3
Dewi so keklak go kebali so pupluok go
1 Dem-debui, blong duoyap! I go sogo, atnang sogo dewi motnang logo se keklak dali. Ngga ey, Woy Dem logo deguo teguop, bu dayap go kalik, atnang lo pepen klong genang, banim dabui-dabui lo suey so motnang lo wawi go kalik se lemoy. 2 Dewi ngge se keklak dali: sikabung piam go taybat sik sogo, atnang Ki Wali Iram lo yay suing genang. Seni so, sikabung naklay dabui lo deguo teguop kua uwet. 3 No, Woy Dem seni-a gabe. Don Nemot lo mea iti. Kupiam golo ya kua pui genang yay, Nemot lo mea susuing. 4 Yang! Ngge-a kangok so dabui lo atnang mo senong gabe. Yangga, atnang lo pu go-a, senang so motnang gabe pluok-kesatogoy. 5 Atnang go dewi motnang sogo ngge-a gabe pupu, “Mot lo iwat go duduing naklay, Ki Wali Iram ey, Woy Dem eygo seguong sono se tui!” Se duing: gualaklum go nuik Ki Wali Iram gabe. Nggano Woy Dem Yesus seni eygo kutrui gabe.
Nemot go-nemot go kebali Woy Dem so bubung golo kua keneng
6 Dem-debui, blong duoyap! Woy Dem go sui no gabe pen-asitugu, “Sesrok eygo blong duoyap, atnang lo taling go tap suey so kua kekeng go, motnang eygo ta kua keduik.” 7 Se duing: motnang ey susuing go nogo, kuno-woyno, wali genang sogo kebali sesrok kua goso, atnang lo mo pluok. Ngga suey so motnang ikum go mo senong. Motnang go wali atnang lo wali go kalik se. 8 Sikabung logo ten tebadali go atnang kua iti dam-enangu. Use-wadikua tendam genang sogo seguot, kangok so atnang lo mo usey. Ngga, motnang sik sogo sikabung nogo ide genaning. 9 Nemot-a, motnang sik sogo ten pu genang, atnang don ey, yatrang suey go-a motnang no taling genang so, ngga atnang logo kua wadong. 10 Se duing! Motnang ey atnang maning susuing gono, demu ngge mo taling, “Nando kebali kua pupluok go, ten kua dam dali.”
11 Yang! Atnang mo tup, “Motnang eygo sikabung temu sesrok eygo gemang. Yem-a tebadali susuing, sikabung meno go tasam-a nemotnang lo gemang bubluot.” 12 Woy Dem Iram Yesus go don no nemotnang sogo gabe pen-asitugu, “Kebali-a ngengam ey motnang tang so se pupluok, ten ngga sik so iti genang.”
13 Dem-debui, tasuey-a tetaling genang, besam kua tra. 14 Esang! Sam ngge ba no klik go demu no ya kua keng go sikabung, gemang. Nemotnang eygo, kunala temoy no se! Suongsut tra genang, nemotnang eygo ta kua keduik. 15 No, koysaula so motnang logo kua duing! Andua nogo kalik, nemotnang nogo mang-a se kiking.
I go sogo nebut
16 Woy Dem tang go ngengam-yakay nuik gabe. Kuno-woyno naklay ba nogo motnang nogo ngengam-yakay Woy Dem lo uwasey go, ngga suey. Motnang ey klay goso Woy Dem mea susuing.
17 Suey ngge, Genam, Paulus go ta lo gabe klik-situgu. Se senong: tasip ngge ikum go mea senong. Yang! Sam ngge Paulus tang golo klik go gabe.
18 Imot go Woy Dem Iram Yesus go taitiklum motnang ey mea gigit.