5
Demutrui don lo dok go sik so blong duoyap plet-lak go
1 Ayanang, mianang! Banim go, imotnang demutrui lo mo dok. Nggano Iram Yesus weng go tang so, demutrui go don sik sogo, imot ta mo plet-lak, ngga ey yakay ey uwali genang. No, nggeasui go, don ey se ip. Koybutasemu kalik, demutrui lo teguopey go kua dok. 2 Nggeasui go genam, Paulus lo pu go-a, suey so motnang se tup. Nago no motnang go saduisuk tong go, ngga nemot go seni: Iram Yesus go kebali motnang nogo so pluok go, seni kua goso, tebadali gabe. 3 Don ey genam gabe pen-asitugu: nago no motnang go saduisuk tong go, demu ngga naklay tupduk go se keng. 4 Demutrui keng go tap lo Ki Wali Iram go suongku no seni eygo nemudi so lemoy genang motnang uwet go, Iram Yesus ey klay gono tandali go kua uwali gemang. Ngga ey Ki Wali Iram lo iti go gualaklum mo betep gabe. 5 Se senong: seni eygo nemudi so imot wawi go Ki Wali Iram lo yang go, Waglodon logo-a, duduing ey imot gabe bubung. Ngga Iram Yesus no dabui iti go tang so gabe lemoy. 6 Yang! Iram Yesus ey klay goso imot mo suing go, saduisuk tong go, kua tong go, seni kua. No, Iram Yesus no dabui lo kekeng go-a, seni ey gabe. Nuik ngga sik sogo so, way-way klum mea pung. Klum ngganemot lo dabui lo kekeng genang don mea i-iti.
7 Esang dabui klum! Motnang suey so mo keng-kesangam. Walitap seni ey sik sogo nando lo pu go tang so ne teguey? 8 Ki Wali Iram, mot so kuoy golo, kua. 9 Imot go walitap yay suey so se suing. Kunala piam go seguay golo, walitap mea nega. Se senong: igluom ip seguay dato go logo, buyap kangok go naklay mea piam. 10 Yang! Walitap suey so yay suing go, imot dabui klaya iti go gabe suing. Ngga, imot nogo, neguon so gigling ey, Woy Dem lo gabe tetaling. No, tap piam go nandonang lo tetaling go, kisebui-a mea iti. 11 Ayanang, mianang! Genam sogo nebut sikabung temu lo i-iwot go, “Tap ngge Paulus lo gemang ngunguok: Iram Yesus no dabui lo keng go sikabung Musa logo demutrui se keng nggano saduisuk se tong dali. Ngga tang so Ki Wali Iram go suongku no seni eygo nemudi sogo sikabung so mea yang.” Se duing: tap ngga genam lo ngunguok go, sogo temoy no genam sedue Yahudi logo ne yat? Ngga kalik go, Iram Yesus di no tegak go kebong go sik sogo, deguo sogo sikabung yakua waydang dali. 12 Yang! Motnang ba sik sogo paysing so ngunguok go sedue ngga, moymin tong go nase yat!
Ki Waglo logo wali
13 Ayanang, mianang! Motnang Ki Wali Iram lo kuoy go, demutrui go masi ba no dok genang so kua gabe. No, ngge-a kua duing, “Genam demutrui go don sik sogo plet go, saysuk go duduing-a mea pupluok.” Ngga duduing piam go! No way-way klum-a se tetaling. 14 Se senong: demu-demu naklay, klaya go ngge lo mo dok gabe: way-way klum-a, mot tang go saysuk no klum go kalik, se taling. a 15 No, kunala temoy no se! Plesagui ba logo, motnang go wali saguip eygo. 16 Tandali gabe pen-asitugu: Waglo go duduing no se wali, saysuk go duduing-a, motnang kua uwet. 17 Seni so, imot ba nogo duduing namon ey gabe pupluok. Yangga Wali Waglo duduing ey, saysuk go duduing ey. Duduing namon ngge way-way so gemang keklasok. Ngga sik so se senong: imot lo duduing naklay yakua pupluok. Banim temu no se duing, “Tasam pluok genang duduing ngga, nago sik so mo weng?” 18 No se senong: Wali Waglo go duduing-a taling go, demutrui go masi ba so motnang kua dok gemang. 19-21 Saysuk go duduing-a pupluok go, imot mo senong.
Yangga: kamea; taybat; suk kua go; demat no ta kokong; isi blue; plesagui; susuep; nele-nele; dabuipiam; nebut iwot; sagui; ku so blo sogo; nagluim; bu lo mawo go; walop-a pepla go; nggano temu dali gemang.
Motnang nogo nebut don ey tandali gabe pen-asitugu: kunala temoy no se susuing-lak. Se senong: tasam-tasam ngga so pupluok go sikabung Ki Wali Iram go blongdon duduing ey yakua tegu gabe.
22 No, Wali Waglo lo seni eygo-a pupluok go.
Yangga: way-way klum; yakay; ngengam; gigling; tasuey; dabui suey go; dabui lo kekeng go; 23 suot-suot so; wegeng ey suing go.
Se senong: tasam-tasam ngge demu-demu naklay logo sak kua kok. 24 Iram Yesus no dabui iti go sikabung, nemot go saysuk go duduing piam go nenagluim eygo, di no tegak go mo itak.