3
Saula meno sesuoy genang duduing Iram Yesus ba no kok go
1 Yang! Motnang, Ki Wali Iram kua senong go saula nogo, deguo teguop taling genang dewi-a gabe pupu. Ngga ey motnang lo se duing: Iram Yesus tang sogo so, boy ba sono genam betep go gabe. 2 Motnang mo tup gemang: genam Ki Wali Iram lo mo mot-dak. Ngga Nemot kua senong go saula-saula sono, Nemot go taitiklum no, deguo teguop wasey klong genang. 3 Se senong: Ki Wali Iram go duduing ngga ba so kok go gigit go, genam sono ngap go mo taling. Banim temu no sam ngge ba no at lo klik go kalik. 4 Iram Yesus nogo senongduduing kok go, sam ba no klik go ngga ikum go, genam go duduing motnang mea senong. 5 Yang! Banim go sikabung tang nogo dia sono go duduing ngga kua pung. No, Iram Yesus go tamot-tamot ey senong eygo sedue nogo-a, senongduduing kok go ngga, Wali Waglo logo so mo ngap. 6 Senongduduing kok go ngga:
- saula-saula, Yahudi saula ey, Wali Sam klaut ba no klik go tegadi-tegadi, Iram Yesus logo so, kekayso mo itak dali;
- Iram Yesus go blong duoyap ba nogo, saysuk klaya gabe.
- Saula-saula nogo ey, deguo teguop ba sogo wali blong, mo iti dali. 7 Se senong! Ki Wali Iram sik sogo taitiklum ba lo, Nemot go Waglodon lo, deguo teguop nogo kebali sedue so, genam tang go mo lemoy gabe. 8 Ki Wali Iram go blung sik sogo, genam ngge nemot-a nemukuablup go kebali sedue. No, Ki Wali Iram go taiti klum no, saula meno nogo Iram Yesus go blongdon dega ngunguok genang, at go ta sono mo itak. 9 Ngga, kublung so kong gono, Ki Wali Kumam lo mo duing-ngam. Duduing ngga, kuku so kok go gigit, e... nggeasui go ku nogo Nemot lo gabe pupluok. Ngga ey, sikabung naklay nogo genam lo gabe tetaling klong. 10-11 Yang! Ku blung kong go sik so, Ki Wali Iram go senongduduing, imot go Woy Dem Iram Yesus ba lo mo pluok-sanakam. Senongduduing ngga ut blo sogo blongdon naklay se senong. Blongdon ngga Ki Wali Iram go blung logo so teguop so mea pepen klong. 12 Yang, Iram Yesus no dabui iti go tang so, Ki Wali Iram go suongku nogo tap mo tenuing gabe. Iram Yesus ba lo nisonoso degut go gabe ip. 13 Se senong! Koywong iseng genam lo kukuok go tang so, motnang dabui butom so kua lemoy! No, koywong iseng, motnang nogo so genam lo rlek go ngga, motnang nogo blong gabe.
Paulus go dewi
14 Ngga tang so, Ki Wali Aya go suongku no unuik go dewi gabe pupu. 15 Yang! Blong dia yakena ey, kukunan sogo blong duoyap naklay eygo Wali Aya, Nemot gabe. 16 Ki Wali Iram blongdon go nuik, motnang go iku don ey Nemot go Waglo lo mea gigit. 17 Ngga ey, dabui iti go keng golo, mot go dabui ba so Iram Yesus mea suing. Ngga ey klum ba lo motnang don ey mea suing. Klum ngga motnang nogo kutrui. 18 Yang! Kutrui ngga blo no, blong duoyap temu naklay ey, Iram Yesus logo klum seni walong-bata go, motnang mea senong dali. 19 Nemot go gualaklum go seni teguop so motnang mea senong. Sikabung lo senong go ey, yakua i. Gualaklum ngga wawi golo, Ki Wali Iram go blongdon teguop go, motnang mea tetram. Ngga motnang nogo so, genam lo keklak go dewi gabe.
20 Imot ba no Waglo go don pupluok golo ngge mea senong, “Dewi ba no at lo duing gono uwadong go, tebot so gabe. No, Nemot go don lo, walong bata sogo, Ki Wali Iram lo mea pupluok.” 21 Ki Wali Iram seguong nogo-a blongiway naklay se i-iti! Yangga, Iram Yesus ba sogo blong duoyap nesip nogo, duo no-duo nogo, tong-kua tong. Senang so, iway se iti! Seni.