2
Way-way klum ey blong duoyap se
Pilipi 2:1-4
1-2 Blong duoyap se tup! Klay goso Iram Yesus ey mo susuing go, Nemot sik sogo klum so mang king go se mlak! Ngga ey klaya so, Wali Waglo lo dok go, way-way klum tetaling go, ngge se semu: kunala klaya se duing! Nggano, dabui klaya klum logo so se lemoy! Walitap klaya go seguong lo se koklong! Ngga kalik pupluok go, teguop so genam go yakay mea pupung. 3 Mot go saysuk seguong nogo-a kua uwet. Sui blo no pu genang sogo-a, kua pupluok! No, ku no suing go, blo sono way-way so andua meno go sui-a se pupu! 4 Sikabung meno nogo ey duing go, se pupluok! Mot go saysuk seguong nogo-a kua duduing!
Blong Dem kalik ku sono motnang se
Pilipi 2:5-11
5-11 Ku sono motnang go dabui-a, Blong Dem kalik se suing! Seni so, yatrang suey go, Nemot lo mo taling gabe.
Yang! Iram Yesus nemot-a,
Ki Wali Iram tang go ey kerlam go, ngge kua duing:
sipsuing blo dega sogo kua itak-selu.
No, blong naklay Nemot tang golo itak go,
ku no li go koybutasemu so mo lemoy.
Yang, Blong Dem sedue so lemoy go,
Sikabung so mo wali.
Sedue so ku no suing go, ngga ey,
Ki Wali Iram lo pu go nebut no tupduk go,
e... di no glung go mo kebong.
Ngga tang so, blo sono Nemot Ki Wali Iram lo mo wawi.
Ngga ey, Nemot go sui-a Blong Iram so mo temuit.
Iram meno-meno eygo Nemot go sui kua kerlam.
Ngga ey, nebuem nebit eygo naklay,
Ki Wali yakena, kukunan blo, nan ba sogo, unuik-sing go,
Nemot seguong nogo-a, ta mea kokong.
Nemot go suongku no ibe pluep golo mea pu-netogon,
“Imot go Woy Wali Iram, Iram Yesus gabe!” (Yesaya 45:23)
Ngga tang so, blo sono Ki Wali Iram go sui mea i-iti.
Kukunan blo nogo blong so se ngap
Pilipi 2:12-18
12 Yakena Pilipi sogo blong duoyap! Motnang ey genam susuing go nogo, suey so tupduk so Iram Yesus no motnang mo keng! Nggeasui go, at damoy so kua go nogo, ngga kalik dali, don dega ey se kekeng! Ki Wali Iram nogo suali ey, susuoy genang tap-a, dabui lo motnang se usey.
13 Kua kay! Ki Wali Iram lo iwat go tang so, motnang ba nogo kebali, duduing ey, kuno-woyno Nemot lo gabe pupluok.
14 Walitap lo koklong go, nebut segut kua goso kebali se pupluok! Uwaydang kua goso, se keng. 15 Ki Wali Iram go danonnang kon kua go, teguop goso motnang-a se suing! Ngga sogo so, sikabung temu lo neyboy go, motnang go kon yakua ikum. Yang! Waluk genang tang ngge nesip no, Ki Wali Iram sik sogo sagoy so, motnang-a mea ngap-sing. Wali genang sogo deguo-a, waysagi ey mlak go se susuing! 16 Ngga ey Iram Yesus weng go ku nogo, motnang no ikum go, genam yakay mea tra. Ngga ey, genam mea pu, “Seni so! Motnang nogo so seguot kangok so genam pung go seni gemang. Tebadali go kua usey.” 17 Yang! Nemot-a walikebali so motnang pupluok gono, ide lelek go, nggano, genam kin pi go, but go kebong go, ngga naklay ba logo so, yakay ey klay gono imot gabe. Se senong: ngga Ki Wali Iram nogo so puit go taiti! 18 Kua kay! Ki Wali Iram nogo yakay-a genam ey motnang lo se tetaling.
Timotius Pilipi sono Paulus lo mot-dak go
Pilipi 2:19-24
19 Blong duoyap! Iram Yesus no genam duing go tang so, keda so motnang mit no Timotius dem-a genam lo pu go mea klong. Motnang lo pupluok go tup go, dabui yakay ey genam mea. 20 Seni so, kangok so motnang sogo genam ey klay gono, Timotius gabe duduing. Andua temu eygo kua kerlam.
21 Esang! Yakena Roma ngge sogo genam eygo andua temu, kangok so Iram Yesus go tap nogo kua duduing. Nemotnang go saysuk nogo-a gabe usey-neton. 22 Se duing! Timotius ngga keng genang andua gabe. Banim walikebali pluok genang so, suey so genam no Timotius lo mo tebok. Nglangin no danon lo tebok go kalik.
23 Genam nogo idekeba Kaysar lo taling go senong gono, keda so motnang mit no nemot-a mot-dak go mea klong. 24 No, seni so, at lo duing go: ku walong luik gono, Woy Dem go don logo so, motnang mit nogo genam mea klong dali.
Pilipi no Epaploditus dem pu go klong go
Pilipi 2:25-30
25 Dem Epaploditus, genam no tebok genang so motnang lo mot-dak go mo weng. Yang, genam go andua so nemot mo lemoy. Kebali kangok so, genam ey nemot ey klay gono mo semu. No, nggeasui go, genam lo duing go, “Ngge suey, tandali nemot mot go, motnang mit no mea klong.” 26 Esang! Nemot sadui srek go iway, motnang mo tup dali, ngga tang so dabui ide ey nemot gabe.
27 Sadui tra golo, i go nemot kebong so se! No, Ki Wali Iram go gualaklum logo so, tandali mo suey. Yang! Nemot seguong nogo-a kua, no, genam nogo Ki Wali Iram go gualaklum mo tra dali. Nemot kebong go sik sogo, tandali genam dabui lek go, kangok so u gemang ne ya kluo. 28 Ngga tang so, tandali keda so motnang mit sono genam lo pu go nemot mea klong. Nemot ey tegu gono, motnang yakay genang. Ngga ey, nemot sogo genam dabui mea kua lek dali.
29-30 Se senong: motnang lo genam no tebok genang, way sogo, nemot lo mo tebok gabe. Nemot go wali naklay Iram Yesus go kebali semu genang so mo iti. Ngga tang so, i go seni nemot kebong so se. Yang! Nemot blong duo suey go. Blong Dem ey klay gono nemot gabe uwali. Yang! Nemot pung go nogo, yakay suey se uwawi! Ngga kalik go sikabung-a, blo sono sui se iti!