4
Tendam tang so paysing genaning
1 Se tup! Don ey ngge kalik go Ki Wali Waglo logo tang so mo pen-nengam, “Yansi go, blong duoyap temu mea nega. Esang! Naliwabu ey kukunan kuasep eygo tap nguok go tup golo, paysing sogo tap lo nemotnang mea keng.” 2 Blong duoyap ngga, wamoymlue eygo klui-klui lo gemang lelek. Yang! Klui-klui go dabui iku, demu koy logo kalik mo dasing. 3 Kukunan kuasep ey naliwabu eygo kunala keng genang wabui-a, klui-klui ngganemot lo ngge kalik gabe kiking, “Blong duoyap kabung kua iti, sedue kua iti!” Nggano don ey gemang ya poplong, “Ngga, kua dedam go ten! Ngge-a dedam go gabe.” No, se duing! Ten naklay Ki Wali Iram lo semu-ngam go, imot mo keng go sikabung lo dam genang. Taitisuey ey Ki Wali Iram no pu gono, iti go se dam. 4-5 Yang! Ki Wali Iram lo semu-ngam go ngganemot naklay suey dato, klaya nang go kagot sogo, kua. Ten naklay, Ki Wali Iram go nebut ey dewi ey golo, teguop goso gemang mo lemoy. Ngga tang so, yakay ey, taitisuey pu gono, se dedam.
Iram Yesus go kebali nang so Timotius taling go
6 Timotius dem! Walitap ngge-a, suey so blong duoyap no se taling! Ngga ey, Iram Yesus go kebali sedue sogo, suey so mot mea ip.
Kua kay! Deguo teguop ey walitap seni eygo, mot lo mo keng go-a, waysagi ey mlak go, kuno-woyno ten kalik dedam golo, mot go wali don mea kokok. 7 No, mambutpen, seni kua go nebut-nebut kabung nalo lo popok go kalik go, ngga sono se itak. No, Ki Wali Iram lo iwat go walitap lo koklong genang-a, kangok so mot logo se u-usey. 8 Se duing! Saysuk don kok genang so u-usey go rlam, imot nogo seni seguay dato. No, dabui ba sogo, Ki Wali Iram lo iwat go don kok genang so pupluok go, seni kangok dega. Ngga, wali ngge ey, wali inim eygo sogo tegadi! 9 Deguo teguop ngge, seni ey gabe. Naklay dabui lo iti go kekeng go, ngga suey. 10 Ki Wali Mani Iram nogo duduing-a, nenam so imot gabe bubung. Ngga tang so, wali tegadi seni tegu genang-a, don ey, seguot gabe pung-tugu. Yang! Ki Wali Iram, Sesuoy Iram. Sikabung naklay sesuoy genang, ta Nemot lo gabe mlak. No, kuduong sogo, blong duoyap-a, seni so mea sesuoy.
Timotius go kebali mangking go
11-12 Timotius dem! Nemot-a mot maning ngguot sogo, don ey sikabung nogo walinebut ngge naklay se penklong! Kua kay! Ku sono go mot sedue klayanang go logo kua kenok. No, ngge-a blong duoyap logo se ikum: mot go nebutpen; mot go wali tasam suey go; mot go klum; mot tupduk suey go; mot wali kon kua go; ngga ey mot tang go-a, yatrang suey goso se suing. 13 Genam maning kua pung go nogo, Wali Sam klaut-a senang so ikum go se pepen! Ngga sik sogo, suey so sikabung meno buong genang-a, walinebut mang se ngunguok. 14 Se duing: sikabung temu walitap nguok genang ngga, mot go taitiwalipega gemang. Nemot go seni kangok dega. Ngga pupluok genang, mot kua itak. Mot blo nogo Ki Wali Iram go senong eygo woy-woy yaluim golo ta mo tui-nenayom gemang. 15 Taitiwalipega ngga sik sogo seni-a, se u-usey! Mot go wali ba no taiti ngga bebabu go, sikabung naklay ikum go mea senong. 16 Kua kay! Saysuk yay, suey so mot se suing! Ngga ey, walitap ngunguok go, mot tang go logo se mlak dali. Ngga naklay ba no don ey suing go, mot tang go sesuoy so mea wali. Nggano, mot no tupduk keng go sikabung, wali mea sesuoy dali.