TITUS
1
Sam so tenuing go suey
1 Titus Dem! Genam ngge, Paulus, Ki Wali Iram go koybutasemu gabe. Genam, Iram Yesus lo mot-dak go tamot. Ngga tang so sam ngge gabe klik-situgu.
Ki Wali Iram lo kuoy go duoyap dabui lo kekeng go, don kok go, nggano walitap seni ey tagot genang so, genam mot-dak go gabe. 2 Walitap seni eygo ngga koklong go, bubung duduing eygo, senang wali inim-a nemotnang no mea iti. Wali inim ngga, takuduen so tegadi Ki Wali Iram lo mo dok-ngam. Se duing: Ki Wali Iram logo yakua mlue. 3 Nemot tang so kuoy go ku no, tegadi ngganemot dia nogo gabe plet. Deguo teguop ngga pepen klong genang, genam go ta sono mo itak. Ki Wali Iram, imot go Sesuoy Iram lo mot-dak tang so, genam lo gabe pepen klong.
4 Dem sop, Titus! Sam ngge mot nogo so gabe klik. Woy Dem Yesus klaya gono dabui iti go keng go ba nogo tang so, genam go dem so, mot mo lemoy gabe. Ki Wali Iram ey, imot go Sesuoy Iram Yesus eygo sik sogo taitiklum, ngengam yakay, mot ey se susuing.
Wali kebali Nan Kleta no Titus lo pluok genang
5 Se senong: nan Kleta no mot genam lo itak go, wali kebali maning genam lo kua pluok go, suey so yam so mot lo semu genang. Ngga ey yakena-yakena nogo, genam lo taling kalik, blong duoyap go woy-woy mot lo se taling-sing. 6 Yangga: sedue teguop go-a; senun klaya go-a; Iram Yesus no dabui iti go keng go duoyap go moy-ay-a, se taling. Yang: ibe lo danonnang taybat eygo, tupduk kua goso yakua pu. 7 Nemot ngga, Ki Wali Iram go blung yay sogo woy gemang. Nemot go piam sono go, ibe logo yakua taling. Ngganemot sogo so, tasam-tasam ngge nemot logo kua pluok:
- naklay dega go sedue kalik dabui ta yakua tegue;
- dabuipiam keda sogo yakua;
- bu don eygo dedrop go logo yakua puplu;
- plesagui nemu-a yakua suing;
- drang nenagluim ey ya kua suing;
8 No, tasam suey go ngge-a se pluok:
- yap ba no glop wawi genang dabui lo duduing go;
- tasam suey go semu genang-a duduing go;
- duduing no ta ey mlak go susuing go;
- nemudi sogo-a pupluok go;
- wali teguop go-a tetaling go;
- wali wegeng ey susuing go.
9 Deguo teguop seni eygo no waysagi ey se mlak. Ngga, atnang lo taling go walitap gemang. Ngga ey, blong duoyap temu walitap suey so keng genang, mang se king. Walitap so wayang go sikabung nogo, nebut don ey pu genang. 10 Yang! Blong duoyap temu gemang. Tupduk kua go, nebut seguong-a pepen go, wamoymlue eygo gemang. Se senong: ngga kalik pupluok go mata so tang Yahudi sik sogo gemang. 11 Nemotnang go lom ta se wik! Yaptenglam mata so nemotnang go tap piam go tetaling golo gemang susuep. Drang lelek genang-a, piam so nemotnang logo gemang ngunguok. 12 Se duing: banim go nan Kreta sogo kunala sedue mo pen-ngam, a “Nan Kreta sikabung wamoymlue-a kangok so pepen. Uduo iseng eygo kalik, sesrok ey ten-a kiking go, nemotnang gemang.”
13-14 Kunala sedue lo pu-ngam go ngga, seni so gemang. Ngganemot sogo so, don ey mang ngge se king: walitap seni eygo-a waysagi ey nemotnang lo pupluok genang! Nggano, Yahudi go mambut pen tandali nemotnang yakua keng. Walitap itak go sikabung lo semu go demu-demu, blong duoyap blo sono go, yakua glung.
15 Se duing: Ki Wali Iram lo teguop goso yang go sikabung nogo, naklay-naklay mo teguop gemang. b No, kon ey go, Woy Dem no kua keng go sikabung nogo, naklay-naklay kon ey gemang. Kunala ey dabui iku ey kon lo mo saguip gemang. 16 Nemotnang lo pu go, “Ki Wali Iram genam mo senong gabe.” No, tasam pupluok golo, Ki Wali Iram gemang uwayang. Esang! Nemotnang naklay mo waluk, tupduk kua go, suey go-a pupluok genang yakua.