4
Blong duoyap lo wali genang
Pilipi 4:1-9
1-2 Aya-mianang, blong duoyap! Motnang ey tegu genang kunala, nggano motnang sogo yakay kangok so genam gabe tetra. Genam nogo blongdon eygo nali motnang ngga gemang. Se tup! Woy Dem ey klaya goso lemoy go tang so, don ey motnang se suing-lak!
Andua Eyodia debui ey Sintike debui eygo! Sagui kua goso, dabui klaya, Woy Dem nogo don ey mot namon se suing! 3 Nggano, Sisikus dem, andua sop suey go nogo, at lo gabe usi, “Debui namon ngga nogo, suey so mot lo se tebok!” Seni so, banim go, walitap pen klong genang sogo, dabui klaya iti go don ey debui namon ngga genam ey mo suing. Nggano, Klemens dem ey andua-andua temu ey go, ngga kalik mo tebok dali. Yang! Nemotnang go sui, Kiki Wali sam ba no mo klik gemang. 4 Blong duoyap! Woy Dem ey klaya goso motnang lemoy go, yakay ey kuno-woyno se susuing! Yang! Tandali pu-situgu go, “Suey so yakay ey se susuing-lak!” 5 Ngga ey, suey-a dabui lo duduing go, gigling eygo-a, wakot-wakot so motnang anduasiyap lo se ikum! Yang! Woy Dem mo dagu gabe! 6 Wali genang sogo kunala, ide ey motnang kua tra! No, dewi ba no ngge kalik kunala duing naklay-a Ki Wali Iram sono se pu, “Ki Wali Iram taitisuey! Genam nogo pla tebok-a.” 7 Ki Wali Iram dewi ngga tup go, ngengam yakay nuik sik sogo don, motnang no mea iti-kuntogon. Yang! Ngengam-yakay ngga, kunala ey, ta eygo logo yakua mlak. No, Iram Yesus ba no motnang go kunala ey dabui eygo Ki Wali Iram lo yay mea susuing.
8 Aya-mianang, blong duoyap! I go sogo, ngge-a se keng: kunala seni ey go-a; blong ey i-iti go-a; nemudi sogo-a; susuot sogo-a; malo-malo sogo-a; tom-tom so tutup go-a; tasam suey go-a; suey so pupu genang seguong-a; naklay motnang lo se duduing! 9 Seni so, kuduong so Iram Yesus logo walitap iti go-a, genam lo nguok go, genam go wali no ikum go yatrang-a, naklay keng go motnang se pupluok! Se senong: Ki Wali Iram ngengam yakay nuik gabe. Yatrang ngga naklay keng go, kuno-woyno motnang nogo ngengam yakay mea uweng.
Taut ey wali eygo nogo nebut
Pilipi 4:10-14
10 Aya-mianang! Yam sogo no, genam go wali no motnang lo taiti tebok genang ku mo pung gabe. Seni so, walong so ku ngganemot sogo mo bung-sanyu. No, motnang go ku kua go tang so, keda sogo kua pung. Yang! Ngga iti go tang so, genam nogo nenem yakay Woy Dem logo gabe iti. 11 Ngga kalik pen go, taut kua goso genam kua. Taut kua go, nueya! Saysuk yay suing genang, genam mo mlay. 12 Taut kua goso susuing, genam mo senong. Taut mata sogo genam mo senong dali. Genam wali ngga naklay mo tra: nutemoy go; tenday go; taut eygo; taut kua go; nemot go seni genam mo ikum. 13 Se senong! Iram Yesus go don logo so genam don gabe ip.
14 No, wali genang so taiti motnang lo iti golo, genam go ide temu motnang lo tebuo go, ngga nemot lo! 15 Yang! Ayanang, mianang, yakena Pilipi sogo. Motnang mo senong! Banim nogo, Yesus go walitap so nguok gono, nan Makedonia sik so motnang go yakena no pung go, way-way so ta keduik go mo tebok-esanyom. Yakena meno logo ngga kalik go kua semu. 16 Seni so, yakena Tesalonika a so maning go nogo, atnang nogo drang, suey so motnang lo mo iti dali. 17 Suey so se duing! Motnang lo iti go duoy so, genam kua uwet. No, motnang nogo seni Ki Wali Iram lo tetagot genang-a, genam gabe duduing. 18 Senong genang so gabe pen-asitugu: Epaploditus, motnang lo mot go weng logo duoy naklay, suey so genam lo mo iti. Ngga, nemot lo! Genam go wali nang sogo, duoy ngge naklay gabe. Seni so, duoy ngga Ki Wali Iram lo iwat go taiti kinemon eygo so mo klak. Ki Wali Iram dop go, Nemot yakay kangok. 19 Ki Wali Iram, Ki Wali Kumam gabe.
Nemot go ta ba so blongdon naklay gemang gigit.
Iram Yesus ey klay gono motnang susuing go, wali genang sogo taut naklay, suey so Nemot lo mea iti. 20 Yang! Ki Wali Iram, imot go Wali Aya. Nemot go sui-a blo no senang so se pupu! Seni!
Nebut yam sogo
Pilipi 4:21-23
21 Suey gemang! Blong duoyap naklay Iram Yesus ba sogo nogo suey, genam sik sogo se pen-sing! Nggano, genam eygo andua-andua logo suey, motnang nogo gabe pupu dali. 22 Suey, ngge sogo sikabung temu logo gabe pupu dali. Yang! Suey banom sogo, Roma go Kaysar go yap ba no yaluim go blong duoyap logo gabe pu-situgu.
23 Motnang naklay eygo Iram Yesus, imot go Woy Dem sik sogo taitiklum-a mea gigit.