1 TESALONIKA
1
Blong duoyap go wali, dabui iti go keng go ey
1 Dem-debui! Blong duoyap yakena Tesalonika, nan Makedonia sogo, suey gemang. Sam ngge atnang, Paulus, Silas, Timotius eygo lo klik go gabe. Ki Wali Aya ey Woy Dem Yesus eygo blung, motnang gabe. Taitiklum, nenem-yakay, motnang blo so mea gigit.
2-3 Motnang tang sogo so, taitisuey Ki Wali Iram sono, kuno-woyno atnang lo gabe keklak. Ki Wali Iram go suongku no ngge kalik gabe duduing. Yangga:
- dabui iti go keng go tang so, tasam-tasam seni ey motnang lo tetagot go;
- mot go klum don eygo;
- Iram Yesus, imot go Woy Dem, tandali pung genang sogo duduing bubung go.
Ngga naklay motnang nogo so keklak go dewi gabe.
4 Dem-debui, blong duoyap! Atnang mo senong: Ki Wali Iram lo klum go tang so, Nemot go blung so, motnang mo kuoy gabe. 5 Yang! Ki Wali Waglodon dega eygo lo taling go sik so, motnang senong go gabe kekeng. Nebutpen seguong logo-a kua. Yang, atnang go wali motnang nesip nogo naklay motnang ikum go mo senong.
6 Atnang lo taling go yatrang ngga, suey so motnang lo mo keng. Ngga ey, Woy Dem mo keng dali. Nemot-a, atnang lo pepen go koywong iseng dega ba logo, yakay ey deguo teguop motnang lo mo wawi. Yakay ngga Wali Waglo lo iti go gemang. 7 Ngga ey, blong duoyap nan Makedonia ey Akaya eygo nogo yatrang suey goso motnang mo lemoy. 8 Woy Dem go deguo teguop mo dayap, motnang sik so e... nan Makedonia ey nan Akaya ey naklay mo tup. Seni so, motnang Ki Wali Iram no dabui iti go kekeng go iway, sip meno sono mo pung dali. Atnang pung go nogo, motnang no lemoy go naklay, nemotnang mo senong. 9-10 Yangga:
- sogo kalik so atnang motnang lo wawi go;
- naliwabu go tap sik sogo, motnang teguey go;
- Ki Wali Iram sono way so dabui iti go keng go;
- Ki Wali Iram klayking sono ta kokong go;
- ut sik so weng genang Danon so duduing bubung go: ngga Yesus, Ki Wali Iram go don lo Nemot mo nglong, kisebui sik sogo imot sesuoy genang so.