1 TIMOTIUS
1
Suey Paulus lo pu go
1-2 Genam ngge Paulus, Ki Wali Iram ey Iram Yesus eygo lo mot-dak goso, Woy Dem Yesus go tamot so mo lemoy. Yang! Imot so sesuoy go nuik, Ki Wali Iram. Iram Yesus-a imot go duduingbubung gabe.
Demsop Timotius! Iram Yesus no dabui klaya iti go, at lo nguok go tang so, mot mo keng. Mot nogo so, sam ngge gabe klik-situgu.
Ki Wali Aya ey imot go Woy Dem, Iram Yesus ey go sik sogo taitiklum, gualaklum, ngengam yakay, mot ey mea gigit.
Tap paysing so ngunguok go
3 Demsop! Nan Makedonia no genam klong sogo no, genam lo pu go kalik, gabe pepen, “Epesus so, mot se susuing! Walitap paysing genang klui temu, mot lo se bebat!” 4 Walitap paysing sogo ngga: mambut ey tang pung go-a nebut-a, tong kua tong goso pepen go. No, nebut ngga naklay ta lo sesemu go. Dabui lo Ki Wali Iram no keng go duduing pluok genang, ngga kalik golo seni mea kua tagot. 5 Klum pupung genang tap-a, mot logo se bubuong! Dabui iku lo dabuiklaut no, waysagi ey Iram Yesus no mlak go sik so, klum gabe pupung. 6 Esang! Klumtap suey so kua duduing go blong duoyap temu, way-way so seni kua go-a sosok golo, walitap mo nega. 7 Nemotnang lo duduing go: Musa logo demutrui-a, se ngunguok. No, esang! Ngga, nebut seguong-a pepen go, demutrui seni kua ikum. Tasam-tasam-a tetaling go, no, nemotnang tang go, seni kua mlak dali.
8 Imot-a mo yang gabe: Musa logo demutrui-a nemudi so keng go pupluok go, teguop dato. 9-10 Imot-a mo yang dali: Ki Wali Iram go suongku no seni eygo, nemudi sogo sikabung nogo so, demutrui kua iti. No, ngge kalik go sikabung nogo so mo iti:
- walidemu so seguoy go;
- walidemu no keng genang moy sogo;
- Ki Wali Iram no waydang go; piam-a pupluok go;
- wali nogo dewi kua bubut go;
- blo sik sogo teguop gono takong kua go;
- moy-ay ey sikabung eygo so bubut go;
- kamea tawaluk-a pupluok go;
- luandante sogo;
- nebut so iwot go;
- wamoymlue so tanat go;
tasam piam go naklay ngga so pupluok go, walitap seni eygo so uwaydang go sikabung nogo so, demutrui mo iti. 11 Deguo teguop ba sogo, walitap seni-a gabe. Yang! Ki Wali Iram teguop seni, blong dega ey! Genam go ta sono deguo teguop Ki Wali Iram lo mo itak.
Ki Wali Iram go klum tang so taitisuey pu go
12 Imot go Woy Dem, Iram Yesus sono taitisuey, genam Paulus lo gabe pupu. Yang! Walikebali don Nemot lo mo iti. Genam go ta sono Nemot go walikebali mo itak gabe. 13 Nemot-a, banim go, nebut piam kon eygo, yat go, kangok so genam lo mo kuklue. No, esang! Ku ngganemot nogo, dabui lo Iram Yesus maning kua keng go tang so, puplu go kalik, genam lo mo pluok. 14 No, genam blo sono Woy Dem go taitiklum naklay lo mo teglue. Ngga ey, genam nogo dabui iti go kekeng go don, gualaklum mo iti dali. Iram Yesus ba no imot suing go tang so ngga gabe lelemoy. 15 Walinebut ngge, seni so mo pen-nengam, “Kuklue, piam konkebamling eygo sikabung sesuoy genang so, kukunan blo no Blong Dem Yesus mo weng.” Piam eygo sikabung naklay sik sogo, genam-a piam kangok dega gabe. 16 No, Nemot go ndengtabang ba no, genam Iram Yesus lo mo wawi. Yang! Nemot go gigling kuduong sogo-a, genam no mo taling. Ngga ey, dabui lo Nemot no keng go sikabung wali inim mea iti. Ngga ngap genang, yatrang so genam mo lemoy gabe.
17 Ki Wali Mani Iram!
Nemu lo yakua ikum go.
Nemot-a, klay-kim gabe.
Senang so blo sono, Nemot go sui-a se iti.
Seni!
Timotius go ta sono walikebali Paulus lo itak go
18 Demsop, Timotius! Kua kay: ku nayum go nogo, senong eygo sedue a go lom lo, mot sogo nebut Ki Wali Iram lo mo pen. Tegadi ngga tang so, gabe pen-asitugu, “Walikebali mot go ta no gabe mo itak!” Mot go dabui ba nogo, suey so tegadi ngganemot-a se gigit. Waliple teguop go ba no mot koklong go, tegadi ngga mot go donple gemang! 19 Nggano, dabui lo Iram Yesus no waysagi ey mlak go, dabui iku seni lo waliple mot logo se usey! Se duing: blong duoyap temu gemang. Dabui iku nogo kua tup go tang so, Iram Yesus no keng genang walipega, naklay mo waluk. 20 Nemotnang ngga sik sogo: Imenius dem, Aleksander dem ey gemang dali. Ki Wali Iram wayang eygo so, Kupiamgo ta sono, sedue namon ngga, genam lo mo itak, sang.