5
Woy Dem uweng sogo dali-dali se suing
1 Dem-debui, blong duoyap! Iram Yesus pung genang ku, teguopey ya kua klik gabe. 2 Motnang tang go suey so mo senong gemang: Iram Yesus pung sogo, wom sedue kalik, pung so mea pung. 3 Nago no, ibe lo pu go, “Nggeasui go ku teguop gabe.” No, se senong: ku ngganemot no ku waluk go pung so mea pung. Duonu sogo kabung lo tui genang iseng tra go kalik. Ku ngga pung go nogo, sikabung klaya nang go ya kua kap. 4 No, anduasiyap! Motnang-a ngga kalik kua! Ku klik go ba lo motnang kua uwet. Ngga ey, ku ngganemot pung go nogo, wom sedue degut go kalik, motnang saduibong ey ya kua pling. 5 Se senong: ku klik go ba lo uwet go sikabung kalik, motnang kua. No, ku blong ba lo motnang-a gabe uwet. Ku blong go saula motnang gabe. Ku klik go saula so motnang ya kua pu. 6 Wadi go usne-a sesrek go kalik, motnang kua. Don ey ip go kunala kalong ey yay-a susuing goso, dali-dali motnang se. 7 Ku klik go nogo, usne-a sikabung gemang sesrek. Ku klik ba logo, bu drop golo gemang memawo. 8 Imot ngge, ku blong go saula gabe. Puplu so kua suing, no kunala temoy no se! Don ey imot suing genang, ple kalik ngge-a se: Woy Dem no dabui iti go kekeng go ey, klum way-way ey dabui don tete so, se glung. Nggano Ki Wali Iram lo sesuoy genang, duduingbubung ey susuing go, nali tete so se kut.
9 Yang! Imot ngge Ki Wali Iram lo kuoy go, kisebui lek genang so kua, no Woy Dem Iram Yesus lo sesuoy genang so mo kuoy.
10 Imot nogo so Nemot mo kebong. Ngga ey, imot susuing go, kebong go, klay gono, kiki so Nemot ey mea suing. 11 Ngga tang sogo so, mo pupluok go kalik, way-way don kok genang dabui mang, motnang se kiking!
I go sogo Paulus lo mangking go
12 Dem-debui, blong duoyap! Don ey atnang lo gabe pepen, “Motnang ba no wali kebali so pupluok go sedue, suey so se uwawi. Se duing: walitap nemotnang lo nguok genang, nggano mangking genang so, Woy Dem lo mot-dak go gemang.” 13 Wali kebali tang so, nemotnang nogo ta ey kangok so se kong. Klum ey suey so se taling. Suey so, nenem-yakay ba lo motnang se susuing.
14 Dem-debui, blong duoyap! Don ey atnang lo gabe pepen dali, “Kebali sesrok eygo andua, don ey mang se king. Don kua go andua nogo se tebok. Sikabung naklay nogo gigling ey se.
15 Se senong: way sogo tabat piam go dali lo kua taling. No, way-way so, sikabung naklay no tasuey taling genang-a, kangok so se u-usey!
16 Yakay-a senang so se! 17 Kuno-woyno dewi-a se keklak. 18 Naklay-naklay lelemoy go nogo, taitisuey-a Ki Wali Iram sono se pupu! Ngga, Iram Yesus ey klay gono suing go, motnang lo pluok genang so, Ki Wali Iram iwat go gabe.
19 Ki Wali Waglo motnang logo kua kenip. 20 Ki Wali Waglo lo pupluok go senong, ngga sono kua nabay-sing. 21 No, senong ngga pupung go, yatrang se ikum. Suey go-a, tamlak go se keng. 22 Taybat piam go naklay, ket sono se tenguo.
23 Yang! Imot nogo ngengam-yakay Ki Wali Iram tang go sik so mea uweng. Tasam naklay ba nogo Ki Wali Iram nogo so teguop so motnang se lemoy. Woy Dem weng genang ku nogo, motnang go waglo, pega, dabuilap, saysuk naklay, teguop-a pung genang. Ki Wali Iram lo yay gabe susuing. 24 Ngga naklay, motnang so usi go Ki Wali Iram lo suey so mea buong. Se senong: tegadi Nemot lo dok go mea lemoy seni.”
25 Dem-debui, blong duoyap! Atnang sogo dewi se keklak dali. 26 Anduasiyap naklay eygo, way-way so klum ey teguop so motnang ta se luluik.
27 Woy Dem go sui no gabe pen-asitugu, “Blong duoyap naklay sono sam ngge se ikum go pen-sing.”
28 Woy Dem, Iram Yesus logo taitiklum senang so motnang ey mea gigit.