2 TIMOTIUS
1
Suey Timotius no Paulus lo pu go
1-2 Dem sop Timotius, suey gemang! Ngge, mot nogo so klik-situgu go sam gabe. Yang! Taitiklum, gualaklum, ngengam yakay, Ki Wali Aya ey imot go Woy Dem, Iram Yesus eygo logo, senang so mot ey mea susuing. Ki Wali Iram go duduing no, Iram Yesus go tamot so genam gabe temuit. Ngga ey, Iram Yesus ba so gigit go walitegadi, ibe no nguok genang so, genam mo mot-dak gabe.
Ibe sono deguo teguop pepen go suali kua tra
3 Seni so! Banim, babuasi logo kalik, Ki Wali Iram go kebali dabuiklaut no dabui iku lo gabe pupluok. Yang! Use wadikua go dewi so pupu gono, mot so dabui tra go, Ki Wali Iram sono taiti suey-a, gabe keklak. 4 Mot go unebu no duing go, mot ey tegu genang, dabui kangok so genam gabe tetra. At go yakay tram genang.
5 Yang! Dabui lo Ki Wali Iram no babu debui Lois ey, mia Eunike eygo lo kekeng go, mot ba nogo mo pung dali gemang. Ngga, genam mo senong. 6 Gabe pen-asitugu, “Walikebali nang sogo walipega, mot blo no genam lo tatui gono mo iti. Koy kalik boblon genang-a, walipega yay se suing!” 7 Se senong: imot blong duoyap, suali kua tra! Imot nogo so Ki Wali Iram lo iti go waglo, suali eygo waglo kua. No, imot nogo: klum, walipeli don kok genang waglo-a mo iti gabe. 8 Ngganemot sogo so, ibe sono imot go Woy Dem sogo deguo penklong genang, suongsut kua tra. Ngga ey, boy ba no Woy Dem tang sogo so genam dok go, suongsut kua tra dali. No, deguo teguop so penklong gono iseng tra go, Ki Wali Iram go don lo se lek dali!
9 Yang! Imot wali sono Ki Wali Iram tang logo mo sesuoy. Nggano, Nemot go kebali teguop pluok genang so, imot mo usi gabe. Ngga, imot go usey tang so kua, no, Nemot go duduing no taitiklum taling go sik so gabe pupung.
Yang! Ut-nan maning kua semu gono, Iram Yesus ba no, imot nogo so taitiklum ngga, dali ta-ngam go mo gigit. 10 No, nggeasui go ibe sono taitiklum ngga mo pung gabe. Imot sesuoy genang, Iram Yesus weng golo Sikebong don mo pedueng. Ngga ey, dia sono kikiwali-a deguo teguop lo gabe blong. 11 Deguo teguop ngganemot penklong genang tamot ey klui eygo so, genam temuit go gabe. 12 Temuit go tang so, boy ba no idekeba gabe tra-tugu. No, genam suongsut kua. Yang! Dabui lo genam keng go Iram Yesus mo senong. Genam no iti go waglo, Nemot go don lo mea gigit. E... Nemot go ku no mea pung. Ngga genam mo senong.
13 Timotius! Seni eygo kunala genam lo nguok ngga, nemudi so mot koklong genang gemang! Ngga ey, Iram Yesus ba nogo, klum ey kekeng eygo-a, waysagi ey se mlak. 14 Yang! Ki Wali Waglo, imot ba so gigit go don logo so, imot no iti go taitiwalipega teguop yay suey so se susuing!
15 Ngge, mot mo senong: seni so, nan Turki plopinsi Asia sogo sikabung temu lo genam mo itak. Esang! Pigelus dem ey Hermogenes dem eygo mo teguey dali. 16 No, da miam ey, genam yakay genang, dabui don, Onesiporus dem lo mo king. Yang, nemot-a genam boy ba sogo, nemot suongsut kua tra. No, yakay ey Onesiporus-a pung go, genam nemu gabe ikum. At lo dewi pu go, “Nemot go yaptenglam eygo, nemot, Woy Dem tang go ndengtabang ba lo mea uwawi.” 17 Yang! Yakena Roma no pung go nogo, banim seni genam ey tegu genang tap-a, nemot lo mo uwet. 18 Seni so, genam yakena Epesus nan Asia sogo nogo, suey so nemot lo mo tebok. Dem! Ngga, mot tang so mo senong! Woy Dem go ku nogo, gualaklum ba no suey so nemot gemang ya wawi!