2
Yakena Tesalonika no Paulus lo pluok go kebali
1 Dem-debui, blong duoyap! Motnang tang go mo senong: motnang mit sono atnang klong go tapmasi, tebadali kua, no, seni gemang. 2 Esang! Motnang mit no maning kua pung gono, yakena Pilipi nogo, wayang go, koywong iseng kangok so mo lek. Ngga naklay motnang lo mo tup. Nemot-a ngga kalik lemoy go, Ki Wali Iram go don kok golo, motnang mit no Nemot sik sogo deguo teguop nisonoso klong go mo pen. Tap ngga lemoy genang so, kangok so atnang lo mo usey gemang.
3 Se senong: kunala piam go, wamoymlue so, nega genang tap so, ibe sono atnang logo kua pepen klong gabe. 4 Sikabung go sui uwet genang-a, atnang logo kua wet. No, Ki Wali Iram go dabui no but genang-a, atnang lo gabe pepen klong. Yang, atnang go dabui Ki Wali Iram gabe i-ikum. Nemot lo iwat go tang so, deguo teguop ngga pepen klong genang, atnang go ta sono Ki Wali Iram lo mo itak gabe.
5 Motnang mo ikum: atnang lo pepen go, neblengiblon ey duduing kua seni sik so, nagluim genang so kua pen. Ngga Ki Wali Iram mo senong. 6 Atnang go sui-a sikabung lo, motnang sik sogo lo pu genang so, kua uwet gabe.
7 Nemot-a, Iram Yesus lo mot-dak go tamot go don, genam gabe uwawi. No, motnang ey go nogo, mia lo duo so wegeng go kalik, atnang lo mo gigling. 8 Motnang nogo klum kangok go tang so, Ki Wali Iram sik sogo deguo teguop seguong-a atnang kua pepen. No, wali dui ey iti genang atnang so gabe duduing. 9 Kua kay! Motnang eygo nogo, kangok so kebali seguot ey atnang lo mo pung. Use-wadikua, motnang no idekeba so glung genaning, ngga mo usey. Ngga kalik go tap lo, Ki Wali Iram sik sogo deguo teguop, atnang lo mo bluim klong.
10 Atnang sogo, motnang ey, Ki Wali Iram tang go logo mea pen, “Yang, dabui lo, nemudi so, teguop so, blong duoyap imening keng go ey, Paulusnang mo suing.” 11 Yang! Nglangin lo duoyap nogo kalik, motnang klay-klay nogo genamnang lo mo taling. Ngga motnang mo senong. 12 Ki Wali Iram lo iwat genang-a motnang uwali go, ngga don ey atnang lo mo taling. Ngga ey mot go wali tang so, Ki Wali Iram sono ta kokong genang. Seni so, Woy Wali Iram go blongdon senongduduing genang, motnang Nemot tang golo mo usi gabe.
13 Deguo atnang lo pepen go ngga, sikabung sik sogo kua, Ki Wali Iram tang go sik sogo kalik, motnang lo mo iti. Ki Wali Iram logo deguo, seni ey gabe: dabui iti go keng go tang so, motnang go wali nebuem genang, deguo ngga lo gabe pupluok. Ngga ey, kuno-woyno, Ki Wali Iram sono taitisuey gabe keklak.
14 Dem-debui, blong duoyap, se senong! Nggeasui koywong iseng motnang lo tetra go ngga, nan Yudea sogo Ki Wali Iram go blong duoyap mo lek dali. Motnang no idekeba iram-tegay lo tetaling go ngga, Yahudi go iram-tegay lo taling go ey mo kerlam. 15 Esang! Nabi-nabi ey Woy Dem Yesus eygo, iram-tegay Yahudi lo mo but-nengam. Ngga tang so, koywong iseng eygo lo atnang yam so gabe iyat. Yang! Sikabung naklay ey Ki Wali Iram eygo sono, nemotnang gabe i-ikle. 16 Esang! Saula-saula sesuoy genang deguo teguop atnang lo pepen klong go, sak nemotnang lo gemang kokok. Ngga kalik golo, nemotnang go kuklue gemang dedamoy. Ngga ey, nemotnang blo nogo Ki Wali Iram go kisebui gemang tui.
Blong duoyap ey tegu so Paulus duduing
17 Dem-debui, blong duoyap! Nemot-a nggeasui go sip banom-banom so imot gabe. Nemu logo kua ikum, dabui ba nogo klay goso imot gabe. Se senong: motnang sogo dabui tetra go tang so, tegu genang kangok so atnang gabe u-usey. 18 Seni so, motnang ey tegu genang, at tang so mo tetaut, no, tap Kupiam golo gemang pupuem.