GALATIA
1
Sam tenuing genang
1-2 Ayanang, mianang! Genam eygo anduasiyap logo suey motnang nogo gabe pupu.
Sam ngge motnang, Ki Wali Iram go blong duoyap, nan Galatia sogo naklay nogo so, genam, Paulus lo gabe kiklik. Se senong! tamot sogo genam sikabung lo kua taling. No Blong Dem Yesus ey Ki Wali Iram eygo lo genam mo kuoy. Yangga: Blong Dem Yesus so tandali nglong go Ki Wali Iram.
3 Imot go Ki Wali Aya ey Woy Dem Iram Yesus sik sogo taitiklum, nenem-yakay, motnang blo so mea gigit. 4 Se senong: imot go piam konkebamling suep genang so, Iram Yesus go saysuk mo iti. Ngga ey, duduing kua seni golo kukunan ta mlak go sik sogo, imot ta itak genang so, Iram Yesus mo kebong. Yangga Ki Wali Aya go duduing no naklay mo lemoy. 5 Yang, Ki Wali Iram go blongiway iti genang, tong kua tong. Seni!
Deguo teguop seni eygo klaya seguong
6 Ayanang mianang! Banim no Blong Dem sogo deguo teguop, motnang nogo nemudi so genam lo mo pen-nangu. No, esang, motnang sogo ta wasrang ey gabe goglok. Yang, nemot-a, Iram Yesus logo klum ba no, motnang Ki Wali Iram lo mo yaluim go, keda seni so ne teguey. Ngga ey, deguo meno, a genam lo taling go ey kua kerlam go sono, ne mo keng. 7 Se duing! Deguo teguop klaya seguong. No, klui temu gemang. Iram Yesus logo deguo teguop, nemotnang lo paysing so ngunguok go. 8 Blong Dem sogo deguo teguop, genam lo pepen go ey kua kerlam go-a, nando lo ngunguok go, nemot nogo kisebui Ki Wali Iram lo mea taling. Seni so, nemot-a tap nega genang ngga genam tang golo ngunguok go, blo sik sogo Kiwali tamot lo ngunguok go, kisebui mea taling dali. 9 Pen-atu go ngganemot, tandali gabe pen-asitugu, “Deguo teguop idi lo nguok go, motnang lo keng go ey kua kerlam go, klui ngganemot nogo kisebui Ki Wali Iram lo mea iti.” 10 Ngga kalik pen-asitugu go, sikabung ey Ki Wali Iram eygo lo genam go sui-a blo no iti genang so? Ngga kalik kua. Seni so, ngga pupluok go, Iram Yesus go kebali sedue so, genam yakua pu. 11-12 Ayanang, mianang, se senong! Seni so, deguo teguop genam lo pen go ngge sikabung logo kua duduing go, sedue sik so genam kua tup go, sedue lo genam nogo kua nguok go, no, Iram Yesus tang golo ngap gono, genam mo senong.
Ki Wali Iram lo mot-dak go kekayso Paulus lo mo pluok
13 Yang! Genam go wali banim go, sedue Yahudi go tap no keng go iway, nggano blong duoyap tang ey buin genang so, usey-aku go, motnang mo senong. 14 Seni so, genam eygo da, sedue Yahudi go tap naklay keng go, andua meno eygo kua kerlam. Nggano babuasi lo taling go demu kekeng go, genam sesrok kua. 15-16 No, se senong! Genam maning kua tui gono, Ki Wali Iram tang go duduing no mo kuoy. Nggano, Nemot go gualaklum tang sogo so, Nemot go tamot so mo temuit go, Nemot go Danon, genam go wali ba no ngap go gabe ikum. Ngga sik so, saula-saula nogo, Nemot sogo deguo teguop, at lo pepen klong genang. Ku ngganemot nogo, sikabung meno lo mangking genang, genam kua usi. 17 Nggano Iram Yesus lo banim kuoy go tamot temu Yerusalem sogo, Yakobus, Petrus, Yohanes ey tegu genang, genam kua klong. No, kekayso nan Arabia go kaseglokpay lo genam mo uwet. Walong so ngga lo uwet gono, yakena Damsik sono tandali gemang weng. 18 Yagui nangglik dali no, yakena Yerusalem nogo, tamot Kepas ey tegu genang so, genam mo klong. Minggu namon yam so nemot ey genam mo suing. 19 Tamot temu eygo kua tegu, no, Woy Dem go ntaton Yakobus-a mo ikum. 20 Ki Wali Iram mo senong: genam lo klik go ngge, seni gabe! Wamoymlue kua. Ki Wali Iram lo mot go-a, kekayso at lo mo pluok. 21 Nggano yakena Yerusalem sik sogo, beap idi lo nan Siria ey nan Kilikia eygo lo gemang klong. 22 Se senong: nan Yudea sogo blong duoyap eygo genam kua tegu-srenangu. 23 Seni so, genam sogo ngge kalik blong duoyap ngga sogo lo gemang pen, “Imot tuk go tang ey buin genang so usey-akam go Paulus, nggeasui go, Iram Yesus nogo deguo teguop, way so nemot lo gemang pen-akunton. 24 Yang seni so! Iway ngga tup go tang so, Ki Wali Iram go blong iway nemotnang lo mo iti.”