11
Tap paysing sogo tamot-tamot meno lo taling go
1 Esang! Puplu kunala seguay dato sogo, ya pen-silu? Ngga yakua waydang-kelo! 2 Se tup! Blung yay Ki Wali Iram lo susuing go kalik, motnang, duo kaguit kalik, genam lo yay gabe susuing. Yang! Sedue klaya duo ey motnang baynang, at lo mo king gabe. Blong Dem no wawi go dok genang so. 3 No, genam suali gabe tetra! Motnang Iram Yesus no dabui iti go sik sogo teguey genaning. Se duing: dabui klaya kua iti go, kluay debui lema lo mlue go didon dam go kalik, motnang mang ne ya paysing. 4 Nago no, tamot-tamot meno weng golo, genam kua taling go Yesus meno-a, Wali Waglo meno-a, deguo teguop meno-a way so pepen go, ta unen ey ne pepegat, motnang logo yakua waydang ne. 5 Esang! Tamot-tamot dega ngganemot eygo, at kua kerlam. Genam dui ey banom dega gabe! 6 Se duing: dabui tetong genang nebut, genam yakua go, no, senongduduing ba nogo-a genam naklay mo senong. Da mata so at lo mo taling gemang.
Iram Yesus tang so Paulus dewi bubut go
7 Motnang nogo piam so genam lo mo taling? Motnang nogo so, Ki Wali Iram sik sogo deguo teguop, tebadali genam lo pepen go ngga, genam mo piam? Esang! Motnang go suongku no, seguay goso genam-a lemoy go, ngga blo sono motnang-a iti genang so. 8 Yang! Motnang nogo kebali semu genang so, sip meno sik sogo blong duoyap logo duoy, genam lo mo idok. Wom sedue logo kalik ta lo plong go naklay genam logo mo yaluim-sing. 9 Esang! Motnang nogo so kebali pupluok go, ide so motnang blo no genam lo kua glung. Sogo-sogo kua wadong gabe! No, genam saysuk yay suing genang duoy kua go nogo, nan Makedonia sik sogo andua-andua lo mo tebok. Yang! Motnang nogo, ide so kua guglung gabe. Ngga kalik seguong mea pluok-satugu. 10 Genam ba sogo Iram Yesus go Waglo seni eygo gigit go tang so, dabui ta tegue ey gabe pu-situgu, “Drang-a kua uwet go tang so, walikebali genam logo gabe pupluok.” Motnang nan Akaya naklay sogo sedue klayanang go logo, ngga nogo sak yakua kok! 11 Sogo temoy no drang ngga motnang sik sogo kua wadong? Motnang nogo genam dabuiklum kua? Ki Wali Iram mo senong! Motnang nogo klum, kangok so gabe.
12 No, yakay tamot-tamot ngga lo lek genaning so, drang kua goso tetaling go ngge, senang so genam lo mea pluok-satugu. Blong duoyap lo pu eygo, “Tamot temu lo taling go, Paulus lo tetaling go ey mo kerlam dali-wa. Tamot-tamot ngga go sui se pu dali!”
13 Se senong! Wamoymlue eygo klaysedue tamot-tamot ngganemot gemang! Wamoy so nemotnang lo pu go, “Atnang ngge, Iram Yesus go tamot gabe.” 14 Kua kay! Banim nogo, Ki Wali tamot kalik blong ey, wamoy so Kuaseni go mo pung gabe. 15 Ngga nenep sogo tasam kua. Wengkabui lo ngga kalik mlue go, wamoy so nemudi sogo tap lo keng go tamot-tamot logo ngga kalik mea mlue dali. No, tasam ngga sik sogo seguot ey i go idekeba-a, way mea iti.
