3
Seni sogo yakay
Pilipi 3:1-11
1 Ayanang, mianang, blong duoyap! I-go sogo gabe pen-asitugu, “Kuno-woyno Woy Dem ba nogo tang so yakay se.” Ngga, banim motnang tebok genang so, mo pen-ayu! Tandali yakay nebut ngge klik sogo genam yakua besam gabe.
2 No! Tap piam so nguok go klui-klui-a, kunala temoy no motnang se! Nemotnang lo pupluok go, “Ki Wali Iram no keng sogo, saduisuktong genang so Musa lo taling go se keng dali!” No, klui-klui ngga, uduo kalik tebadali kueng-a sesegue go gemang. 3 No, saduisuktong go ngga, saysuk temoy nogo tap. Kebalitap ngge-a imot gabe kekeng: Ki Wali Waglo go don lo imot go dabui-a mo tong. Imot go blongdon, Iram Yesus-a gabe. Nemot go sui iway-a gabe i-iti. Saysuk go don logo imot yakua ip. 4 No, klui temu lo duing go: atnang go walitap naklay dega go! Way so ngge kalik mea pen-asilu: ngga kalik go tang so, kangok so saysuk go tap-a genam mea taling. Tap ngga go seni ikum genang so, genam lo usey go, sikabung meno eygo kua kerlam. 5-6 Se tup! Ngge kalik genam go wali mo lemoy: maning kinsay sogo no, ku taidisonangglik tete no, genam go saduisuk a mo tong. Tang Benyamin b sik sogo, genam ngge gabe. Sedue Iblani seni. Yahudi go demu sogo, suey so demutrui no kekeng go sedue Parisi, genam ngge gabe. Esang! Demutrui no keng go tang so, Iram Yesus go blong duoyap, tang ey buin genang so, don ey genam lo mo truik. Yahudi go demu sik so ikum go, sedue naklay go dega genam gabe. 7 Yang! Banim Yahudi go tap so, genam lo duing go: ngga suey go, seni eygo tap. Nggeasui go, Iram Yesus logo tang so, senong go: tap ngga seni kua! 8 At lo duing go, “Kukunan go tap naklay, blong ey seni eygo, kua gabe.” Blong ngga, Iram Yesus go blongdon dega eygo, kua kerlam. Yesus seguong-a, genam go Iram gabe! Seni so, Nemot go blong genam ba no don ey suing genang so, tap temu naklay nasrok so genam logo se ikum! 9 Klay gono Iram Yesus ey suing genang-a, don ey genam gabe u-usey. Demutrui sik sogo, saysuk go duduing no yam so keng go logo, seni eygo yakua ip. No, Iram Yesus no waysagi ey mlak go tang so, Ki Wali Iram lo iti go tap seni eygo, nemudi sogo lo genam gabe koklong.
10 Aya-mianang! Iram Yesus go seni senong genang-a, dabui lo genam gabe u-usey. Yangga, Nemot so nglong go blongdon tra genang-a, gabe wet-tugu. Yang! Iseng Nemot lo tra go, kebong go tap lo klaya so lemoy genang-a, genam gabe duduen. 11 Ngga ey, Blong Dem kalik dali, nglong genang-a genam gabe duduing.
Iram Yesus go duduing-a se uwet
Pilipi 3: 12-16
12 Se senong! Walitap yam so segu go sogo, genam maning kua pung. Naklay keng go sedue sogo, genam maning dali. No, Iram Yesus go duduing lemoy genang-a, kangok so gabe usey-situgu. E... nemot go seni genam lo mea mlak. Iram Yesus tang golo, genam mlak go kalik. 13 Blong duoyap! Genam kua duing, naklay genam mo mlak. No, ngge-a genam gabe kekeng: tandali mesip sono go genam se kay-sing! No, tap seguong lo nemudi so genam go nemu gabe iyalap. 14 Ngga kalik don ey koklong golo, Ki Wali Iram sik sogo nali genam lo iti sogo. Dali gigit go nali ngga, kikiwali blong gemang. Iram Yesus logo so, kikiwali ngga iti genang, genam Ki Wali Iram lo mo pu. 15 Yang! Imot wali naklay seni so segu go sedue, ngge-a se duduing: nali ngga iti genang sogo, nemu tuisotuigo se kapklong. Nago no, maning suey so kunala naklay kua mlak go, motnang nogo Ki Wali Iram lo mea taling dali. 16 No, ngge-a se keng: Ki Wali Iram go tap logo, nemudi seguong so imot se koklong!
Paulus go wali kalik blong duoyap se
Pilipi 3: 17-21
17 Blong duoyap! Tasam-tasam genam lo pupluok go ngga, motnang keng genang gemang! Nggano, atnang lo pupluok gono keng go sikabung temu ngga, motnang nogo yatrang dali gemang. 18 Kunala temoy no se! Sikabung mata so gemang tap meno lo koklong go. Genam lo taling go walitap nemotnang kua keng. Da mata so nebutmang ngge at lo mo pen. Tandali unebu ey gabe pen-situgu, “Iram Yesus di no glung go kebong go seni, paysing go pedueng so nemotnang logo duduing.” 19 Ki Wali Iram nogo nemotnang ta kua kokong gemang. No, nemotnang go saysuk lo duduing go taybat-a, kukunan lo duing go-a, suongsut kua goso, ta ey gemang kokong. Ngga kalik koklong go, i go sogo nemotnang mea waluk! 20 Imot-a ngga kalik kua! Ki Wali yakena nogo sogo sikabung, imot gabe. Ngga ey, Ki Wali sip sik sogo Sesuoy Iram-a imot logo se bubung! Ngga, Iram Yesus, imot go Woy Wali Iram. 21 Yang! Iram Yesus go blongdon kangok dega. Ku-nan, taut naklay, Nemot ba no pu go mea suing-lak. Imot go saysuk don kua go ngge, Nemot go don kangok golo, tandali inim so, Nemot go saysuk blong dega eygo kalik, Nemot lo mea iwot-sing!