3
Blong duoyap go woy a sogo
1 Ngge seni so gabe: blong duoyap nogo woy so suing genang nando lo duduen go, ngga teguop seni! 2-4 No, teguop go woy so lemoy genang, walipega naklay-a suey so se! Yangga: senun klaya go; saysuk yay don ey susuing go; kunala segu go; wali suey so tamlak go; keda so glop uwawi go; ngunguok genang kalong eygo; bu don eygo miam ey kua dedrop go; keda so plesagui kua duen go; ngengam eygo; sesuot sogo; drang no dabui-a kua iti go; yaptenglam yay suey so susuing go; suali ta ey suey so duoyap lo kokong go-a se!
5 Se duing! Suey so yaptenglam ta kua mlak go, sogo kalik so Ki Wali Iram go blong duoyap nemot lo ya wawi go klong? 6 Se senong: demening Iram Yesus no keng go, keda so woy sogo nemot kua taling. Ngga ey, dabui tategue go tang so Kupiamgo lo lek go, kisebui ba no pui genaning. 7 Dia idi sogo sikabung logo tanat eygo, woy so suing go ibe lo ta ey kong go wali-a se. Ngga tang so, Kupiamgo logo mea kua gluik.
Blong duoyap nogo tegay b
8-9 Nggano, blong duoyap nogo tegay taling genang, woy taling go kalik se: suey go, wali nemudi sogo; bu don eygo babu so yakua drop go; drang no dabui-a kua iti go; Blong Dem go walitap-a dabuiklaut no dabui iku lo mlak go tetaling go. 10 Kebali ta maning kua mlak gono, banim nemotnang senong genang nemu-a suey so se luik. Kuklue kua ikum goso, wali kebali pluok genang se taling. 11 Nggano, mianang blong duoyap ba sogo tegay so taling go: wali suey go nemudi sogo-a se. Lomtui-lomtui kua pepen go; saysuk yay-a don ey suing go; nemot tang so pen go nebut tamlak go seni ey se pluok. 12 Ayanang sedue, tegay so taling go: senun klaya seguong go; yaptenglam duokabung nogo, suey so se tetaling. 13 Yang! Suey so kebali pupluok go tegay-a, seni ey walikebali pluok go tang so, blo sono nemot go sui iway ey mea pu. Yang! Dabui lo Iram Yesus no waysagi ey mlak go tang so, ibe nogo nisonoso tegay logo mea penklong.
Ki Wali Iram ba sogo seni Iram Yesus gabe
14 Genam Paulus lo duing go: motnang nemuguoy genang, kedaso genam mea pung. Nago no kua pung go, sam ngge-a, gabe klik-situgu sang. 15 Yang! Ki Wali Iram go uduonebo wali genang so ikum go se taling. Uduonebo ngga, Ki Wali Mani Iram go blung. Seni eygo kutrui ey neguon eygo, blung ngga gemang.
16 Yang! Walitap ngga ba so gigit go blongdon, kangok dega gabe: ngga Blong Dem Yesus. Se duing:
Sikabung so ibe no Nemot mo taling;
Seni eygo so Nemot Wali Waglo lo mo temuit;
Ki Wali tamot-tamot sono Nemot go blong mo ngap;
Saula-saula sono Nemot sogo deguo gemang penklong;
Dabui lo Nemot no kukunan sikabung tupduk go mo keng;
Blong ba sono Nemot Ki Wali Iram lo mo wawi.