12
Paulus no Woy Dem lo taling go
1 Esang! Motnang lo pupluok go tang so, genam logo dabui ta gabe tegue. Nemot-a seni kua go, Woy Dem sik so, taling go kungap-a, mea pen-asilu. 2 Se tup! Yagui 14 nayum gono, ngge kalik blong duoyap sik sogo sedue meno no lemoy go: a ut lap blo dega seni Ki Wali yakena sono sedue ngga wawi go kekayso mo klak. Saysuk ey? Iku seguong-a? Kua senong. No, Ki Wali Iram lo gemang mo senong. 3-4 Nemot no lemoy go, genam lo senong go: nemot, usu Pirdaus, ngga Ki Wali Yakena ba sono, da klaya wawi go mo degut. Saysuk temoy ey? Iku seguong-a? Genam kua senong. No, Ki Wali Iram seguong lo mo senong gemang. Sikabung lo yakua pu go nebut, ngga no nemot lo gemang tup-bayom. 5 Se senong! Sedue ngga go sui-a, blo sono go, at lo mea iti. No, genam tang sogo dabui ta yakua tegue. No, saysuk don kua go sogo-a, dabui ta genam logo gabe tetegue. 6 Pirdaus ba no tasam kangok go ngganemot taling go, genam kua puplu gabe. Ngga seni so mo lemoy. No, genam so kukunan blo no tup go ikum go, ibe no suey go-a sedue temu lo se pepen! 7 Pirdaus no lemoy go, sikabung logo yakua neyboy. Blo sono genam go sui yakua iti genang so, genam go saysuk ba nogo, wong tuep klaya mo kuali. Ngga Kupiamgo tamot so at go saysuk ba no mo suing. 8 Yang! Da nangglik yam so Kupiamgo tamot ngganemot teguik genang, Woy Dem sono genam lo mo wadong. 9 No, way so genam sono Woy Dem lo pu go, “Genam go taitiklum, mot nogo mo nemot. Seni so, don kua go tang so, mot ba nogo, Genam go don, kangok so mea pupung.” Yang! Don kua go tang sogo-a dabui ta genam logo mea tegue. Ngga ey, Iram Yesus go blongdon li go, genam ba nogo mea ngap. 10 Don kua go ku nogo, Iram Yesus lo don iti go tang so, genam yakay ey gabe susuing. Yangga: sedue lo wayang go; iseng ey koywong ba logo; sedue lo truik go; ide eygo. Yang! Ngge-a genam mo senong: nago no saysuk don kua go, Blong Dem sik sogo lo genam nogo don mea kok.
Paulus dabuilek go
11 Genam-a, puplu sogo kalik pen-situgu go, ta lo gabe plong-ketogoy. Blo sono genam go sui-a, motnang lo nase pupu! Yang! Nemot-a seni kua go, naklay-naklay ba nogo, tamot-tamot sui dega eygo ngganemot logo, genam yakua kenok dali. 12 Genam, Woy Dem lo mot-dak go tamot. Ngga taling genang, motnang nesip nogo, tasam-tasam kangok go don eygo naklay lo, gigling ey, suey so genam lo mo taling gabe. b 13 Yang, sogo-a mo? Motnang, blong duoyap temu eygo, taton sono tenguo go? Kua. Naklay at lo suey so mo wasey. No, motnang nogo klaya go-a kua taling: duoy iti genang sogo ide, genam logo kua glung gabe. Ngga blong duoyap temu nogo ey kua kerlam. Nemudi so ngga genam lo kua taling go, suongsut genam nogo kua pu, nase kay!
14 Yang! Nggeasui go, da nangglik tete sogo, motnang ikum so klong genang, genam gabe tetaut. No, motnang sik sogo, sogo-sogo kua wadong. Seni so, motnang go taut so, genam logo kua uwet. Se senong: unen-nglangin nogo taut-a, denok lo kua iyaluim. No, duo nogo-a unen-nglangin lo gabe iyaluim. 15 Genam go taut, don naklay, motnang nogo so yakay ey iti genang gabe duduing. Yang! Genam go saysuk motnang nogo sogo mea iti dali. No, genam lo usi go, “Genam go klum-a kekangok, way so motnang logo klum-a ne seseguay. Sogo kalik ne?” 16 Seni so motnang lo pen go, “Atnang nogo, sogo-sogo Paulus tang go kua wadong.” No, esang! Motnang lo pu dali go, “Atnang nogo ide, yakot so, kekay tap so Paulus lo mo glung-sing!” 17 No, se duing! Motnang sik so, sogo-sogo yaluim genang so, genam lo mot-dak go sedue gemang? 18 Yang! Titus-dem, motnang mit no, at lo pu go mo klong. Nggano, andua meno, nemot ey pu go mo keng dali. No, motnang sik sogo, Titus lo yaluim go, gemang? Seni so, genam, Titus ey dabui klaya go tang so, tasam-tasam kerlam go-a gabe pupluok. Titus, genam ey klay go tap lo gabe kekeng.
19 Yang, genam go nebut ngge tup go nogo, way so motnang lo gabe duduing, “Ngga kalik go nebut, imot go nemu damoy sogo-a, nemot go saysuk nogo so, Paulusnang gabe pepen.” No, Ki Wali Iram go nemuku no, Iram Yesus ey klay gono lemoy go tang so, gabe pen-asitugu, “Dem-debui, blong duoyap, seni so, naklay ngge pepen go, motnang don ey ip genang sogo so, gabe klik.” 20 No, genam suali tra go at lo duing kua ikum. Nago no motnang mit no pung go nogo, Iram Yesus ey klaya go sogo, motnang kua susuing. Esang, genam suali ey, mot go blong duoyap ba nogo, ngge ikum genaning: tangeng; nemukum; dabuipiam; saysuk tang go nogo-a uwet go; nebut iwot; nebut tuon-tuon pepen go; dabui blo no iti go; nebut sagui semu go. Ngga kalik go, imot tegu genang, suey so mea kua ngengam. 21 Genam suali tetra go, nago no motnang ey genam tegu go, blong duoyap go kuklue piam konkebamling naklay ikum go sik so, ku sono motnang damoy so, genam Ki Wali Iram lo mea kenok ne. Ngga ey, tandali motnang sogo u genam lo mea kluo. Banim sik sogo konkebamling maning sesemu go, wali inim sono kua teguey go kekeng. Yangga: taybat kua seni go; sikamea kon eygo-a pupluok go. Ngga naklay kua itak go sik so genam u mea kluo ne.