13
Da nangglik tete so Paulus weng genang
1-2 Dem-debui, blong duoyap! Motnang mit nogo, ngge lo da nangglik tete so genam mea weng. Se senong! Yahudi go demu nogo: ibe no namon duo-nangglik si lo pepen go “Ngga seni so gemang.” Ngga kalik go, se tup: da namon tete sogo, ku nayum go nogo, motnang mit no genam mo suing. Nggano, kuklue so pluok go sikabung nogo nebutdrom mo king-bayu. Nggeasui go, maning ket sogo no, motnang nogo tandali da nangglik tete sogo, ngge kalik gabe pen-asitugu, “Tandali pung-abalu go nogo, kuklue so pupluok go nogo, ibe damoy so, don ey mea bebat-balu.” Motnang sik sogo blong duoyap temu nogo, ngga mo pen-abayu dali. 3 Yang! Motnang lo pu go, “Suey so se taling: Paulus lo pepen go nebut, seni so Iram Yesus logo?” Way so gabe pu-situgu, “Motnang nesip nogo, Iram Yesus go don yakua malo gabe. Mea taling seni! Yang, Nemot go don, kangok dega go mea ngap.” 4 Kua kay! Nemot-a, don malo goso Blong Dem lemoy go, di no tegak go kebong go, Ki Wali Iram go don logo so, gabe uwali. Nemot go tamot atnang ngga kalik dali: Blong Dem ey don malo go, no, Ki Wali Iram go don logo so, mea wali dali. Don ngganemot-a mea ikum-kebalo.
5 Dem, debui, blong duoyap. Motnang tang so, yatrang dabui se ikum! Maning Iram Yesus no waysagi ey mlak go motnang gemang duduing? Suey so ngga ikum go, se senong! Kua go, don eygo mot mea kua suing. 6 Se senong: atnang-a Iram Yesus ey gabe. 7 Ki Wali Iram sono dewi atnang lo pupu go, “Piam ngga sono motnang se itak.” Dewi ngga pu go nogo, walitap nemudi so, suey go-a, motnang lo pupluok genang. Don eygo so atnang lo taling genang, yakua gabe. Seni so, atnang ngge don kua go, teguop go-a motnang logo se pluok dali! 8 Yang! Ki Wali Iram go tap seni eygo wayang genang, imot logo yakua. No, walitap teguop so lemoy genang-a, gabe usey. 9 Atnang go yakay ngge seni sogo: don atnang-a malo go, motnang-a don se kok! Teguop seni so motnang naklay pupluok genang, ngga atnang go dewi. 10 Maning ket sogo no, motnang go wali iwot genang so da klaya dali gabe klik-situgu. Nago no, atnang pung go nogo, don ey motnang bebat genaning. Seni so, genam no Woy Dem lo iti go waglodon tang so, motnang buong genang-a gabe, kurluk genang so kua.
Yam sogo suey
11 Dem-debui, blong duoyap! I go seni sogo, motnang nogo suey atnang lo gabe pupu. Walitap teguop seni so lemoy genang-a suey so se usey! At lo mangking go nogo-a, waysagi ey se mlak! Dabui klaya se susuing-lak! Ngengam yakay ba lo se koklong! Ngga ey, motnang ey Ki Wali Iram mea susuing. Gualaklum ngengam yakay nuik Nemot gabe.
12 Blong duoyap tegu go nogo way-way suey mla ey motnang logo se taling! Motnang naklay nogo, suey, klum ey, ngge sogo blong duoyap logo se pen-sing sang.
13 Woy Dem Iram Yesus logo taitiklum, Ki Wali Iram logo gualaklum, Ki Wali Waglo go ngengam lo klaya so dok go, motnang mea suing-lak.