3
Timotius mot-dak go klong go tandali weng go
1-4 Dem-debui, blong duoyap! Esang, motnang ey kua tegu go, atnang nogo deding ba lo! Ngge sik so atnang lo susuang go, “Tesalonika blong duoyap maning don ey?” Ngganemot sogo so Timotius dem-a mot-dak go, motnang mit no mo klong. No, atnang-a namboy yakena Atena no mo suing. Timotius ngge, Ki Wali Iram go kebali sedue suey go, klay gono deguo teguop atnang ey pen klong go, nemot gabe. Yang! Nemot go mangking sik so, motnang don kok go, nggano Yesus sono dabui iti go, motnang ba nogo don ey pupung genang, ngga atnang lo duduing go.
Se duing: maning motnang ey Tesalonika so klay goso suing go nogo, motnang teguey genaning atnang lo mo pen, “Yansi go koywong iseng imot mea lek-eyon.” Koywong ngga, seni so motnang lo mo lek! Ki Wali Iram go duduing no ngga lelemoy go gemang. 5 No, walong so dabui gabe rlek, “Atnang go seguot pung go, dabui iti go motnang maning kekeng? Mo nega? Kupiam golo mlue go tang so, seni kua lemoy?” Ngga senong genang so, Timotius mot-dak go mo klong gemang.
6 No, nggeasui go, nebut suey go-a Timotius tandali mo weng. Nebut ngga tup go sik so, atnang go dabui ba nogo yakay mo pung. Motnang sogo nebut, ngge kalik Timotius lo mo pen, “Dabui iti go don ey, way-way klum suey so Tesalonika blong duoyap lo gemang tetaling. Nggano, imot lo taling go tap senang so nemotnang lo gemang duduing. Yang! Imot logo kalik dali, tegu genang, kangok so nemotnang gemang pupluok.” Nebut ngga Timotius dem lo mo pen.
7-8 Dem-debui, blong duoyap! Timotius lo pen go sik so, nggeasui go dabui ba yakay lo atnang gabe trang. Se senong: Iram Yesus no dabui iti go motnang kekeng go, nggano don ey motnang ip go sik so, atnang go wali ide eygo don tandali mo kok. Yang! Woy Dem Yesus motnang go kutrui gabe. 9 Ki Wali Iram don dega ey. Nenem-yakay Nemot lo iti go kangok dega. Sogo kalik go taitisuey-a Nemot sono way so atnang logo ya klak? 10 Se senong: kuno-woyno, motnang ey tandali tegu genang, dabui lo dewi gabe keklak. Ngga ey, Iram Yesus sono dabui don maning motnang kua kok go, atnang lo tebok genang. 11-13 “O, Ki Wali Iram! Ki Wali Aya! O, Iram Yesus! Woy Dem! Atnang go dewi ngge kalik gabe:
- Blong duoyap Tesalonika ey atnang tegu genang tap, Mot lo se kebuo;
- Blong duoyap Tesalonika sogo way-way klum, nggano sikabung naklay nogo klum, kangok so se tebok! Atnang logo klum nemotnang nogo kalik se lemoy dali;
- klum ngga ba no koklong go, Woy Dem Yesus logo don motnang ey se susuing.
Ngga ey Woy Dem Iram Yesus blong ba lo uweng go, Ki Wali Iram, Mot go suongku nogo, teguop so nemotnang ip genang! Seni! Atnang go dewi ngge no yam!”