4
Danon nogo blongdon iti genang
1 Motnang Ablaham go danon so pu go nogo gabe pen-asitugu. Se duing: trangduo maning denok sogo nogo, koybutasemu ey kerlam so tupduk kekeng ey mea susuing. Nemot-a trangduo nogo don maning kua iti. 2 Seni so, nemot yay, ngaynalonang lo gemang susuing. Trang so pu genang ku no nglangin lo don mea iti. 3 Imot ngga kalik dali gabe. Maning denok sogo nogo, tupduk keng ey imot gabe. Kukunan go don lo maning gemang dodok. 4-5 Yang! Ki Wali Iram lo pu go ku no, Nemot go Danon-a mot-dak go kukunan sono mo weng. Nemot, kabung lo tui go, demutrui no tupduk so mo wali-yom. Ngga ey, sikabung temu koybutasemu kalik, demutrui go don lo dok go, Danon go don lo mo plet-lak go, imotnang Ki Wali danonnang so lemoy dali genang.
6 Aya-mianang se senong! Ki Wali danon so motnang pu go tang so, Danon go Waglo imot no Ki Wali Iram lo gabe mo iti. Waglo ngganemot logo so, imot logo mea usi, “aya sop!” a 7 Se senong: kukunan no tupduk go koybutasemu sik sogo, motnang mo pung. No, nggeasui go Ki Wali Iram go danon so motnang gabe pupu. Danon so pu go tang so, Danon nogo so tegadi dok go blongdon mea iti. Ngga, Ki Wali Iram lo mo iwat.
Nando nogo koybutasemu so mot mo lemoy
8 Ayanang, mianang! Tandali motnang se duing: Ki Wali Iram, motnang lo maning kua senong go nogo, kukunan demat go don lo motnang mo mlak. No, seni so demat go don Ki Wali Iram go blongdon ey kua kerlam. 9 Nggeasui go, Ki Wali Iram go blongdon-a motnang gabe tetra. Seni so, motnang-a Ki Wali Iram gabe senong. Esang dabui klum! Sogo kalik so don kua go, seni kua go demat sono tandali ne keng-ketogoy? Ngga ey, demat go koybutasemu so tandali ne duduing? 10 Se senong! Motnang lo teguopey ku suey go sogo kangok so ne uwet. Yangga, usu demat ku, walop demat ku, menay ku sogo kangok so gabe duduing. No, Ki Wali Iram lo iwat go-a kua uwet ne. 11 Motnang nogo so kangok so genam lo usey go seni, kua ikum ne.
Banim go ngengam, nago so
12 Ayanang, mianang! Nggeasui go genam motnang nogo dabui lo gabe pen-asitugu, “Iram Yesus ba no suk klaya so imot mo lemoy gabe. Genam lo pupluok go-a motnang se keng. Se senong: motnang ey genam klaya gabe.” Yang! Genam motnang mit sogo nogo, piam-piam so motnang logo kua semu-kenanga. 13 Mo kay? Kuduong so, deguo teguop motnang no nguok so weng go, genam sadui ey. 14 Nemot-a genam go saysuk nemu kua blup go, suey dato so genam wawi go motnang lo mo tebok. Genam wayang go motnang logo kua tenguo. No, motnang nesip ba sono, wawi go suey so genam mo degut. Kiwali tamot so, Blong Dem tang go-a motnang lo wawi go kalik. 15 Ku ngganemot nogo motnang go yakay kangok dega. No, yakay ngga nago no nggeasui go mo kap? Motnang sogo ngge-a gabe senong: ku ngganemot nogo mot go nemu genam nogo so wagot go iti genang, motnang duing go, ngga mea lemoy. 16 Nggeasui go nemudi so genam lo pepen go tang so, koysaula so genam motnang lo ne temuit? 17 Seni so, motnang lo mo pen, “Demutrui so ngunguok go tamot temu, suey so atnang nogo gabe tetebok.” No, way so genam lo pen go, “Nemotnang go duduing kua seni. Imot go ngengam nemotnang lo tong go, susuep mea pung. Esang! Ngga lemoy golo, nemotnang go koybutasemu so motnang mea lemoy.” 18 Se senong: kebali kangok so motnang lo pupluok go, ngga suey! No, se duing dali, “Ngga sogonang sogo? Kebali seni eygo?” Yang! Ku no-ku no kebali seni ey go-a se pupluok. Motnang ey genam gemang go, kua go nogo, se pupluok.
19 Dem-debui sop! Se senong: mot go wali ba nogo Iram Yesus kua sesegu go, duo nu sogo kabung kalik, iseng tra go, tandali motnang tui sogo kalik, genam gabe tetra. 20 Yang! Motnang ey klay gono suing genang, dabui kangok so gabe tetra. Ngga ey motnang nogo nebut don ey kua, no nebut bluem meno so pen genang. Esang! Motnang nogo genam dabui ide ey!
Hagar ey Sara eygo yatrang so ikum genang
21 Ayanang, mianang! Motnang Musa logo demu-demu no dok so duduing. Ngga kalik go, demutrui go seni banim no motnang se ikum. 22-23 Wali Sam klaut ba no mo klik, Ablaham go danon, sedue denok namon ey gemang. Meno, Hagar koybutasemu senun so iti golo tui go duo, Ismael. Nggano, Sara, taitak go senun lo tui go danon: Isak. Hagar lo Ismael tui go ngga saysuk go duduing no lemoy go. Sara lo, Isak tui go ngga, tegadi so Ki Wali Iram lo dok go danon. b
24-25 Nebutpen ngga, seni gemang! Kabung namon ngga no lemoy go, tegadi namon eygo so taling go:
– ‘Hagar’ no lemoy go ngga, nggeasui go yakena Yerusalem sogo sikabung so taling go. Nemotnang demutrui go don lo koybutasemu so mo lemoy. Se duing: nan Arabia sogo meduim Sinai blo no, Musa nogo demutrui mo iti. Tegadi banim go ngga, koybutasemu so gemang pung sang.
26 - ‘Sara’ ngga, Blong dia yakena ba sogo ‘Yerusalem’ sono taling go. Ngga ba sogo blong duoyap taitak go gemang. Ngga imot nogo ‘moy min.’ 27 Seni so, Wali Sam klaut ba no tegadi ngge mo klik,
“Kabung duo-ibui sogo, duo tui go iseng kua tra go,
blo sono yakay ey sek se iti.
Seni so, sedue kua go kabung!
Duo miam eygo unen so, mot mea pu.” (Yesaya 54:1)
28 Se senong: Ablaham no iti go tegadi, mo lemoy: mia Sara lo tui go danon Isak sik so duoyap miam ey mo pung.
Dem debui, blong duoyap! Miam eygo blong duoyap ngganemot ba no, motnang mo i dali. Motnang Wali Waglo go don lo mo tui. 29 Se duing dali: saysuk go duduing no tui go duo, Ismael lo, Wali Waglo go don lo tui go duo, Isak, mo inya. c Ngga kalik nggeasui go blong duoyap mea i-inya dali. 30 Wali Sam klaut ba nogo, ngge kalik so, mo klik dali, “Koybutasemu so wawi go kabung ey, danon ey, se yat. Seni so, Ki Wali Iram lo iti go tegadi, taitak go senun seni Sara lo tui go danonnang seguong nogo-a mea iti. Koybutasemu senun so iti go Hagar lo tui go duo nogo, yakua wasey.” d 31 Ayanang, mianang, nebut ngganemot naklay sik so ikum go se senong: koybutasemu senun so iti kabung logo duoyap, imot kua. No, taitak go senun seni lo tui go danonnang, imot gabe.