EPESUS
1
Sam tenuing genang suey pu go
1 Ayanang, mianang yakena Epesus sogo, suey gemang! Genam ngge Paulus, Iram Yesus go tamot so, Ki Wali Iram go duduing lo mo kuoy. Blong duoyap yakena Epesus sogo, Ki Wali Iram go blung, motnang gabe. Iram Yesus no dabui lo motnang klay gono mo keng go nogo so, sam ngge gabe kiklik. 2 Imot go Ki Wali Iram ey, Woy Dem Iram Yesus eygo gualaklum, nenem-yakay motnang blo no senang so mea gigit.
Woy Dem ey klaya lemoy golo imot Ki Wali Iram lo sesuoy go
3 Ki Wali Iram, imot go Woy Dem, Iram Yesus go Nglangin, iway blo dega so! Iram Yesus ey klaya lemoy go tang so, taiti teguop Ki Wali Iram sik sogo, blong dia yakena ba no dali-dali ta go, imot nogo gabe uweng.
4 Se duing! Kukunan ngge maning kua klik-ngam gono, gualaklum ba no, imot dali Ki Wali Iram lo mo kuoy-ngam. Iram Yesus ey klaya lemoy golo, Ki Wali Iram go suongku no, teguop seni so imot ip genang. 5 Yang! Iram Yesus ey klaya so lemoy go, Nemot go danonnang so temuit genang, imot Ki Wali Iram lo mo pu-ngam. Ngga, Nemot go duduing no iwat-ngam go gabe. 6 Ki Wali Iram go taitiklum katu eygo iway iti genang so, Nemot go Danon dabuidalip-a, imot sesuoy genang so, mot-dak go mo li gabe. 7 Ngga ey, Blong Dem tang go kin pi go tang so, kuklue piam konkebamling go don sik sogo, imot plet-lak go, kuklue naklay gabe suep-sing. 8-9 “O, Ki Wali Iram, klum nuik. Mot go taitiklum katu eygo, atnang sono mo taling! Mot go blongdon, senongduduing lo, Mot ba so gigit go, suey so dia no gabe pla-sing. Yang, Iram Yesus logo tang so, At go duduing naklay teguop so mea lemoy-sing.” Ngga Ki Wali Iram lo pu go. 10 Duduing ngganemot, ngge kalik gabe, “Yansi go, Blong Dem, Iram so temuit gono, ut blo sogo naklay, nan blo sogo naklay, Nemot go masi ba no mea yaluim-sing.”
11-14 Iram Yesus sogo ngge kalik go se senong:
- Iram Yesus ba nogo Nemot go blung so imot lemoy genang.
- Takuduen sik so, Ki Wali Iram lo pu go imot mo kuoy gabe.
- Nemot lo duing go kalik, Nemot go duduing no, ngge naklay lemoy go gabe.
- Ngga Ki Wali Kumam!
- Kuduong so Sesuoy Iram-a duduing ey bubung go,
- Ki Wali Iram go sui-a blo sono iway se iti!
- Yang, Iram Yesus ba no deguo teguop seni eygo, motnang mo tup;
- Ngga, piam go ta ba sik so motnang so plet go deguo teguop gemang.
- Iram Yesus dabui ba no motnang lo iti go tang so,
- tegadi so dok-ngam go Ki Wali Waglo, motnang ba no mo king.
- Ngga sik so senong genang: motnang ngge Ki Wali Iram go blung.
- Wali Waglo king golo ngge imot gabe senong:
- sesuoy tegadi Ki Wali Iram lo dok-ngam go,
- imot, Nemot go blung nogo, teguop so naklay mea lemoy.
- O, Ki Wali Iram! Mot go sui iway blo dega so!
Sam ngge iti genang so Paulus lo dewi pu go
15-16 Yang! Sesuoy tegadi ngga Ki Wali Iram lo iti go tang so, nggano Woy Dem Yesus no motnang dabui lo kekeng go, ngga ey Blong duoyap naklay nogo klum, kangok so motnang lo tetaling go, tup go tang so, Ki Wali Iram nogo taitisuey kangok so genam gabe pupu. Nggano, motnang sogo dewi tong kua tong gabe. 17 Ngge kalik so dewi gabe pupu: Imot go Woy Dem, Iram Yesus go Nglangin, blongdon naklay go min gabe. Genam usi go, “Motnang nogo senongkalong eygo, mot go waglo ba no mea pung.” Ngga sik so, Ki Wali Iram go duduing neguon sono taling go, motnang mea ikum. Ngga logo so, Ki Wali Iram tang go suey so mea senong. 18 Se duing! Nggeasui go, motnang Ki Wali Iram lo usi go mo pu gabe. Ngga tang so genam lo dewi pu go, motnang go dabui ba nogo senongblong mea ngap. Ngga ey, motnang lo duduing ey bubung genang seni, lemoy go mea ikum. Yangga blongdon dega eygo, dali-dali ta go, blong duoyap naklay no iti genang. 19 Ngga ey, motnang senong dali genang: Yesus no dabui iti go keng go sikabung go wali ba nogo, Ki Wali Iram go kebali, don kangok dega gabe.
20 Blong Dem kebong sik sogo, don kangok go ngganemot lo tandali go gabe nglong. Ngga ey, sip blo dega sogo, kangok go Blong dia yakena ba sogo, Ki Wali Aya go ta semlea idi-a, Nemot no gemang itak. 21 Iram Yesus go sipsuing blo dega so gabe. Ut ey nan eygo ta so mlak go kuasep don, nggeasui go, yansi go ku nogo ey kua kerlam. 22 Naklay-naklay Ki Wali Iram lo, Iram Yesus go masi ba no mekui go mo ta-sing. Nggano Nemot go blung no Iram sogo, Nemot-a mo temuit gabe. 23 Blong duoyap ngge, Iram Yesus go saysuk gabe. Saysuk ngga Nemot tang golo teguop so gabe bubuong. Iram Yesus tang go Ki Wali Iram go blongdon naklay lo teguop so buong go kalik.