1
Sam so tenuing go nebut
Pilipi 1:1-2
1 Iram Yesus go kebali sedue Paulus, Timotius dem ey golo, sam ngge klik go gabe. Sam ngge, Iram Yesus ba sogo blong duoyap ey, woy-woy, trang-trang ey yakena Pilipi, nan Makedonia nogo gabe. 2 Ki Wali Iram, imot go Wali Aya ey, Iram Yesus imot go Woy Dem eygo sik sogo taitiklum, ngengam-yakay, senang so motnang ey mea gigit!
Blong duoyap sogo Paulus yakay ey
Pilipi 1:3-8
3-4 Dem-debui, blong duoyap! Kuno-woyno, dewi pupu go nogo, motnang sogo genam gabe duduing. Nggano Ki Wali Iram nogo, yakay ey taitisuey genam lo gabe pupu! 5 Seni so, Iram Yesus dabui ba no kuduong so motnang lo wawi go sik so, genam nogo walitap wasey genang, suey so motnang lo mo tebok. 6 Ngga naklay, tasam suey dato go! Seni so, genam mo senong: motnang ba nogo wali kebali teguop go ngga, Ki Wali Iram tang golo gabe pupluok. Yang, kuno-woyno Nemot lo semu go ngga, teguop dato so naklay gabe lelemoy, e... tandali Iram Yesus mea pung-ayon. 7-8 Yang! Ki Wali Iram mo senong! Iram Yesus go klum tang so, motnang sogo kangok so, kuno-woyno genam dabui gabe tetra. Ngga seni so, genam lo mo duing: genam nogo so Ki Wali Iram lo iti go taitiklum ngga, motnang go dabui ba no mo pung dali gemang. Seni so, boy ba sogo nogo, amble damoy so neyboy go nogo, imot dabui klaya mo iti. Yang! Motnang sogo genam go rley kangok dega.
Blong duoyap sogo dewi pupu go
Pilipi 1:9-11
9 Dem-debui, blong duoyap! Motnang sogo dewi, ngge kalik genam lo gabe pupu, “Kunala kalong ey, wali pega eygo lo klum ba no motnang se bebabu.” 10 Ngga lemoy go tang so, sueygo-piamgo kuoy genang mea senong. Neneyboy so Iram Yesus weng go nogo, blong ey teguop goso motnang ip genang. 11 Motnang go walitasam, Iram Yesus logo so, seni ey tagot go, ikum go tang so, Ki Wali Iram nogo sikabung temu lo ta kokong go, blo sono Nemot go sui iway mea iti.
Dabui yakay ey Iram Yesus no kekeng go
Pilipi 1:12-14
12 Dem-debui, blong duoyap, boy ba no genam betep go tang so, deguo teguop pen klong genang, sak kua kok gabe. No, ibe senong genang-a gemang mo tebok. 13 Se senong! Boy yay so susuing go plesedue, Gubernul go yap ba sogo kebali sedue, nggano yakena sikabung temu naklay, suey so mo senong, “Iram Yesus go walitap tang so, boy ba no genam mo betep.” 14 Seni so, boy ba no genam dok go tang so, ngge sogo blong duoyap temu, Iram Yesus nogo so don mo kok. Ngga tang so, suali kua goso ibe sono Ki Wali Iram logo deguo teguop nemotnang lo gemang nguokklong. 15-17 Yang! Ibe mo senong, “Deguo teguop don ey suing genang so, Paulus-a Ki Wali Iram lo mo taling.” No, esang! Sikabung temu gemang dali: genam sogo dabuipiam ey, nemukum eygo sik so, Iram Yesus go walitap nemotnang logo gemang ngunguok. Yang! Genam boy ba sogo dabuilek genang so, kunala kua seni golo nemotnang gemang ngunguok. Ngga ey, blo sono nemot tang go sui-a pupu genang so. 18 Kua kay! Kunala suey golo, kunala piam golo ngunguok go, nueya, genam yakay ey. Dabui lo kua go, lom seguong lo ngunguok go, Iram Yesus go walitap-a mo pepen klong gemang! Ngga naklay sogo, genam yakay-a gabe ya tetra.
Kebong-wali nogo kunala duing
Pilipi 1:19-26
19 Yang! Sogo-sogo genam no lemoy go, genam yakay ey. Genam mo senong: dewi motnang lo pupu go tang so, genam Iram Yesus sik sogo Ki Wali Waglo lo gabe sesuoy. 20 Kangok so ngge kalik genam gabe duduing: Iram Yesus go sui sogo genam suongsut kua. Yang! Wali so susuing go, genam but go kebong go, naklay ngga lo, blo sono Iram Yesus go sui-a se i-iti. 21 Seni so, maning genam susuing go, ngga suey! Iram Yesus seguong nogo gabe. No, but go kebong go-a, seni suey dato! 22 No, maning saysuk ngge ba so got-tugu go, Iram Yesus nogo seni tagot genang so gabe. Tap nago-a genam logo ya kuoy? Genam kua senong. 23 Ngga idi-ngge idi sono genam go duduing mo lelek. Genam kebong go, Iram Yesus ey klay gono suing genang-a, suey dato, kukunan so susuing go ey kua kerlam. 24 No, tandali motnang no tebok sogo so, saysuk ba sogo genam gabe. 25 Yang! Ngga kalik kangok so duing go sik so, gabe senong: klay gono motnang ey genam mea suing. Ngga ey, kangok so yakay ey Iram Yesus nogo motnang duduing genang. 26 Yang! Tandali motnang ey genam tegu go, genam no lemoy go tang so, Iram Yesus sono dewi motnang lo ngge kalik mea klak, “Taiti suey! Mot go don logo so atnang gabe uwali!”
Wali inim sogo nebutmang
Pilipi 1: 27-30
27 Dem-debui! Kangok so ngge-a se duing, “Deguo teguop Iram Yesus lo taling go ey, motnang se uwali.” Yang! Weng go ikum go, kua weng go tup go, ngga sik so genam mea senong, “Dabui klaya motnang iti go, don ey ip go, suey so dabui lo deguo teguop mlak genang, kangok so gemang usey.” 28 Ngga ey, deguo teguop so wayang go sikabung nogo, suali kua tra. Seni so, motnang dabui don kok go ikum go tang so nemotnang lo mea senong, “Ku sono atnang Ki Wali Iram lo mea betep.” No, motnang mea senong, “Sesuoy sogo, atnang-a gabe ip!” 29 Se senong: motnang nogo taitiklum Ki Wali Iram lo mo iti gabe. Ngga, Blong Dem no dabui iti go keng genang seguong-a kua, no iseng Nemot nogo so iti go, mea lek dali! 30 Yang! Kuduong so motnang ey tegu gono, deding ba lo don ey walitap so genam koklong go, nggeasui go maning genam gabe koklong. Ngga naklay motnang tang so ikum go, mo tup dali. Ngge suey: genam ey klay gono, walitap ngganemot don ey motnang gabe uwet.