2
Dewi pu genang tap
1 Demsop Timotius! Banim no at lo taling go ngge-a se pupluok: dewi ba nogo ngge se pu:
- taiti se wadong;
- senang so dewi se keklak;
- ibe dewi se pupu;
- Ki Wali Iram nogo taitisuey iway se i-iti!
Sikabung naklay wali genang dewi, ngga kalik se pupu! 2 Nggano, wengkabui-wengkabui, iram-tegay, trangkose sogo dewi se pupu dali. Kukunan blo nogo imot nogo walitema, nemotnang lo mea klik! Ngga ey, imot go wali suey go-a, susuot so suing-lak go, Ki Wali Iram iwat go-a dabui iti genang. Yang! Ngengam so imot mea suing-lak. 3 Ngga kalik go wali, Ki Wali Iram, imot go Sesuoy Iram go suongku nogo teguop dato. 4 Seni so, Ki Wali Iram go duduing: wali sesuoy genang, Iram Yesus logo walitap seni eygo-a, sikabung naklay lo senong go se mlak. 5 Ngga nang sogo, walitap seni, se senong. Yangga, Ki Wali Iram, dui ey klay-kim got-ton. Nggano, Ki Wali Iram sono tandali sikabung ngengam keduik genang dikuoytap klaya dali, ngga Iram Yesus-a klaya Duo. 6 Kukunan sikabung go ide way lek genang so, Blong Dem go wali dui ey iti go, kin pi golo mo ngengam. Ki Wali Iram lo iwat go ku lemoy genang, ngengam tap ngga ibe se senong. 7 Saula-saula nguokklong genang tamot so, genam Iram Yesus lo mo mot-dak. Ngge seni so! Wamoy so kua pen-atugu gabe. Ki Wali Iram kua senong go sikabung nogo walitap seni eygo taling genang, genam-a mo temuit gabe. Ngga ey, dabui lo Iram Yesus no keng go sikabung so nemotnang lemoy genang.
Dewi ba no pluep go nogo tap
8 Ayanang se tup! Dewi so yaluim go nogo, ngge kalik mang gabe kiking: dewi pu sogo nogo, blo sono ta-a iti go, dabui lo, dabuipiam kua goso, ngengam ey dewi Ki Wali Iram nogo, motnang lo se keklak!
9 Mianang kabung! Amka suey go, suey so ibe lo i-ikum go-a se kok. No, ngge kalik go yakua: betodop srem ey kut go; srem bumeno-bumeno emas lo semu go; ngoyundan, amka duoy blo sogo lo iti go; saysuk nogo-a kokok go, Ki Wali Iram nogo seni kua. 10 No, ngge-a ibe logo se ikum: Ki Wali Iram no dabui iti go kabung logo, dabui ba srem-a, tasam suey golo se glung-sing!
11 Mianang kabung! Walitap so ngunguok go nogo, sesuot so, tupduk so se!
12 Se tup! Sedue go da, kabung logo mea kua suing. Ngga tang so, ibe blo nogo sedue-a kabung logo yakua nguok. Ngga genam kua iwat. No, sedue ba no sesuot so kabung-a se suing! 13 Kua kay! Sikabung so semu go nogo, banim Adam, blong dem-a, sedue so Ki Wali Kumam lo mo semu-ngam. Ngga ey kabung so Epa, kluay debui gemang semu-ngam. 14 Kua kay dali! Kuklue ba nogo, Blong dem-a, banim Lema lo lek go, kua kenuong gabe. No, banim Kluay Epadebui-a kuklue ba sono Lema lo lek go mo pui. Ki Wali Iram lo sak kok go, kabung logo so gabe seguoy. 15 Ngga tang so walitap ngge, kabung lo se senong: Iram Yesus no dabui lo waysagi ey mlak go, waliklum dabui teguop go wegeng-a se koklong! Ngga ey, duduing, blongalay klaya seguong, Ki Wali Iram sono se iti. Suey so kekeng go kabung-a, duo tui genang, nebuemnebit yay Ki Wali Iram lo gabe sesuoy.