3
Saysuk go don logo wali teguop go yakua pung
1 Ayanang, mianang, Galatia sikabung! Nando go don lo motnang wamoymlue sogo mo dok? Esang! Motnang go kunala naklay mo nega. Se duing: Iram Yesus di no tegak go kebong go nogo deguo teguop, nenguon so, at lo kekayso mo pen-anangu. 2 Genam klaya ngge-a mea usi-lu: motnang go wali ba nogo, nago tap lo Wali Waglo mo iti? Ngga, Musa logo demutrui no keng go tang so? Iram Yesus sogo deguo teguop tup go dabui iti go keng go tang so? 3 Se duing: demu no kekeng go ngga, saysuk go don lo usey go gemang. No, wali teguop ngga kalik go logo yakua lemoy, Waglodon logo so mea pupluok. Mot kua puplu! 4 Wali teguop go motnang no naklay iti go ngga, mo kay? Tandali go kua duduing? Mo nega seni? Ngga kalik go, yakua! 5 Tandali gabe usi: Wali Waglo ey tasam bumeno-bumeno, sogo tang so Ki Wali Iram lo mo iti? Ngga demutrui no keng go tang so kua, no Iram Yesus go deguo teguop tupduk golo, gabe lelemoy.
Sesuoy Iram tegadi so Ablaham no dok go
6 Babu Ablaham no yatrang se ikum. Wali Sam klaut ba no ngge kalik mo klik,
“Ki Wali Iram no dabui lo keng go tang so,
seni eygo nemudi sogo sedue so
nemot Ki Wali Iram lo gemang yang.” (Kejadian 15:6)
7 Ngga sik so se senong: Ki Wali Iram no dabui lo kekeng go sikabung seguong-a Ablaham go danon seni so a mea pu. 8 Wali Sam klaut lo banim ngge kalik mo taling: dabui lo keng go tang so saula meno danon sogo Ki Wali Iram lo mea wawi dali. Ngganemot sogo so babu Ablaham no tegadi ngge Ki Wali Iram lo mo dok,
“Kukunan saula-saula nogo sogo
gualaklum mot ba no mea pung.” (Kejadian 12:3)
9 Ngga sik so se senong: dabui lo kekeng go sikabung naklay, babu Ablaham ey klay gono dok go nogo-a, gualaklum gabe pupung. 10 Wali Sam klaut ba no mo klik,
“Demutrui lo taling go naklay suey so kua pupluok go sedue,
Ki Wali Iram lo wayang go mea tenguo.” (Ulangan 27:26)
Ngga kalik go, esang, demutrui no kekeng go wali teguop yakua pung, no Ki Wali Iram lo wayang go mea tenguo. 11 Ngge dia sono mo neguon gabe: demutrui no kekeng go tap logo, Ki Wali Iram go suongku no seni eygo nemudi sogo klaya duonang go yakua ip. Wali teguop iti genang tap ngga, kua nemot. Se senong: Wali Sam klaut ba nogo ngge mo klik dali,
“Seni eygo nemudi sogo sedue,
dabui lo kekeng go seguong logo so, se wali.” (Habakuk 2:4)
12 Nemot-a Wali Sam klaut ba no klik dali go,
“Demu lo taling go tap naklay suey so pupluok go sedue-a,
wali teguop mea pung.” (Imamat 18:5)
No, ngga kalik go sedue maning kua ip. Ngganemot sogo so, Iram Yesus ba no Ki Wali Iram go gualaklum taling go ngga, dabui iti go keng go kutrui gemang. No, demutrui no keng go don kua.
13 Sedue di no glung go, nemot go seni: wayang go nemot mo tenguo. Se senong: Wali Sam klaut ba no, ngge mo klik,
“Di no nando tegak go,
Ki Wali Iram lo wayang go mo tenguo gemang.” Ulangan 21:23
Yang! Ki Wali Iram lo wayang go tenguo go sedue tete sogo idekeba, Iram Yesus tang go, di no glung golo mo lek. 14 Yang! Imot tete sogo idekeba, Iram Yesus kebong golo tebuo go tang so, Ablaham no tegadi so dok-ngam go gualaklum ngga, saula-saula nogo pung dali genang. Ngga ey, tegadi so dok-ngam go Wali Waglo, imot dabui iti go keng go tang so, wawi genang.
