10
Blong duoyap Korintus ey tandali tegu genang Paulus lo pen go
1 Yang! Korintus sogo blong duoyap temu lo duing go, “Suong klay gono imot tegu go, don eygo nebut Paulus yakua pen sang. No, ket sik sogo tang so, don ey gemang pepen.” No, way so at lo pu go, imot go Blong Dem ngga, susuot yakay nuik gabe. Nemot go sui no, gabe pu-situgu, 2 “Ngga kalik pu go blong duoyap, dagu sik so at weng go, don ey bebat genang, ta logo ey kua plong.” Blong Dem lo taling go-a, genam logo mea keng! 3 Se duing: nemot-a, kukunan blo so imot maning go, don atnang lo uwawi go, kukunan go kalik kua. 4 Walitap kebuo genang don, imot lo uwawi go ngge, sikabung sik sogo kua. No, Ki Wali Iram sik sogo don dega-a atnang lo gabe uwawi. Don ngganemot logo so, sikabung lo wayang go kunala-kunala, mea seguoy-sing. 5 Yang! Ki Wali Iram go duduing tenguo genang so klik go tema, atnang lo mea kurluk. Ngga ey, kunala don eygo ngga naklay, Iram Yesus go sui no gamung go, Nemot no tupduk keng genang so, atnang lo mea ta-sing. 6 Ngga no, Iram Yesus nogo tupduk keng, suey go teguop so motnang naklay lemoy gono, kuklue temu nogo kisebui taling genang, dali atnang mo suing gabe.
7 Ayanang, mianang! Imot naklay Iram Yesus no dabui iti go gabe kekeng. Nando lo pu go, “Iram Yesus no naklay keng go dega, genam gabe!” Suey so nemot lo se duing dali: Paulusnang Iram Yesus no waysagi ey mlak go dali gabe. 8 Yang! Wali kebali buong genang don, at no Woy Dem lo mo iti. Esang! Nebut babu so atnang lo pen-etugu go, suongsut genam kua tra. Ngga kalik, seni eygo nemudi sogo-a gabe pen-atugu! Se duing: ngga, motnang kesop genang so kua, no don iti go, buong genang so, motnang sono gabe pepen. 9 Se senong! Sam seguong lo motnang suali genang so nebut drom-a genam yakua king. Kekayso motnang nogo mea pen dali! 10 Sikabung temu lo pupu go: sam lo klik go don dega ey, no suong tegu go nogo, malo-malo so. Nisonoso yakua! 11 Ngga kalik pepen go sedue, se tup! Suong namon tegu go nogo, sam ba no klik go kalik don ey genam lo mea pen dali.
Ki Wali Iram lo sang tui go-a Paulus gabe pupluok
12 Yang! Tamot-tamot meno gemang dali. Esang! Saysuk nogo ta tegue ey kebali nemotnang lo pupluok go. Tasam ngga genam kua keng. Nemotnang kalik go, genam moyso. Sedue-sedue ngga, nemot tang so wengkabui blo sono mo iti. No, ngga, puplu so pluok go! 13 Atnang-a, ngga kalik go kua. Atnang go Woy, ngga Woy Wali Iram. Blo dega sono saysuk-a iti genang, atnang moyso. Woy Wali Iram lo tui go sang ba seguong nogo-a, atnang mea wali. Sang-yam ngganemot ba nogo-a, motnang mo degut dali gabe. 14 Kuduong so Iram Yesus go walitap motnang no taling-nangu gono, at go usu ba no motnang mo degut. Ngga Woy Wali Iram lo tui go sang-yam ba no lemoy go gabe. 15 Seguot tamot-tamot temu lo pung go usu sogo, sang mo tui go tang so, dewi at logo yakua but. No, ngge-a gabe duduing: Iram Yesus no motnang dabui don kok go nogo, sikabung temu mata sogo no atnang logo kebali blo sono motnang logo-a iti genang. Ngga, sang-yam mo tui go kebali ba seguong no gabe lelemoy. 16 Yang! Sip ket sogo nogo, deguo teguop, pepen klong genang-a, kangok so atnang lo gabe duduing. No, tamot-tamot temu lo kebali ngga mo pluok go sik so, dabui ta tegue genang, genam moyso.