sam ba nogo motnang ikum go ngga, atnang lo duing go ey naklay mo kerlam gemang. Nemot-a nggeasui go maning naklay kua mlak go, Woy Dem Yesus go ku nogo, suey so naklay motnang lo yang go se mlak, “Paulus lo duing go, seni eygo nemudi so nemotnang se lemoy!” Ngga ey, genam sogo ta unen motnang lo mea pegat. Way so motnang nogo ta unen genam lo mea pegat dali.
15 Genam go duduing suey so motnang lo wawi go, da klaya seguong kua, da namon so motnang ey tegu genang so genam mo duing. 16 Genam lo duing go: nan Makedonia no koklong go, tap lo motnang mit no mea degut. Nggano tandali uweng go, motnang ey tandali mea tegu. Ngga sik so, nan Yudea nogo atnang go tap masi, motnang lo tebok genang. No, esang duduing ngga kua lemoy sang. 17 Tegadi ngga kua lemoy go, idi lo genam mo iwot? Genam iti-tui sogo sedue? Nggeasui mea pu: ‘yang.’ Utep mea pu: ‘kua?’ 18 Kua kay: nemudi sogo Ki Wali Iram-a gabe! Nemot go sui no gabe pen-asitugu, “Genam lo pu go ‘Yang’ ngga yang! ‘Kua’ ngga kua! Ngga seni so.” 19 Ngga kalik Iram Yesus, Ki Wali Danon logo gabe. Nemot lo ‘yang’ go, ‘kua’ sogo, yakua iwot. Iram Yesus ngga, Ki Wali Iram sik so ‘Seni’ gemang. Silpanus dem, Timotius dem, genam eygo lo Nemot tang go-a tetaling go gabe. 20 Iram Yesus logo tang so, tegadi so Ki Wali Iram lo dok-ngam go naklay, gabe lelemoy. Ngga sik so, Iram Yesus ba no imot logo mea pu, ‘Yang seni!’ Ngga tang so, blo sono Ki Wali Iram go blong imot lo mea iti. 21-22 Seni so: walikutrui klaya go blo no atnang, motnang naklay ey Ki Wali Iram tang golo mo nik. Kutrui ngga Iram Yesus gabe. Yang! Nemot go blong duoyap so kuoy go imot mo temuit-sing gabe. Ngga ey, yansi go senang wali blong naklay iti genang, imot go dabui ba nogo baynang so Wali Waglo-a mo king gabe.
23 Se tup! Ki Wali Iram lo mo senong gemang! Gabe pen-asitugu: taybat maning kua nebuem go tang so, yakena Korintus no da namon tete sogo genam kua klong. Ngga ey, dabui ide motnang tra genaning. 24 Genam lo duing go ngge kalik gabe: seni so, Woy Dem Yesus no, waysagi ey imot gabe mlak. Ngganemot sogo so, motnang ta lo kua plong gabe. No, genam, motnang ey tegu golo motnang nogo yakay kangok dega so pung genang.