Tegadi dok go demutrui logo yakua tong
15 Ayanang, mianang! Yatrang ngge gabe pen-asitugu. Nago no tegadi klay gono mo dok go, tegadi ngga don ey gemang. Sikabung meno logo yakua plet. 16 Ngga kalik dali babu Ablaham ey Ki Wali Iram lo tegadi mo dok-klenangam. Tegadi ngga babu Ablaham danon eygo nogo so dok dali go. Suey so se tup: Wali Sam klaut nogo ngge kua klik, “Ablaham ey danonnang eygo” no, “Ablaham, danon eygo” seguong so mo klik. Nemot go seni: ngga klaya duo, Iram Yesus so dok-ngam go. 17 Genam go duduing ngge kalik gabe: takuduen so Ablaham no tegadi ngge mo dok. Ngga ey yaguisa miam dega ey b suing gono, Musa nogo, demutrui gemang iti-nangam. Banim kuduong so dok go tegadi, yakua plet. 18 Se senong: Ki Wali Iram lo dok go, demutrui logo yakua iwot-dak. Seni so, babu Ablaham no gualaklum, tegadi so dok go ngga, senang gemang.
Demutrui go seni
19 Demutrui sik sogo gualaklum yakua tagot go, nemot go seni sogo kalik ne? Se senong: Ablaham ey dok go tegadi Sesuoy Iram maning kua pung go nogo, sikabung go piam konkebamling-a dia sono demutrui lo gemang u-ude. Demutrui ngga, dikuoytap sogo sedue, ngga Musa c no, Kiwali tamot lo iti-nangam go. 20 Se senong: tegadi dok genang sogo, sedue meno usi go se tebok. No, Ki Wali Iram ngga kalik kua. Nemot tang golo Ablaham eygo tegadi mo dok-angam. Meno duo logo ey kua tebok.
21 Ngga kalik go, Ki Wali Iram lo tegadi dok go, demutrui ey teguaydong go kalik? Ngga kalik kua. Se duing: demutrui no kengduk go tang so, wali teguop ya iti mo, seni eygo nemudi sogo sikabung so, imot mea lemoy dali ne. 22 No, Wali Sam klaut ba no ngge kalik mo taling, “Sikabung naklay Kupiamgo don lo mlak go gabe gigit.” Ngga tang sogo so, Ki Wali Iram tegadi dok-ngam go, dabui iti go keng go sikabung sono gualaklum se iti. Yangga, Iram Yesus lo pluok go sono dabui iti go sikabung nogo-a.
Iram Yesus lo iti go wali
23 Iram Yesus di no glung genang ku maning kua pung go nogo, sikabung naklay betui ba nogo kalik, demutrui go don lo dok go gigit. E... Iram Yesus no dabui lo keng genang tap, Ki Wali Iram lo plet go gabe taling. 24 Tebot so pen genang ngge kalik: Iram Yesus maning kua pung go nogo, imot yay so suing go klui kalik demutrui lo gemang ngunguok. Ngga tang so, Yesus no dabui iti go keng golo, seni eygo nemudi sogo sikabung so imot lemoy genang. 25 Nggeasui go, Iram Yesus pung go nogo imot dabui lo Nemot sono keng go, tandali demutrui lo yay suing go, kua nguok gabe. 26 Motnang naklay, Iram Yesus no dabui lo keng go tang so, Nemot ey klay gono, Ki Wali Iram go duoyap so mo lemoy. 27 Iram Yesus ey klay gono lemoy genang so, bu motnang mo degut. Ngga tang so Iram Yesus go pega naklay motnang nogo amka kalik mo kok. 28 Yang! Ki Wali Iram go nemu ku nogo, seguay go babu go yakua pu. Imot naklay kerlam. Yangga: sedue Yahudi, sedue Yunani, koybutasemu, wengkabui, woy-banu sogo, tandali yakua pu. Iram Yesus ba nogo klaya so naklay mo kerlam. 29 Se senong: Iram Yesus go blong duoyap so motnang lemoy go tang so, babu Ablaham go danon so motnang mea pu dali. Ngga ey blongdon tegadi so Ki Wali Iram lo dok go, ngga naklay motnang sono gabe iti.