5
Timotius blong duoyap ey suing genang
1 Dem sop Timotius, ngge se tup! Dawin eygo nebut sedue seni no kua pu. No, aya so se usi. Ngga kalik, ngguot sogo, satyap so se pu dali. 2 Mianang kabung sogo, mia so se u-usi! Kabung kaguit sogo, dabui klaut no, kabuisroyap so se u-usi dali.
Yaptenglam yay suing genang
3 Se tup! Kabung nalo, nalo seni so itak go wali nogo, se tetebok! 4 No, duoyap ey mamtatonyap eygo nogo, ngge-a se nguok: moy nalo, mot tang so suey so yay se susuing. Walidemu no pen go kalik, “Moy-ay nogo tasuey way, se tetaling!” Ngga kalik go-a, Ki Wali Iram go duduing nogo ey gemang but. 5 Se senong! Nalo seni-seni, banom go-a, Ki Wali Iram seguong no kunala duduing naklay, klaya gemang iti. Use-wadikua dewi-a pupu go, Ki Wali Iram no don uwadong go ba lo, nalo ngga mea susuing. 6 No, rleykaboy-a uwet go nalo, nemot-a maning susuing go, wali seni mo kebong go kalik, Ki Wali Iram sik sogo ket so, nemot gemang. 7 Nalo-nalo nogo nebutmang ngga-a se king-satogoy! Ngga ey, teguop so nemotnang go wali-a koklong sogo be. 8 Yang! Yaptenglam ba sogo nalo, duoyap lo yay suey so kua suing go, walitap nemotnang lo mo wayang gemang. Nemotnang piam dega eygo, Ki Wali Iram kua senong go ey kua kerlam.
Sedue mo kebong go nalo go sui klik genang a
9 Timotius! Kabung nalo go sui so klik go sam ba nogo, nando go sui-a ya klik? Ngga nang sogo, nemu ngge kalik se luik! Nalo ngga: yagui seduesinangglik blo no se; da klaya seguong sedue iti go, banom nalo so susuing go-a se. 10 Nalo wali suey go ngge-a se ikum: denok yay suey so suing go; glop suey so wawi go; blong duoyap tapmasi so koklong go, suey so yakay ey bu iti go; b keda so ide eygo sikabung tetebok go. Yang! Tasam teguop go naklay mo senong go-a, kangok so mot lo se u-usey! 11 No, kaguit so sedue lo itak go, nalo go sui-a sam ba no klik genang, mot lo se waydang! Ngge ey se duing: nago no, sedue iti so teymoy go, dabui Iram Yesus no iti go mea itak. 12 Ngga ey, blong duoyap lo mea duing ne: dabui klum! Iram Yesus nogo tegadi nalo ngga lo mo paysing sang. 13 Se duing dali: yap-yap no nalo degutpung go, lomtui-lomtui pen go, nebut tuon-tuon-a pepen go, nebut piam-piam go-a penklong golo, sesrok ey mea mlay ne! 14 Ngganemot sogo so, genam lo duing go: maning kaguit sogo nalo, tandali go sedue nase iti! Ngga ey duo tui go, yaptenglam yay-a se suing. Ngga tang so, imot sogo piam so plesi lo pu genaning. 15 Esang! Kupiamgo tap lo keng go tang so, nalo temu go wali mo nega gemang.
16 Blong Dem no keng go mia se tup! Yaptenglam ba sogo nalo-nalo gemang go, nemotnang yay mot tang so se suing! Ngga ey, blong duoyap no ide so kua lemoy. Nalo seni go wali-a, blong duoyap logo se tetebok.
Blong duoyap go woy-woy
17-18 Blong duoyap naklay ngge se senong! Seni so, Wali Sam klaut ba nogo, ngge kalik mo pen gabe, “Nan so kokop go sapi lom kua dok!” Nggano, “Kebali sedue, nemot go kebali seguot, se i-iti dali!” Ngga kalik dali so, walikebali suey so semu go woy-woy nogo, taiti way da namon so se taling. Seni-seni walinebut-a suey so ngunguok go woy-woy nogo taiti ngga se iti. c 19 Timotius dem! Nago no, blong duoyap go woy-woy so ta nat go, keda so mot ey kua yang. No, nemot go piam, namon duo-nangglik si lo, nemu luik goso, mot keng go, se yang. d
20 Nago no, woy meno lo kuklue go, tap ngga itak genang moy sogo, ibe blo no nase bebat. Ngga ey neneyboy go, sikabung temu ikum go, suali tra go, tap piam go ngga mea kua semu dali. 21 Ki Wali Iram ey, Iram Yesus ey, mo kuoy go Ki wali tamot-tamot naklay eygo suongku no gabe pen-asitugu, “Timotius! Nebut mang ngge naklay, lekluik kua, tang ey kua pleng! No dabui klaut no mot lo se pupluok.” 22 Walikebali nang sogo, blong duoyap temu temuit genang, keda so mot lo ta kua tui! Nemotnang go wali-a, banim suey so se ikum! Kunala temoy no se: nemot go kuklue maning kua bebat go sik so, mot tang so ide ngga glung eygo. Yang! Mot go waliblong yay-a suey so se susuing!
23 Mang ngge, mot no gabe kiking dali. Da mata so, teguan tra golo saysuk don kua go mot sadui mo tra. Ngga tang so, bu ulue-a kua, anggul ey seguay so se drop dali. Ngga ey, saysuk don tandali kok genang.
24 Mang ngge se duing dali: seni so, kisebui ku maning gono, sikabung temu go konkebamling dia no gabe neneguon. No, sikabung temu go konkebamling, dia no maning kua neguon go, kisebui ku pung gono, mea neyboy dali. 25 Tasam-tasam teguop go ngga kalik dali: kekayso nggeasui sikabung lo gabe i-ikum dali. No, nemu lo maning kua ikum go-a, ku santugun gono, kekayso dia sono mea pung.