2 TESALONIKA
1
Sam so tenuing go suey
1-2 Dem-debui, blong duoyap Tesalonika sogo. Sam ngge genamnang, Paulus, Silas, Timotius eygo lo gabe kiklik. Ki Wali Iram, imot go Ki Wali Aya ey, Woy Dem Iram Yesus eygo blung, motnang gabe. Taitiklum, nenem-yakay Nemot sik sogo, motnang blo so mea gigit.
Seni eygo nemudi sogo kisebui
3 Dem-debui. Kuno-woyno motnang tang so Ki Wali Iram nogo taitisuey atnang lo gabe keklak. Ngga seni so dabui lo atnang lo gabe pupluok. Yang! Iram Yesus no dabui iti go don ey motnang gabe kekeng. Ngga ey way-way klum don ey gabe tetaling dali. 4 Blong duoyap temu ey tegu so klong go nogo, motnang go sui-a yakay ey gabe pepen, “Blong duoyap Tesalonika sogo Iram Yesus no dabui iti go tang so, iseng eygo ide lek go nogo don ey senang so gabe ip.”
5 Ngga sik so gabe senong: seni eygo nemudi sogo kisebui-a Ki Wali Iram logo gabe tetaling. Se ikum: nggeasui go iseng ey ide motnang lo lelek go Woy Wali Iram go tap lemoy genang sogo gemang. No, Woy Wali Iram go blung so degut genang don-a, motnang nogo gabe iti. 6-8 Yang! Piam so pupluok go nogo, suey so pupluok go nogo, nemudi so Ki Wali Iram lo mea taling. Ku ngganemot no, blong dia yakena sik so, Kiwali tamot ey blong ba lo li go Blong Dem Yesus mea ikum-kelo. Koynebleng ba lo li-yon go, Ki Wali Iram no ta kua kokong sikabung, Woy Dem Yesus go deguo teguop tupduk kua go, idekeba-a mea iti. Se senong: motnang no koywong iseng so tetaling go sikabung, koywong dali-a way so mea iti. No, iseng ey maning motnang lelek go-a, atnang ey ide ngga, mea tebuo-sing. 9 Se senong: piam so pupluok sikabung ngga, Woy Dem go blongdon sik sogo mea yat. Senang so dia so mea susuing. 10 Ku ngga, iway iti genang ku gemang! Iway Nemot go blung lo mea keklak. Yang, Iram Yesus no dabui iti go naklay lo ta mea kokong. Se senong: deguo teguop atnang lo pen gono, dabui iti go tupduk go keng go tang so, Nemot go blung ba nogo motnang mea ip dali. 11 Ngga tang so, kuno-woyno motnang sogo dewi gabe keklak: Ki Wali Iram lo usi go, suey so motnang se duduing. Ngga ey, Ki Wali Iram go don lo teguop so se u-usey! Yang, nggeasui go, Woy Dem no dabui iti go don lo naklay-naklay se pupluok! 12 Ngga kalik lemoy go, motnang go wali ba no Yesus go sui iway blo sono motnang lo mea iti. Ngga ey way so motnang go sui blo sono Woy Dem lo mea iti dali. Ki Wali Iram ey Woy Dem Yesus ey go taitiklum lo ngga gabe lelemoy.