2
Woy Dem pung sogo no lemoy genang tasam
1-2 Dem debui, blong duoyap! Woy Dem Iram Yesus pung go, motnang ey klay gono suing genang sogo, ngge-a dabui lo gabe pen-asitugu, “Kunala meno-meno tup golo keda so motnang negap go kua boglui.” Motnang tup go, “Woy Dem Yesus mo pung gabe.” Ngga kua keng! Seni so, deguo ngga kalik go atnang sik so tup go, sam ba no ikum go, kua keng dali. Ngga piam so duduing go gemang.
3 Sukmeno-sukmeno so sikabung lo nebut i-iwot golo, motnang ey nega genaning. Seni so, Woy Dem pung genang ku maning kua lemoy gono, banim temu no tasam-tasam ngge-a se lemoy. Iram Yesus no dabui iti go sik sogo sikabung mea paysing. Nggano, Woy Dem so uwayang genang plesi mea pung. No se senong: plesi ngga, idakoy no Ki Wali Iram lo puit go, nega genang so mo pu gemang. 4 Yang! Ki Wali yap ba no, plesi ngga go iram demu mea klik. Ngga ey, Ki Wali Iram sik sogo teguop go naklay, nemot lo mea waydang. Nemot tang go sui-a blo so no mea pupu dega. Nemot lo mea pen, “Genam tang go Ki Wali Iram gabe.” 5 Mo kay? Maning motnang ey gono, Wamoy iram ngganemot pung genang, genam lo mo pen-anangu.
6 Nggeasui go, sogo don lo ngga maning luep go gigit, ngga motnang mo senong. No, Ki Wali Iram lo kuoy go ku no, dia sono go Nemot go plesi ngga mea pung. 7 Nggeasui go, nemot-a ibe maning kua senong, yakot so Woy Iram sogo plesi, kebali ta mo mlak gabe. Yang! Banim, nemot so luep go don-a. a ngga sono se iti. 8 Ngga blo idi lo, Woy Dem go plesi dia nogo mea neguon. Nggano Woy Dem Yesus pung gono, lom ba lo pung go nebit lo plesi ngga kekayso but go mea kebong. Woy Dem go blong teguop pung golo mea kuim.
Sikabung go tap Wamoy iram lo nega eygo
9 Kupiamgo don dega lo, Woy Dem sogo plesi ngganemot mea pung. Wamoymlue lo damoy go tasam kangok go, mata so mea pupluok. 10 Nemot go tasam memlue golo, sikabung temu tap mea nega. Esang, Ki Wali Iram go tap seni eygo, nemotnang sesuoy genang so taling go, dabui lo kua wawi go tang so, nemotnang mea nega.
11 Ngga tang so, kuaseni go don-a Ki Wali Iram lo gemang iti. Ngga ey tap nega go, wamoymlue seguong no kekeng genang. 12 Nemot go seni: tap seni eygo dabui lo kua keng go, kuklue tap-a yakay ey pupluok go sikabung nogo, kisebui-a mea iti.
Sesuoy genang so blong duoyap mo kuoy
13 Ki Wali Iram lo klum go dem-debui sop, se senong! Motnang tang so Ki Wali Iram sono taiti suey-a, atnang logo se keklak. Seni so, wali teguop genang so, kuduong so Wali Waglo lo sesuoy go, motnang-a Ki Wali Iram lo mo kuoy gabe. Seni eygo deguo teguop-a dabui iti go keng go tang so, ngga gemang lelemoy. 14 Se senong: atnang lo deguo teguop pen gono, motnang Ki Wali Iram lo mo usi. Ngga ey, Woy Dem Yesus go blong ba no motnang wawi dali genang. 15 Dem-debui, don ey motnang ip go se susuing! Ngga ey atnang lo nguok go tap, sam no klik go, lom lo pen go-a, waysagi ey se mlak. 16-17 Se senong: Imot nogo guala Ki Wali Iram lo mo taling. Imot nogo don Nemot go taitiklum iti golo, duduingbung suey go ey gabe ip-eton.
Yang! Wali kebali motnang lo pupluok go ba nogo don kok go, dabui yakay mea pung. Woy Dem Iram Yesus tang go ey, Ki Wali Aya eygo lo naklay mea lemoy. Seni!