Paulus tang logo puplu so pu go
16 Ayanang, mianang! Esang, puplu so genam sogo, meno duo logo yakua pu! No, genam puplu so motnang lo duing go, ngga motnang go ba so, nueya, suey dali. Ngga kalik go, dabui ta dato tegue genang so, puplu sogo kalik genam nase wawi dali! 17 No, ngge se senong! Genam go nebut ngga kalik go, Woy Dem lo pu go tang so kua, no, genam sedue puplu lo, nebut babu so gabe pen-asitugu. Genam sedue puplu dali gabe sang. 18 Nueya! Gabe pen-asitugu, “Sikabung mata so tang pen go, genam logo mea pen-asilu dali. 19 Puplu sogo sedue nogo gigling dega eygo keda so motnang se wawi.” 20 Se duing: motnang tamot-tamot piam go ngganemot lo keduik go gemang lelek. Yahudi go demu no keng go pluok genang so ta mlak go; ku sono kenok go; motnang go drang nemotnang lo gemang lelek. Motnang nogo taybat ngga, dabui ta tegue ey, nemotnang lo gemang taling. No, way so gigling dega ey, motnang lo pu go, “Ngga suey dali wa.” 21 Ngga kalik go motnang no taling genang, genam moyso. Genam suongsut ey, don kua. No! Dabui ta tamot-tamot piam golo tetegue go, puplu goso genam pu go, puplu sogo kalik, ta mea tegue-silu dali. 22-23 Tang sikabung temu lo pen go, genam gabe pen-asitugu dali. Nemotnang Iblani duo, genam Iblani duo dali gabe; nemotnang Israel duo so pu go, genam Israel duo dali; nemotnang, Ablaham go mamtatonyap, genam Ablaham go mamtaton dali; nemotnang lo pu go Iram Yesus go tamot mo, sedue yane kalik, genam lo gabe pepen: genam ngge, Nemot go tamot seni gabe.
Tamot temu eygo, genam go sip kua kerlam. Se ikum: kebali sogo seguot kangok so genam mo pung; demun genam nogo mo suey; boy ba nogo genam mo degutpung; kuno-woyno sikebong ey genam keklasok.
24 Da 5 yam so, sedue Yahudi lo tegan demun lo mo srap; nemot go demu nogo kalik, da klaya go ba nogo, seduesinamon sik so klaya tong go yam so, demun mo srap; 25 da nangglik yam so didemun lo mo but; demu logo, da klaya mo sruom; beap blo lo, bayi eygo, da nangglik yam so tap mo nega; kuklik klaya-kublong klaya dali so, beap blo logo dipap ey genam mo sue. 26 Kuno-woyno tap masi koklong go, ngge mo lemoy: bu lo lek sogo kalik genam tra go; sinebutsi logo genam mo truik. Yahudi logo sagui, saula meno logo sagui ey; yakena nogo, duen ba nogo, beap blo logo piam; wamoy so Iram Yesus no keng go sikabung nesip nogo genam koklong.
Piam ngga naklay ba nogo, kebong sogo kalik mo tra-sanyu. 27 No, walikebali sogo seguot, genam kuno-woyno kangok so pung go, nimla sogo yakua. Se senong: usene suey sogo genam yakua srek; ten kua dam, bu kua drop, tenday mo suing; genam amka kua goso srek go, dalip kangok so mo tra.
28 Seni so, blong duoyap yay suing genang kebali nogo, genam lo ide ey tetra go nogo, kua pen dali gabe. 29 Yang! Don sok go sedue, wali don kua go ikum so duduing go, genam-a se ikum! Nggano, walikebali tap piam ide ey lek golo, sikabung temu nega go ikum go, at go dabui naklay mo dasing gabe.
30 Yang! Dabui ta tegue genang, don malo go tang sogo so, dabui ta genam logo gabe tetegue. 31-33 Ngga lemoy go sik so, ngge mea senong: nan Siria yakena Damsik sogo no, walitap don ey nguok go tang so genam mlak genang, iram Aletas lo pu go: yakena yataput kadun go, yay gemang suing.
No, genam wokala ba no li gono, don kua go so mo lemoy, demutema idi sono mo rling. Ngga tang so, nemot go ta sik sogo sesuoy so genam li go mo kap.
Seni so, Ki Wali Iram, imot go Woy Dem Yesus go Nglangin, Nemot mo senong gemang, wamoymlue genam logo kua pen. Blo sono senang so, Nemot go sui iway-a se iti!