6
Blong duoyap go wali
1 Ayanang, mianang! Motnang Wali Waglo lo gabe tetaling. Nago no, kuklue ey go sedue ikum go, suot-suot so gigling ey nemot nogo tap seni-a nase taling. No, motnang tang go kunala temoy no se! Kuklue lo lek genaning. 2 Way-way so idekeba se tebuo. Ngga kalik go Iram Yesus logo walidemu no tupduk so motnang gabe kekeng. 3 Nando tang so duing go, “Genam seni eygo sedue” no, seni so kua go, ngga nemot tang so saysuk no wamoy gemang mlue. 4 Sikabung nemot go-nemot go so wali se ikum, “Suey so koklong? Piam so koklong?” Suey so koklong go, yakay ey dabui ta mea tegue. No, sikabung meno go wali eygo, yam kua tui ne. 5 Yang! Sikabung klay-klay nemot go-nemot go idekeba se glung.
6 Iram Yesus sik sogo seni nando no pung go, seni ngga, way-way so nemot go klui ey se wasey.
7 Mot tang so kua puplu! Se senong: Ki Wali Iram lo naklay mo senong gabe. Nemot nogo yakua mlue. Sogo kalik go-a pupluok go, ngganemot seni-a mea tagot. 8 Imot go wali ngga kalik dali gabe. Saysuk go duduing waluk genang-a, nando lo pupluok go, kebong-a mea pung. No, Wali Waglo go duduing ba no pupluok go, kiki wali-a mea tagot. 9 Ngganemot sogo so, ta suey-a tetaling genang, imot kua besam. Kua besam goso tasuey tetaling go, seni tagot genang ku pung go nogo, teguop seni-a mea buo. 10 Yang! Nggeasui go ku maning gabe, tasuey-a ibe nogo se pupluok. No, blong duoyap nogo-a seni-seni kangok so se taling!
Nebut mangking ey suey pu go
11 Kangok so ta lo klik go sik so se ikum: ngga genam Paulus tang so klik go. 12 Saduisuk tong genang-a ta logo ey poplong go ngga, sui blo no pu genang-a kangok so usey go sikabung gemang. Ngga ey Iram Yesus di no glung go tang so, idekeba taling genaning, suali so. 13 Saduisuk tong so nemotnang lo popong go, no nemot tang go logo demutrui nogo kua keng. Se duing: motnang go saduisuk tong go sik so, nemotnang lo dabui ta mea tegue. 14 No, genam lo dabui ta tegue genang klaya seguong gabe. Yangga, Woy Dem Iram Yesus di no tegak go sogo-a. Yang! Di no Nemot tegak go tang so, kukunan go seni genam nogo kua gabe. Ngga ey, kukunan ngge nogo kebong go kalik genam gabe dali. 15 Yang! Saduisuk tong go, kua tong go genam nogo seni kua. Ngge-a seni kangok gabe: blong duoyap go wali inim dato goso lemoy go. 16 Sikabung naklay min ngge sik so wali inim-a iti go, nggano Ki Wali Iram go blung Israel seni eygo, ngengam gualaklum eygo nemotnang ey mea gigit.
17 Genam ngge, Iram Yesus no keng go sedue gabe. Iram Yesus no keng genang so, iseng eygo taling go, genam go saysuk temoy nogo maning gabe gigit. Ngganemot sogo so sikabung logo genam nogo koywong kua taling.
18 Woy Dem Iram Yesus logo taitiklum, motnang ey mea susuing. Seni!