PILEMON
1
Suey pu go
1-2 Pilemon dem, suey gemang! Iram Yesus go sui tang so boy ba sono, genam Paulus betep go gabe. Boy ba sik so, dem Timotius ey mot nogo sam ngge gabe kiklik. Yang, mot ey mot go yap ba no iyaluim go blong duoyap ey, andua Apia ey Arkipus eygo nogo, sam ngge gabe klik-situgu. 3 Ki Wali Aya, Woy Dem Iram Yesus eygo sik sogo ngengam yakay, taitiklum, mot ey se gigit!
Ki Wali Iram sono taitisuey pu go
4 Genam go dewi ba nogo Ki Wali Iram sono taitisuey kangok so, mot tang sogo so gabe keklak. 5 Seni so, ibe lo pen go, genam mo tup: blong duoyap naklay nogo suey so mot lo klum gabe tetaling. Woy Dem Yesus sono dabui lo mot gabe kekeng. Ngga suey dato. 6 Yang, Iram Yesus no dabui iti kekeng go anduasi yap imot gabe. Se senong: Iram Yesus lo sey go kutrui blo no, tasam teguop go-a, imot logo se buong. Ngga tang so, dewi so pu go nogo, mot sogo ngge kalik gabe keklak, “Ngga buong genang, mot go senongduduing-a babu so se pung!” 7 Pilemon dem! Sikabung meno nogo klum mot lo tetaling go tup go, at go dabui ba nenem-yakay lo gabe tetram. Seni so, blong duoyap naklay nogo mot lo pluok go sik so, don mo kok dali.
Onesimus dem so pen go
8 Pilemon Dem! Woy Dem ey klaya go tang so, mot lo pluok genang mangking sogo don, genam logo gabe. 9-10 No, don ngga lo, mot sono pu genang, genam moyso. Mot lo klum tetaling go tang so, suot-suot so gabe we-situgu. Se duing: Genam, Paulus, sedue seni gabe. Iram Yesus go sui no boy ba so genam gabe got-tugu. No, mot nogo nemot-a gabe usi. Se duing: imot go andua Onesimus, banim go mot go koybutasemu sogo, genam lo gabe pen-asitugu. Mot sik sogo plesing go nemot mo kap. Nggano boy ba no Onesimus ey genam gabe tegu. Se senong: Woy Dem sogo deguo nemot sono genam lo pen go, dabui iti go tang so, genam go duo seni so, nemot mo lemoy gabe. 11 Pilemon dem, banim go, mot go kebali, suey so Onesimus kua tebok. No, nggeasui go nemot go kebali mot nogo seni kangok dega. Mot seguong nogo-a kua, no, genam nogo, nemot go seni gemang dali. 12 Onesimus nogo genam go dabui klum kangok dega. No, nggeasui go, mot mit sono genam lo pu go tandali se klong. 13 Genam lo duduing go, deguo teguop pepen goso boy ba so genam maning susuing go, mot way sogo, genam no tebok genang so, Onesimus gabe ya gluik. 1 14 No, mot maning kua yang go, Onesimus genam ey ngge no suing genang, genam logo ya kua gluik-srelu. At go duduing no mot-a keng genang, ya kua plong gabe. No, mot lo duing go-a, dabui yakay ey se yang-balo.
15-16 Se duing! Namboy mot sik so Onesimus kap go, senang so mot ey suing genang, tandali gabe ya klong. Koybutasemu seguong so kua, no, andua blong duoyap so nemot se wawi-balo. Seni so, dem sop so, nemot genam lo wawi go kalik, mot logo se duing dali. Mot nogo nemot seni kangok dali gemang.
17 Pilemon dem! Blong Dem ba no imot takeduik go, Onesemus dem mot logo se wawi dali. 18 Nago no, kuklue tasam piam go, ide eygo Onesimus lo pluok go, genam sono naklay se glung! 19 Se ikum: genam tang so gabe klik-situgu, “Drang ngga naklay genam lo mea semu-sing. Tegadi so klik go: Paulus lo gabe.” No kua kay! Mot tang go wali, inim-a iti genang so, genam go seguot way, mot logo maning kua semu gemang. 20 Andua! Woy Dem go sui no, genam sono mot se tebok. Ngga kua lemoy go, Iram Yesus no pupluok go seni sogo kalik? Genam go dabui suot genang, Onesimus-a suey so se wawi.
21 Sam ngge klik-situgu go, dabui lo genam senong go, Genam lo pu go, mot duk go mea keng. Ngga blo nogo, meno-meno mea pluok dali. 22 I go sogo: genam ta genang, degu ey dali se semu. Genam lo duing go, dewi keklak go sik so, Ki Wali Iram tup go, motnang ey tandali genam mea tegu.
Suey pu go
23 Blong Dem Yesus go kebali sesemu go tang so, Epaplas boy ba lo to-kletugu go logo suey, gabe pupu. 24 Nggano, genam go anduasi yap, Markus dem, Alistarkus dem, Demas dem, nggano Lukas dem, genam ey klay gono kebali sesemu go logo, suey mot nogo gabe pupu dali.
25 Imot go Woy Dem Iram Yesus sik sogo taitiklum naklay mot ey mea susuing.