2
Iram Yesus ey klaya so Ki Wali Iram lo lemoy go
1 Ayanang, mianang, se senong! Kuklue piam konkebamling-a pluok golo, motnang go wali mo kebong. 2 Tap ngga koklong golo, kukunan ngge go naliwabu wengkabui, Kupiamgo duduing no motnang mo keng. Se senong: ut sogo don naklay, kuasep ngga lo gabe mlak. Yang! Piam go-a kuasep lo tetaling go, Ki Wali Iram no tupduk kua go sikabung ba lo gabe pupluok. 3 Se duing: banim go, kukunan go duduing-a, sikabung ngga kalik, imot mo pluok. Yang! Dabui ba sik sogo duduing piam go, kunala ba lo pupung go-a, pluok-neakam. Ngga tang so, kisebui ba no, sikabung naklay ey imot mo pui.
4-5 No, Ki Wali Iram gualaklum nuik! Ngga ey, imot nogo, Ki Wali Iram klum katu eygo tang so, Iram Yesus ey klay gono, wali inim-a tandali mo nglong. Nemot-a kuklue konkebamling lo, imot go wali mo kebong. Se senong: nggeasui go Ki Wali Iram go taitiklum lo motnang mo sesuoy dali gabe. 6 Iram Yesus ey klaya so lemoy go, Ki Wali Iram lo imot mo nglong. Ngga ey Iram Yesus ey kerlam so, blong dia yakena ba no iram demu no imot suing genang. 7 Ngga kalik pupluok golo, ku semu go nogo, Ki Wali Iram go taitiklum katu ey taling go, yansi nenguon genang. Yangga, Iram Yesus logo so Ki Wali Iram go gualaklum, imot no taling go, ngga gabe i-ikum. 8 Taitiklum ngga tang sogo so, motnang mo sesuoy gabe. Ngga Iram Yesus no dabui iti go tang so mo lemoy. Sesuoy go ngga, wako lo usey go sik so kua, no, Ki Wali Iram go klum lo mo lemoy. 9 Ngga motnang go seguot sik so kua pung. Ngga tang so, imot sikabung logo, dabui ta yakua tegue. 10 Imot nogo wali inim ngge, Ki Wali Iram lo buong go gabe: Iram Yesus ba no imot ip go, nemudi so tasam teguop go-a pupluok genang. Ngga, dali-dali Ki Wali Iram lo mo ta-ngam gemang.
Iram Yesus no dabui lo keng go tang so klaya mo lemoy gabe
11 Ayanang, mianang! Suey so se duing: banim go, motnang tapui, Ki Wali Iram kua senong go saula. Yang, ‘sadui suk kua tong go sikabung’ so, Yahudi lo gemang pu-neakam. No, sikabung go ta lo nemotnang go sadui suk tong go-a ne kay. 12 Se duing:
- Iram Yesus ey klay gono motnang maning kua dok go;
- Ki Wali Iram lo kuoy go blung Yahudi ba nogo, motnang sui kua degut go;
- Ki Wali Iram go blung ey dok go tegadi, motnang eygo kua gemang.
Yang, kukunan blo nogo motnang wali go, duduingbubung eygo kua. Ki Wali Iram motnang logo kua senong. 13 Nemot-a, motnang ngge, Ki Wali Iram go usu tema dia idi sogo, Blong Dem Yesus kin pi golo Nemot ey klaya so lemoy go, Ki Wali Iram go usu nesip ba no mo yaluim go degut.
14 Se senong: Iram Yesus imot nogo Ngengam Iram gabe! Motnang saula meno ey atnang Yahudi saula eygo wali, Nemot kebong golo, klaya gono mo ngengam. Banim go way-way so plesi so pupluok golo, sang banom-banom, kukuo ngga Iram Yesus lo mo togut gabe. 15-16 Yang! Musa logo demutrui ey demu-demu ey yam so Nemot lo mo suep-sing. Ngga ey, saula tang namon eygo ngganemot, sedue tang klay goso lemoy genang. Iram Yesus di no tegak go kebong golo, sedue tang namon ngga klay gono, Ki Wali Iram ey mo ngengam. Ngga ey plesi so pupluok go don mo pedueng. 17 Ki Wali Iram kua senong go saula ey, Ki Wali Iram mo senong go saula eygo nogo ngengam go tap, Iram Yesus lo mo taling gabe. 18 Seni so, Iram Yesus ba nogo tang so, saula meno ey, Yahudi saula ey, Wali Waglo klaya go don lo, Ki Wali Iram go suongku sono, nisonoso, degut go imot mea ip.
19 Se duing! Nggeasui go, motnang tang meno kua. No, Iram Yesus no dabui lo kekeng go tang klaya goso, Ki Wali blung so lemoy go kalik gabe. Yang! Ki Wali duoyap so motnang gabe mo temuit. 20 Se senong! Yap kalik imot Ki Wali Iram lo gabe buong-sing. Yangga: Iram Yesus go tamot-tamot, nabi-nabi eygo lo, kutrui so gemang sey. Ngga ey, Iram Yesus tang go neguon-tum so gabe king. 21 Iram Yesus temoy sono, tebuem-tebuem naklay gemang kluing-sing, e... Kiwali yap teguop goso mea buong, Woy Wali Iram go sui iway pu genang so. 22 Motnang, klay gono Iram Yesus lo ngengam go, yap kalik dali teguop so buong go, Ki Wali Iram, Nemot go Waglo ey, motnang ba no suing genang.