1
Sam so tenuing go
Kolose 1:1-2
1-2 Ayanang, mianang! Yakena Kolose sogo blong duoyap, Blong Dem ba no dabui klaya iti go, Ki Wali Iram lo kuoy go. Suey gemang!
Genam ngge Paulus. Iram Yesus go tamot so Ki Wali Iram go duduing lo mo taling. Sam ngge, imot go andua Timotius dem eygo lo, gabe kiklik. Yang, Ki Wali Iram, imot go Wali Aya! Motnang blo so Nemot logo taitiklum, ngengam yakay senang so mea gigit.
Dewi taitisuey pupu go
Kolose 1:3-11
3-4 Motnang sogo atnang lo tup go, suey dato: Woy Dem Yesus, Iram so motnang lo mo wawi! Nggano blong duoyap temu nogo, motnang go way-way klum gemang. Ngganemot sogo so, dewi ba no taitisuey, Woy Dem Iram Yesus go Nglangin, Ki Wali Iram sono, senang so atnang lo gabe keklak. 5-6 Ngge kalik go duduing bubung-a motnang gabe, “Ki Wali yakena ba no atnang nogo so, tegadi Ki Wali Iram lo dok-ngam go, dali-dali ta-sing go mo i-iti gabe.” Yang! Kuduong so deguo teguop seni eygo ngga tup go sik so, tegadi ngge motnang lo mo mlak. Ngga kalik dali, kukunan blo no deguo teguop ngga pen klong golo sikabung go wali nogo seni ey gemang uwasey. Deguo ngga tup go sik so, Ki Wali Iram lo sesuoy go tap motnang senong go, don ey gabe tetagot dali.
7 Seni so, tap ngga motnang no andua Epaplas dem lo mo nguok-nayom. Nemot ngga, Iram Yesus go kebali sedue, kengduk seni gemang. Motnang nogo kebali, kangok so nemot lo gemang usey. 8 Atnang nogo, ngge kalik Epaplas lo mo pen, “Wali Waglo go don lo, motnang go way-way klum gemang tetaling.” 9-11 Se senong! Nebut ngga tup go sik so, dewi senang so ngge kalik atnang lo gabe pupu,
- Ki Wali Iram go senongduduing naklay, Nemot go Waglo logo so, motnang lo senong genang!
- Ngga mlak go tang so, Ki Wali Iram go suongku nogo, Nemot lo iwat go blong duoyap so, motnang se uwali.
- Motnang ba no tasam suey go pupluok go, seni mata so mea tagot.
- Ki Wali Iram go senongduduing, suey so motnang ba nogo mea pupung.
- Motnang nogo don Nemot go blongdon lo mea kok. Ngga don ey motnang suing genang.
Ngga motnang sogo dewi atnang lo keklak go.
Ki Wali Iram nogo taitisuey iti go
Kolose 1:12-14
12 Ki Wali Iram nogo taitisuey yakay ey motnang logo se pupu! Yang! Tegadi so motnang tete so Ki Wali Iram lo dok-ngam go taiti ngga, Ki Wali yakena no dali-dali mo ta-sing gemang. 13 Ku klik go don sik sogo imot Ki Wali Iram lo mo sesuoy. Ngga ey Danon dabuidalip go blongdon ba no, imot Ki Wali Iram logo so mo nik gabe. 14 Danon ngga tang so, imot mo senong, “Ngga ey kon bu mo lu. Konkebamling go don sik sogo imot gabe plet-dak.”
Blong Dem go blong taling go
Kolose 1:15-20
15-20 Yang! Ki Wali Iram go blong-pega, nemu lo kua ikum go,
Danon lo mo taling gabe.
Se duing: ngge naklay maning kua lemoy-ngam gono,
Nemot-a klayking got-akam.
Ngge-ngge naklay Danon logo tang so
Ki Wali Iram lo gabe lemoy-ngam.
Yangga, ut ba logo, nan blo sogo,
nemu lo i-ikum go, kua i-ikum go,
nggano, kukunan tasomlak go: kuasep, naliwabu, don naklay,
Danon ba no mo klik-ngam.
Seni so: ku-nan ngge, Danon tang so, Danon nogo so,
Ki Wali Iram lo semu-ngam go gabe.
Yang! Naklay-naklay maning go nogo, Danon-a gabe.
Ngge-ngge naklay Danon seguong no dangpok go.
Nemot go blung nogo, Danon-a wengkabui,
blong duoyap-a Nemot go saysuk so gabe.
Danon ngge wali min!
Keduong seni so nglong go, Nemot-a gabe!
Danon seguong-a klaya seni,
blung nogo tap naklay so taling go.
Ki Wali Iram tang so mo duing,
“Genam go wagloblong naklay,
Danon klaya go ba no se king go gigit!”
Ngga ey, Danon logo tang so,
di no glung go, kin pi golo,
ut ey nan eygo ba sogo naklay,
tandali Ki Wali Iram tang go ey ngengam genang.
Blong duoyap nogo so Paulus lo mangking go
Kolose 1:21-23
21 Banim go, maning Blong Dem lo kua keduik go nogo, Ki Wali Iram sik sogo, motnang ket dega so. Nemot sono sagui-a pluok-keaka! Ngga naklay tasam piam go-a miam ey pupluok go sik so mo taling. 22 No, nggeasui go, Ki Wali Iram motnang ey ngengam genang, Blong Dem sedue so pung go kebong golo, tandali tegan mo keduik. Yang! Kon kua tebok goso, seni ey, teguop so wawi go, Ki Wali Iram go suongku no, motnang ip genang. 23 Ngengam go tap ngga-a senang so dabui lo motnang se keng. Motnang go duduing bubung yakua nega genang, deguo teguop sik sogo don-a, motnang kutrui gemang! Deguo teguop ngga kukunan blo sogo sikabung no pen go mo tup. Ngga nang sogo so, tamot so genam, Paulus mo lemoy.
Iseng ba lo Paulus lo kebali sesemu go
Kolose 1:24-29
24 Kua kay! Imot nogo iseng Blong Dem lo mo lek gabe. Ngga tang so, wali kebali ba no iseng tetra go seni ngga: Blong Dem go saysuk, ngga Iram Yesus go blung no, maning kua lemoy go iseng temu, genam lo gabe lelek. Nggeasui go, motnang nogo so iseng tra-tugu go yakay ey gabe. 25 Blong duoyap tebok genang kebali, Nemot go deguo teguop seni naklay motnang no taling genang, genam Ki Wali Iram lo mo mot-dak gabe. 26 Yangga: kuku so babuasi nogo, ngga ba no kok go, a nggeasui go Ki Wali Iram go blung nogo so, dia no mo plet-lak. 27 Yang! Ngga ba no kok go duduing, blong duoyap nogo Ki Wali Iram lo taling so gabe. Ngga sik so, nemot go seni ngge saula-saula naklay lo senong genang, “Iram Yesus ba nogo-a wali inim iti genang duduing mo pung gabe. Yangga, motnang ba so susuing go Iram Yesus gemang.”
28 Yang! Sikabung nogo, kunala kalong ey Iram Yesus ngganemot-a, atnang logo gabe taling klong. Ngga sik so, sikabung naklay nogo nebut mang kiking go, walitap gemang ngunguok. Atnang go duduing ngge kalik gabe, “Iram Yesus ba nogo-a sedue klay-klay yam so se segu!” 29 Ngganemot lemoy genang sogo, kangok so kebali genam lo don ey gabe pupluok. Yang! At go dabui ba no Iram Yesus don kok golo, don ey genam gabe u-usey.